Valsad : નકલી ડેપ્યુટી મામલતદાર ઝડપાઈ, સરકારી નોકરીના નામે 9.59 લાખની ઠગાઈ!

વલસાડ (Valsad) જિલ્લાના પારડીમાં એક ચકચારભરી ઘટના સામે આવી છે, જ્યાં એક યુવતી નકલી ડેપ્યુટી મામલતદાર બનીને લાખો રૂપિયાની ઠગાઈ કરતા ઝડપાઈ છે. પારડીના અંબાચ ગામની આ યુવતીએ સરકારી કચેરીઓમાં નોકરી અપાવવાની લાલચ આપીને ચાર યુવકો પાસેથી કુલ રૂપિયા 9.59 લાખની વિશાળ રકમ પડાવી હતી. આ ભેજાબાજ યુવતી ધોરણ 12 પાસ હોવાનું સામે આવ્યું છે.

સરકારી નોકરીના નામે છેતરપિંડી...

પ્રાથમિક તપાસ મુજબ, આ યુવતીએ પોતે ડેપ્યુટી મામલતદાર હોવાનો ઢોંગ રચ્યો હતો. તેણે સરકારી કચેરીઓમાં નોકરી મેળવવાની ઈચ્છા ધરાવતા ચાર યુવકોને મીઠી વાતોમાં ફસાવ્યા અને તેમને સરકારી નોકરી અપાવવાના બહાને તેમની પાસેથી તબક્કાવાર રૂપિયા 9.59 લાખ પડાવી લીધા. જ્યારે લાંબા સમય સુધી નોકરી ન મળી અને યુવકોને શંકા ગઈ, ત્યારે તેમણે આ મામલે પારડી પોલીસ સ્ટેશનમાં ફરિયાદ નોંધાવી હતી.

પોલીસ તપાસ અને ધરપકડ...

ફરિયાદ મળતાની સાથે જ પારડી પોલીસે ઝડપી તપાસ હાથ ધરી હતી. પોલીસે ગુપ્ત રીતે માહિતી એકત્રિત કરી અને આ નકલી ડેપ્યુટી મામલતદાર બનેલી ધોરણ 12 પાસ યુવતીને ગણતરીના કલાકોમાં ઝડપી પાડી. પોલીસ પૂછપરછમાં તેણે આ સમગ્ર ઠગાઈ આચરી હોવાનું કબૂલ્યું હતું. આ ઘટનાએ ફરી એકવાર સરકારી નોકરીના નામે થતી છેતરપિંડી અંગે લોકોમાં જાગૃતિ લાવવાની જરૂરિયાત ઊભી કરી છે. પોલીસે આ કેસમાં વધુ ઊંડાણપૂર્વક તપાસ હાથ ધરી છે, જેથી આ યુવતીના અન્ય કોઈ સાગરીતો હોય તો તેમને પણ ઝડપી શકાય.