અમદાવાદની કલેક્ટર કચેરીના કેમ્પસમાંથી લાંચ લેતા પાંચ શખ્સો ઝડપાયા

અમદાવાદની કલેક્ટર કચેરીના કેમ્પસમાંથી લાંચ લેતા પાંચ શખ્સોને એન્ટી કરપ્શન બ્યુરોએ (ACB) રંગેહાથ ઝડપી પાડતાં સરકારી તંત્રમાં હડકંપ મચી ગયો છે. આ ઝડપમાં બે વકીલ, બે કર્મચારી અને એક ખાનગી વ્યક્તિ સામેલ છે. વધુ એક કર્મચારી ભીડનો લાભ લઈ ફરાર થઈ ગયો છે, જેના શોધખોળ શરુ કરાઇ છે.

ફરિયાદી પાસેથી મળેલી માહિતી મુજબ, વારસાઈમાં હક રિલીઝ કરાવા માટે આ શખ્સોએ રૂ. 75,000ની લાંચની માગણી કરી હતી. ફરિયાદી દ્વારા રૂપિયા ઓનલાઇન ટ્રાન્સફર કરવામાં આવ્યા હોવા છતાં, કામમાં કોઈ પ્રગતિ ન થતાં તેણે ACBનો સંપર્ક કર્યો હતો.

ACBની ટીમે પૂરતી માહિતી એકઠી કર્યા બાદ કલેક્ટર કચેરીના કેમ્પસમાં જ છઠકું ગોઠવ્યું હતું અને પાંચ શખ્સોને લાંચ લેતાં રંગેહાથ પકડી પાડ્યા. એસીબીએ એફઆઈઆર નોંધાવ્યા બાદ વધુ તપાસ શરૂ કરવામાં આવી છે. તપાસમાં બહાર આવ્યું હતું કે વકીલો અને કર્મચારીઓએ લાંચ લેવા માટે દબાણ કર્યું હતું. ઓનલાઇન ટ્રાન્સફર છતાં ફાઈલ અટકાવીને ફરીથી દબાણ કરાયું હતું. 

 

ACB દ્વારા આરોપીઓ સામે ભ્રષ્ટાચાર નિવારણ અધિનિયમ હેઠળ ગુનો નોંધવામાં આવ્યો છે. તપાસ દરમ્યાન અન્ય સરકારી કર્મચારીઓ કે દલાલોની સંડોવણી પણ બહાર આવવાની શક્યતા છે.