નશાની હાલતમાં પોલીસકર્મીએ રિક્ષાને ટક્કર મારી

ગત મોડી રાત્રે અમદાવાદના વિશાલા સર્કલ પાસે અકસ્માત થયો હતો, જ્યાં પૂરપાટ ઝડપે આવી રહેલી એક કારે રિક્ષાને જોરદાર ટક્કર મારી હતી. આ ટક્કર એટલી પ્રચંડ હતી કે, રિક્ષા પલટી ખાઈ ગઈ અને તેના ચાલકને ગંભીર ઈજાઓ થતાં તે બેભાન થઈ ગયો. આ ઘટના બાદ આસપાસના લોકોનું ટોળું ભેગું થઈ ગયું હતું, જેમણે કારચાલકને પકડી લીધો અને તેને પોલીસને સોંપ્યો. પોલીસ તપાસમાં સામે આવ્યું છે કે, અકસ્માત કરનાર વ્યક્તિ પોલીસકર્મી છે.

બિયરની બોટલ અને પોલીસની વર્ધી મળી

સ્થળ પર પહોંચેલી પોલીસ દ્વારા કરાયેલી તપાસમાં, અકસ્માત સર્જનાર કારચાલક પ્રકાશ રબારી હોવાનું સામે આવ્યું છે, જે વટવા પોલીસ સ્ટેશનમાં ફરજ બજાવે છે. ચોંકાવનારી વાત એ છે કે, તેની કારમાંથી પોલીસની વર્ધી, બિયરની બોટલ અને કારની નંબર પ્લેટ પણ મળી આવી હતી. સ્થળ પર હાજર લોકોએ આરોપ લગાવ્યો કે, પોલીસકર્મી દારૂના નશામાં હતો. ઈજાગ્રસ્ત રિક્ષા ચાલકને 108 એમ્બ્યુલન્સ મારફતે તાત્કાલિક સારવાર માટે સિવિલ હોસ્પિટલ મોકલવામાં આવ્યો છે.

 આ પણ વાંચો: જૌનપુરમાં ભીષણ માર્ગ અકસ્માત, ચાર શ્રદ્ધાળુઓના મોત

કાયદા અને વ્યવસ્થા સામે સવાલો

આ ઘટના બાદ એમ ડિવિઝન ટ્રાફિક પોલીસે પોલીસકર્મી વિરુદ્ધ ગુનો નોંધીને વધુ તપાસ હાથ ધરી છે. પોલીસકર્મી દારૂના નશામાં હતો કે કેમ, તે જાણવા માટે તેનો બ્લડ રિપોર્ટ પણ કરવામાં આવ્યો છે. આ ઘટનાએ શહેરની સુરક્ષા અને કાયદો-વ્યવસ્થા સામે અનેક સવાલો ઊભા કર્યા છે, કારણ કે જ્યારે કાયદાના રક્ષકો જ નશાની હાલતમાં અકસ્માત સર્જતા હોય, ત્યારે સામાન્ય નાગરિકોની સુરક્ષા પર પ્રશ્નાર્થ ચિહ્ન લાગી જાય છે. આ મામલે પોલીસ દ્વારા ઊંડાણપૂર્વક તપાસ હાથ ધરાઈ છે.