Ahmedabad ના ચાંગોદરમાં ડબલ મર્ડરનો ભેદ અંતે ઉકેલાયો

અમદાવાદના સાણંદ તાલુકાના ચાંગોદર વિસ્તારમાં 14 એપ્રિલ, 2025ના રોજ થયેલી દેરાણી-જેઠાણીની નિર્દય હત્યાના કેસમાં ચાંગોદર પોલીસે મહત્વની સફળતા મેળવી છે. ચાંચરાવાડી વાસણા ગામના ગોચરમાં જતનબહેન સોલંકી અને સોનબહેન સોલંકી નામની બે વૃદ્ધ મહિલાઓના મૃતદેહ મળી આવ્યા હતા. બંને માટોડા ગામની રહેવાસી હતી. આ ઘટનામાં આરોપીએ 15 મિનિટના ટૂંકા ગાળામાં પથ્થરના ઘા મારીને બંનેની હત્યા કરી હોવાનું સામે આવ્યું છે. પોલીસે ગુનો નોંધી, ઝીણવટભરી તપાસ હાથ ધરી અને આરોપીને મધ્યપ્રદેશથી ઝડપી પાડ્યો છે.   પોલીસની તપાસ અને આરોપીની ધરપકડ   આ ડબલ મર્ડર કેસની તપાસ માટે ચાંગોદર પોલીસ, લોકલ ક્રાઈમ બ્રાન્ચ (LCB), સ્પેશિયલ ઓપરેશન ગ્રૂપ (SOG) અને ફોરેન્સિક ટીમે સંયુક્ત રીતે કામગીરી હાથ ધરી. ચાર ટીમો બનાવીને 150થી વધુ સીસીટીવી કેમેરાના ફૂટેજનું વિશ્લેષણ કરવામાં આવ્યું. તપાસ દરમિયાન મધ્યપ્રદેશના સતના જિલ્લાના પ્રતાપપુર ગામના વતની ભોલે કોલ (ઉં.વ. 47)ને શંકાસ્પદ તરીકે ઓળખવામાં આવ્યો. ભોલે પરણિત છે અને ચાંચરાવાડી વાસણામાં ભાડે રહેતો હતો. તે ચાંગોદરની એક કંપનીમાં છેલ્લા ત્રણ મહિનાથી કામ કરતો હતો. ઘટના બાદ તે તાત્કાલિક પોતાના વતન ભાગી ગયો હતો. LCBની ટીમે મધ્યપ્રદેશ પહોંચી તેની ધરપકડ કરી. પૂછપરછ દરમિયાન ભોલેએ બંને મહિલાઓની પથ્થર વડે હત્યા કરી હોવાની કબૂલાત કરી.   હત્યા પાછળનું કારણ   પોલીસ તપાસમાં જાણવા મળ્યું કે આરોપી ભોલે કોલ પીડિતાઓ સાથે વ્યક્તિગત રીતે પરિચિત હતો. ઘટનાના દિવસે તેણે એક વૃદ્ધ મહિલા પાસે જાતીય સંબંધની અનૈતિક માગણી કરી હતી. મહિલાએ આનો વિરોધ કરી ઠપકો આપતાં આરોપી ગુસ્સે થયો અને તેણે પથ્થર વડે તેની હત્યા કરી નાખી. આ દરમિયાન બીજી મહિલાએ મદદ મેળવવા ગામ તરફ ભાગવાનો પ્રયાસ કર્યો, પરંતુ આરોપીએ તેનો પીછો કરીને તેને પણ પથ્થરના ઘા મારી મોતને ઘાટ ઉતારી દીધી.   પોલીસની આગળની કાર્યવાહી   ચાંગોદર પોલીસે આરોપી ભોલે કોલની ધરપકડ કરી અને તેની સામે હત્યાનો ગુનો નોંધી કાયદેસરની કાર્યવાહી શરૂ કરી છે. આ ઘટનાએ સ્થાનિક વિસ્તારમાં ચકચાર જગાવી છે. પોલીસની ઝડપી અને અસરકારક તપાસથી આ કેસનો ભેદ ટૂંકા સમયમાં ઉકેલાયો છે. હાલ પોલીસ આ મામલે વધુ તપાસ કરી રહી છે, જેથી ઘટનાના તમામ પાસાઓ સ્પષ્ટ થઈ શકે.