કોલકાતાની જાધવપુર યુનિવર્સિટીમાં મોતની દુર્ઘટના!

કોલકાતાની જાધવપુર યુનિવર્સિટી ફરી એકવાર દુર્ઘટનાના કારણે ચર્ચામાં આવી છે. ગુરુવારે સાંજે યુનિવર્સિટી કેમ્પસમાં આવેલા એક તળાવ પાસે ઇંગ્લિશ વિભાગની ત્રીજા વર્ષની વિદ્યાર્થિની બેભાન અવસ્થામાં મળી આવી હતી, જેને તાત્કાલિક હોસ્પિટલ ખસેડવામાં આવતા તબીબોએ મૃત જાહેર કરી હતી. આ ઘટના યુનિવર્સિટીમાં ચાલી રહેલા સાંસ્કૃતિક કાર્યક્રમ દરમિયાન બની હોવાનું જાણવા મળ્યું છે. 

ઘટનાની વિગતો અને શંકાસ્પદ સંજોગો

યુનિવર્સિટીના સૂત્રોના જણાવ્યા મુજબ, મૃતક વિદ્યાર્થિનીની ઓળખ અનામિકા મંડલ તરીકે થઈ છે. સાંજે તે ગેટ નંબર ૪ પાસે તેના સહપાઠીઓ સાથે વાત કરી રહી હોવાનું જોવા મળ્યું હતું. થોડા સમય બાદ, તે તળાવની નજીક બેભાન અવસ્થામાં મળી આવી હતી. સાથી વિદ્યાર્થીઓ અને યુનિવર્સિટી સ્ટાફ દ્વારા તેને તાત્કાલિક નજીકની ખાનગી મેડિકલ કોલેજમાં લઈ જવામાં આવી, પરંતુ ત્યાં પહોંચતા જ ડોક્ટરોએ તેને મૃત જાહેર કરી.

પ્રાથમિક તબક્કે, મૃત્યુનું કારણ ડૂબી જવાનું હોવાની શંકા છે, પરંતુ પોલીસે જણાવ્યું છે કે સાચા કારણનો ખુલાસો પોસ્ટમોર્ટમ રિપોર્ટ આવ્યા બાદ જ થશે. યુનિવર્સિટીના વરિષ્ઠ અધિકારીઓ, ફેકલ્ટી સભ્યો અને વિદ્યાર્થી સંગઠનના પ્રતિનિધિઓએ હોસ્પિટલની મુલાકાત લીધી હતી. આ મામલે જાદવપુર પોલીસ સ્ટેશનમાં ફરિયાદ નોંધવામાં આવી છે અને વધુ તપાસ ચાલી રહી છે.

રાજકીય આરોપો અને ગંભીર પ્રશ્નો

આ દુર્ઘટનાએ યુનિવર્સિટી કેમ્પસના વાતાવરણ પર ગંભીર સવાલો ઊભા કર્યા છે. સત્તાધારી તૃણમૂલ કોંગ્રેસની વિદ્યાર્થી પાંખ, તૃણમૂલ છાત્ર પરિષદ (TMCP), એ આ મામલે સખત વાંધો ઉઠાવ્યો છે. TMCP એ સવાલ કર્યો છે કે સાંસ્કૃતિક કાર્યક્રમને મોડી રાત સુધી ચાલુ રાખવાની મંજૂરી કેમ આપવામાં આવી? આ ઉપરાંત, તેમણે કાર્યક્રમ દરમિયાન દારૂનું સેવન થતું હોવાનો પણ આરોપ લગાવ્યો છે અને કેમ્પસના CCTV ફૂટેજ જાહેર કરવાની માંગ કરી છે.

આ ઘટના બે વર્ષ પહેલાં બનેલી એક અન્ય દુર્ઘટનાની યાદ અપાવે છે. ઓગસ્ટ 2023માં, યુનિવર્સિટીના પ્રથમ વર્ષના બંગાળી ઓનર્સના વિદ્યાર્થીનું હોસ્ટેલના બીજા માળ પરથી પડી જવાથી મૃત્યુ થયું હતું, જેમાં સિનિયર વિદ્યાર્થીઓ દ્વારા રેગિંગનો આરોપ લાગ્યો હતો. તે ઘટના બાદ દેશભરમાં વિરોધ પ્રદર્શનો થયા હતા અને અનેક વિદ્યાર્થીઓની ધરપકડ પણ થઈ હતી.

આ પ્રકારની ઘટનાઓ યુનિવર્સિટીના મેનેજમેન્ટ અને સુરક્ષા વ્યવસ્થા પર પ્રશ્નાર્થ ચિહ્ન મૂકે છે. હાલમાં આખું કેમ્પસ આઘાત અને શોકમાં છે અને પોલીસ તપાસના અંતિમ પરિણામોની રાહ જોઈ રહ્યું છે.