સાઈકો કિલર વિપુલ પરમારનું 8 ગોળી મારીને એન્કાઉન્ટર

ગાંધીનગરની અંબાપુર નર્મદા કેનાલ પાસે બુધવારે સાંજે સાઈકો કિલર વિપુલ પરમારનું એન્કાઉન્ટર કરવામાં આવ્યું હતું. લૂંટ અને મર્ડરના આરોપી વિપુલ પરમારના આ એન્કાઉન્ટરની વિગતો એક એક્શન-થ્રિલર ફિલ્મ જેવી છે. આ ઘટનામાં LCB કોન્સ્ટેબલ રાજેન્દ્રસિંહને કોણી પર જ્યારે એક PSI અને PIની સાવ લગોલગથી ગોળી નીકળી હતી, જે પોલીસવાનનો કાચ તોડી બહાર નીકળી હતી. આ ઘટનામાં આરોપીને કુલ 8 ગોળી વાગી હોવાનું સૂત્રો પાસેથી જાણવા મળ્યું, જેમાં 6 ગોળી છાતીના ભાગે, એક હાથે અને એક સાથળના ભાગે વાગી છે. હાલમાં વિપુલ પરમારના મૃતદેહનું પોસ્ટમોર્ટમ ચાલી રહ્યું છે, જેમાં એક ગોળી હજુ પણ તેના શરીરમાં હોવાનું મનાય છે.

ઘટનાસ્થળ પર રિકન્સ્ટ્રક્શન

23 સપ્ટેમ્બરે રાજકોટના માંડા ડુંગરથી ઝડપાયા બાદ વિપુલ પરમારને ગાંધીનગર પોલીસના હવાલે કરવામાં આવ્યો હતો. 24 સપ્ટેમ્બરે ગાંધીનગર LCB આરોપીને લઈને ઘટનાસ્થળ પર રિકન્સ્ટ્રક્શન માટે પહોંચી હતી. 2 અલગ-અલગ ગાડીઓમાં LCB PI દિવાનસિંહ વાળા અને હાર્દિક પરમારની ટીમ રવાના થઈ હતી. આગળની ગાડીમાં ડ્રાઈવર, એક PSI, હેડ કોન્સ્ટેબલ રાજેન્દ્રસિંહ અને વિપુલ પરમાર હતા. જ્યારે પાછળની ગાડીમાં PI વાળા અને PI હાર્દિક પરમાર સહિત અન્ય પોલીસકર્મીઓ હતા.

આ પણ વાંચો: હત્યાના સ્થળે જ પોલીસ ફાયરિગમાં હત્યારાનું મોત

ગોળી કોણી પર વાગીને આગળના કાચમાંથી બહાર નીકળી

સ્થળ પર ગાડી ધીમી પડતા આરોપી વિપુલ પરમારે જમણી બાજુ બેઠેલા PSIની કમરના ભાગેથી રિવોલ્વર ઝૂંટવી લીધી હતી. કોન્સ્ટેબલ રાજેન્દ્રસિંહે તેને પકડવાનો પ્રયત્ન કર્યો ત્યારે બન્ને વચ્ચે ગાડીમાં જ ઝપાઝપી થઈ હતી. આ દરમિયાન વિપુલ પરમારે રાજેન્દ્રસિંહ પર ફાયરિંગ કર્યું, જે ગોળી તેમની કોણી પર વાગીને આગળના કાચમાંથી બહાર નીકળી ગઈ હતી. ગોળી વાગતાં જ રાજેન્દ્રસિંહ બાજુમાં ખસી જતા આરોપી હથકડી સાથે જ ગાડીમાંથી ઉતરીને ભાગવા લાગ્યો.

પોલીસ પર આડેધડ ફાયરિંગ

ગાડીમાંથી બહાર નીકળીને વિપુલ પરમારે પાછળ આવી રહેલી પોલીસની ગાડી પર આડેધડ ફાયરિંગ શરૂ કર્યું. ગોળીઓ ગાડીના બોનેટ અને દરવાજા પર વાગી હતી. ફાયરિંગ કરતો-કરતો તે બાજુમાં આવેલી ઝાડીમાં ભાગવા લાગ્યો હતો. આ દરમિયાન પાછળની ગાડીમાંથી PI વાળા અને PI પરમાર સહિતની ટીમ ઉતરી અને પીછો કરવા લાગી હતી. ભાગતા-ભાગતા પણ આરોપીએ પોલીસ પર ફાયરિંગ ચાલુ રાખ્યું, જેમાં એક ગોળી PI વાળાના કાન પાસેથી પસાર થઈ, પરંતુ તેમનો બચાવ થયો.

આ પણ વાંચો: યુવતીના નખના નિશાનથી સાયકો કિલરનો રહસ્ય ખુલ્યું

પોલીસનું સ્વબચાવમાં ફાયરિંગ

પોલીસે સ્વબચાવમાં ફાયરિંગ શરૂ કર્યું અને સૌ પ્રથમ વિપુલ પરમારના પગમાં ગોળી મારી. તેમ છતાં તે ભાગતો રહ્યો, જેથી પોલીસે ફરી ફાયરિંગ કર્યું જેમાં તેને કમર અને પીઠના ભાગે ગોળી વાગી હતી. આખરે તે રોડથી 30 મીટર દૂર ઝાડીમાં ઢળી પડ્યો હતો. પોલીસે નજીક જઈને જોતા તે બેભાન અવસ્થામાં હતો અને બાદમાં 108ની ટીમે તેને મૃત જાહેર કર્યો. આ મામલે અડાલજ પોલીસ મથકમાં અકસ્માતનો ગુનો નોંધવામાં આવ્યો અને તપાસ Dysp ડી. ટી. ગોહિલને સોંપવામાં આવી છે.

વિપુલ પરમારનો ગુનાહિત માનસ

20 સપ્ટેમ્બરની મોડી રાત્રે અડાલજ પાસે અંબાપુર નર્મદા કેનાલ પાસે એક યુવક-યુવતી પર લૂંટના ઈરાદે હુમલો કરીને યુવકની હત્યા કરી હતી, જ્યારે યુવતીને ઈજાગ્રસ્ત કરી હતી. વિપુલ પરમાર જામીનમુક્ત થયેલો હતો અને તે પ્રેમી-પંખીડાંને જ લૂંટ અને મર્ડર માટે નિશાન બનાવતો હતો. તેના લગ્ન થઈ શક્યા ન હોવાથી તે માનસિક રીતે બીમાર થઈ ગયો હતો અને કોઈપણ યુગલને જોતા જ ગુસ્સે ભરાઈ તેમના પર હુમલો કરતો હતો.

આ પણ વાંચો: બર્થડે મનાવવા ગયેલા યુવકની લૂંટ અને હત્યા

પ્રેમી યુગલોને જોઈને હુમલો કરતો

4 વર્ષ પહેલાં પણ તેણે ઝુંડાલ નર્મદા કેનાલ પાસે પ્રેમી-પંખીડાં પર હુમલો કરીને પ્રેમીની હત્યા કરી હતી. તે સમયે તેણે કબૂલ્યું હતું કે, લગ્ન ન થતા હોવાથી તે માનસિક રીતે ત્રસ્ત થઈ ગયો હતો અને પ્રેમી યુગલોને જોઈને તેમના પર હુમલો કરતો હતો. તેણે તેની ગેંગ દ્વારા અત્યારસુધીમાં 10થી વધુ ગુનાને અંજામ આપ્યો હોવાની પણ કબૂલાત કરી હતી. તે તેના પિતાના બીજા લગ્ન અને સાવકી માતાના ભેદભાવભર્યા વર્તનને કારણે પણ ઉશ્કેરાયેલો રહેતો હતો.