ગોંડલ હનીટ્રેપ કેસ: પદ્મિનીબા વાળા સહિત ચારની ધરપકડ, મુખ્ય આરોપી ફરાર

ગોંડલમાં હનીટ્રેપના એક સનસનીખેજ કેસમાં પોલીસે મોટી કાર્યવાહી કરી છે. આ કેસમાં ક્ષત્રિય સમાજના જાણીતા નેતા પદ્મિનીબા વાળા, તેમના પુત્ર સત્યજિતસિંહ વાળા, શ્યામ રાયચુરા અને હિરેન દેવડિયાની ધરપકડ કરવામાં આવી છે. જોકે, આ કેસની મુખ્ય આરોપી તેજલ છૈયા હજુ ફરાર છે, અને પોલીસે તેની શોધખોળ શરૂ કરી છે.   શું છે સમગ્ર મામલો?   ગોંડલના જેતપુર રોડ, ગીતાનગર વિસ્તારમાં રહેતા 60 વર્ષીય રમેશભાઈ ત્રિકમભાઈ અમરેલિયાએ ગોંડલ શહેર B ડિવિઝન પોલીસ સ્ટેશનમાં ફરિયાદ નોંધાવી હતી. તેમના આરોપ મુજબ, તેજલ છૈયા અને અન્ય લોકોએ તેમને હનીટ્રેપમાં ફસાવી 7થી 8 લાખ રૂપિયા પડાવવાનો પ્રયાસ કર્યો હતો. રમેશભાઈએ જણાવ્યું કે, 15 દિવસ પહેલાં તેજલે તેમનો મોબાઈલ નંબર લઈને વીડિયો કોલ કર્યો હતો. આ દરમિયાન તેજલે બીભત્સ વાતો કરી અને કપડાં ઉતારીને અશ્લીલ હરકતો કરી હતી. તેજલે રમેશભાઈને પોતાનું 7-8 લાખનું દેવું ભરવા અને સંબંધ બાંધવાની લાલચ આપી હતી.   બીજા દિવસે રમેશભાઈને ફોન આવ્યો કે તેજલ અંગે વાત કરવા રાજકોટ ઓફિસ આવવું. બાદમાં પદ્મિનીબા વાળા, તેમનો પુત્ર અને અન્ય લોકો રમેશભાઈના ઘરે આવ્યા. રમેશભાઈના જણાવ્યા મુજબ, આ લોકોએ તેમના ઘરમાં જબરદસ્તી ઘૂસીને ધમકીઓ આપી. પદ્મિનીબાએ રમેશભાઈને રોડ પર કપડાં ઉતારીને મારવાની અને ગૃહમંત્રી હર્ષ સંઘવીને કહીને તેમના ઘર પર બુલડોઝર ફેરવવાની ધમકી આપી. આ ઉપરાંત, રાજકોટ આવી માફીનો વીડિયો, માફીપત્ર આપવા અને 7-8 લાખ રૂપિયા ચૂકવવા દબાણ કર્યું.   પોલીસે શું કાર્યવાહી કરી?   ગોંડલ શહેર B ડિવિઝનના ઇન્ચાર્જ PI એ.સી. ડામોરની આગેવાનીમાં પોલીસે તપાસ શરૂ કરી. તપાસ દરમિયાન પદ્મિનીબા વાળા, સત્યજિતસિંહ વાળા, શ્યામ રાયચુરા અને હિરેન દેવડિયાની ધરપકડ કરવામાં આવી. પોલીસે આરોપીઓ પાસેથી GJ06PE 8655 નંબરની વર્ના કાર પણ જપ્ત કરી છે. મુખ્ય આરોપી તેજલ છૈયા ફરાર હોવાથી તેની શોધખોળ ચાલુ છે.   સામે પક્ષે પણ ફરિયાદ   આ કેસમાં રસપ્રદ વળાંક ત્યારે આવ્યો જ્યારે તેજલ છૈયાએ રમેશભાઈ અમરેલિયા સામે વળતી ફરિયાદ નોંધાવી. તેજલનો આરોપ છે કે રમેશભાઈએ વીડિયો કોલ દરમિયાન બીભત્સ માંગણીઓ કરી અને તેની છેડતી કરી. PI ડામોરે બંને પક્ષની ફરિયાદો નોંધીને તપાસ શરૂ કરી છે.   પદ્મિનીબાનું નિવેદન   ગોંડલ પોલીસ સ્ટેશન બહાર પદ્મિનીબા વાળાએ પોતાનો બચાવ કરતાં કહ્યું, “રમેશભાઈનો ઈરાદો તેજલનું શોષણ કરવાનો હતો. અમે તેને ખુલ્લો પાડવા ગોંડલ આવ્યા હતા. રમેશભાઈ અને તેમના પરિવારે અમારી માફી માગી હતી.” પદ્મિનીબાએ ફરિયાદને ખોટી ગણાવી અને પોતાને ન્યાય માટે કોની પાસે જવું તેવો સવાલ ઉઠાવ્યો. તેમણે દાવો કર્યો કે તેઓએ કોઈ પૈસાની માંગણી કરી નથી અને આ મામલે પુરાવા રજૂ કરવા રમેશભાઈને પડકાર્યા.   પદ્મિનીબા વાળા લોકસભા ચૂંટણી પહેલાં ક્ષત્રિય આંદોલનને કારણે ચર્ચામાં આવ્યા હતા. તેઓ અવારનવાર વિવાદોમાં રહ્યા છે, અને આ હનીટ્રેપ કેસે ફરી એકવાર તેમને ચર્ચાના કેન્દ્રમાં લાવી દીધા છે. આ કેસે ગોંડલ અને આસપાસના વિસ્તારોમાં ભારે ચકચાર જગાવી છે.   પોલીસ હાલ બંને પક્ષની ફરિયાદોની તપાસ કરી રહી છે. ફરાર તેજલ છૈયાની શોધખોળ ચાલુ છે, અને આ કેસમાં વધુ ખુલાસાઓ થવાની શક્યતા છે. આ ઘટનાએ સમાજમાં હનીટ્રેપ જેવા ગુનાઓ સામે જાગૃતિ લાવવાની જરૂરિયાત પર પણ પ્રકાશ પાડ્યો છે.