Gandhinagar : દહેગામની સીમ બની દારૂનો અડ્ડો, કડાદરા ગામમાંથી મળ્યો 60 લાખનો વિદેશી દારૂનો...!

ગાંધીનગર (Gandhinagar) જિલ્લાના દહેગામ તાલુકાના કડાદરા ગામની સીમમાંથી પોલીસે ગેરકાયદેસર રીતે છુપાવેલો 60 લાખ રૂપિયાનો વિદેશી દારૂનો મોટો જથ્થો ઝડપી પાડ્યો છે. દહેગામ પોલીસને મળેલી ગુપ્ત બાતમીના આધારે આ દરોડો પાડી, મોટા પાયે દારૂના વેપારના રેકેટનો પર્દાફાશ કરવામાં આવ્યો છે. જોકે, પોલીસને જોતા જ મુખ્ય આરોપી ઘટનાસ્થળેથી ફરાર થઈ ગયો હતો, પરંતુ પોલીસે 13,572 બોટલ દારૂ ભરેલી 387 પેટીઓ કબજે કરી કાયદેસરની કાર્યવાહી હાથ ધરી છે.

દારૂનો મોટો જથ્થો અને આરોપીની પૂર્વ યોજના...

પ્રાથમિક તપાસ મુજબ, આરોપી દિનેશ ભરવાડે આ વિદેશી દારૂનો જથ્થો કડાદરા ગામની સીમમાં છુપાવીને મોટા પાયે વેપાર કરવાની યોજના બનાવી હતી. ગુજરાતમાં દારૂબંધી હોવા છતાં, આવા અસામાજિક તત્વો બેફામ બનીને ગેરકાયદેસર પ્રવૃત્તિઓ ચલાવી રહ્યા છે, જે કાયદો અને વ્યવસ્થા પર ગંભીર પ્રશ્નાર્થ ઊભા કરે છે. આ દારૂનો જથ્થો ક્યાંથી આવ્યો અને ક્યાં મોકલવાનો હતો તે દિશામાં પોલીસે તપાસ શરૂ કરી છે.

આ પણ વાંચો : Surendranagar માં હાઈવે પર ટ્રક ડ્રાઈવરને માર મરાતા ચક્કાજામ, 3 KM લાંબી વાહનોની કતારો!

પોલીસની સફળતા અને આરોપીની શોધખોળ...

દહેગામ પોલીસને મળેલી બાતમીના આધારે ટીમ દ્વારા સઘન વોચ ગોઠવવામાં આવી હતી. દરોડા દરમિયાન, પોલીસ સ્થળ પરથી દારૂનો વિશાળ જથ્થો જપ્ત કરવામાં સફળ રહી હતી. જોકે, પોલીસની પહોંચ પહેલા જ આરોપી દિનેશ ભરવાડ અંધારાનો લાભ લઈને નાસી છૂટ્યો હતો. પોલીસે ફરાર આરોપીને ઝડપી પાડવા માટે જુદી જુદી ટીમો બનાવીને શોધખોળ શરૂ કરી છે. આ મામલે પોલીસે ગુનો નોંધીને વધુ ઊંડાણપૂર્વક તપાસ હાથ ધરી છે, જેમાં આ રેકેટના અન્ય સભ્યો અને દારૂના સપ્લાય ચેઈનની વિગતો બહાર આવે તેવી શક્યતા છે. આ ઘટના દર્શાવે છે કે, દારૂબંધીવાળા ગુજરાતમાં પણ ગેરકાયદેસર દારૂનો વેપાર ધમધમી રહ્યો છે. આવા મોટા જથ્થામાં દારૂ પકડાતા, તંત્રએ આવા રેકેટને મૂળમાંથી ઉખાડી ફેંકવા માટે વધુ સક્રિય બનવું પડશે અને કડક પગલાં લેવા પડશે.

આ પણ વાંચો : Surat : અડાજણમાં ખુલ્લેઆમ દાદાગીરી, બાઈક ઓવરટેક કરવા જેવી નજીવી બાબતે યુવકને અધમૂવો કરાયો!