અમદાવાદ એરપોર્ટ ઉપર 37 કરોડના હાઈડ્રોપોનિક ગાંજા સાથે ચાર શખ્સો ઝડપાયા

અમદાવાદ એરપોર્ટ ઉપર ગાંજાની હેરાફેરી ઝડપાઈ છે. બેંગકોકથી આવી રહેલાં ચાર ભારતીયોના સામાનનું ચેકિંગ કરાતા રૂપિયા 37 કરોડની કિંમતનો 37.2 કિલો હાઈડ્રોપોનિક ગાંજો મળી આવ્યો હતો. ટ્રોલી બેગમાં નાસ્તાના પડીકા વચ્ચે ગાંજો સંતાડી રાખવામાં આવ્યો હતો. DRIએ અમદાવાદ એરપોર્ટ ઉપરથી 10 દિવસમાં બીજી વખત ગાંજો ઝડપી પાડ્યો છે.

DRIને બાતમી મળી હતી કે, અમદાવાદ એરપોર્ટ ઉપર ચાર શખ્સો હાઈડ્રોપોનિક ગાંજો લઈને આવી રહ્યા છે. ચોક્કસ બાતમીના આધારે ડીઆરઆઈના અધિકારીઓએ કસ્ટમના અધિકારીઓની મદદથી બેંગકોકથી આવી રહેલા ચાર ભારતીય નાગરિકોને અટકાવ્યા હતા. તેમની છ ટ્રોલી બેગનું ચેકિંગ કરતાં  રિટ્ઝ અને ચીઝલ્સ જેવી બ્રાન્ડેડ ખાદ્ય ચીજોમાં છુપાવેલા લીલા ગઠ્ઠા જેવા પદાર્થના પેકેટ મળી આવ્યા હતા. ડીઆરઆઈએ તેનું રાસાયણિક વિશ્લેષણ કરાવતાં આ પદાર્થ હાઇડ્રોપોનિક ગાંજો હોવાની પુષ્ટિ થઈ છે. જે અદ્યતન માટી વિનાની તકનીકોનો ઉપયોગ કરીને ઉગાડવામાં આવતા ગાંજાનું એક હાઈબ્રીડ સ્વરૂપ છે.

ઉલ્લેખનીય છે કે, ડીઆરઆઈએ 20 એપ્રિલ 2025ના રોજ બેંગકોકથી આવી રહેલા એક ભારતીય નાગરિકને અટકાવી ચેકિંગ કરતાં 17.5 કિલોગ્રામ હાઇડ્રોપોનિક ગાંજો મળી આવ્યો હતો. છેલ્લાં 10 દિવસમાં ડીઆરઆઈએ 55 કિલોથી વધુ હાઈડ્રોપોનિક ગાંજાનો જથ્થો ઝડપી પાડ્યો છે. એનડીપીએસ એક્ટ હેઠળ માદક દ્રવ્યો જપ્ત કરી ચાર શખ્સોની ધરપકડ કરીને ગાંજાની હેરાફેરીનું નેટવર્ક ભેદવા ડીઆરઆઈએ વધુ તપાસ હાથ ધરી છે.