ગુજરાતમાં સાયબર ગુના આચરતી ‘ઠકરાર’ ગેંગ ઝબ્બે!

ગુજરાતમાં સાયબર ગુના આચરતી ‘ઠકરાર’ ગેંગને અમદાવાદ સાયબર ક્રાઈમ બ્રાન્ચે ઝડપી પાડી. ‘ઠકરાર’ ગેંગ સામે સમગ્ર દેશમાં રૂપિયા 16.04 કરોડના સાયબર કૌભાંડ અંગે 404 ફરિયાદો નોંધાઈ છે. ક્રાઈમ બ્રાન્ચે અત્યાર સુધીમાં ગેંગના 6 શખ્સોને ઝડપી લીધા છે. જ્યારે મુખ્ય આરોપી મિલન હજુ ફરાર છે. મિલન દુબઈમાં બેસીને સાયબર ઠગાઈથી મેળવેલા નાણા ક્રિપ્ટોમાં કન્વર્ટ કરી દેશની બહાર ચાઈનીઝ ગેંગને મોકલતો હોવાનું સામે આવ્યું છે. ‘ઠકરાર’ ગેંગ સામે રૂપિયા 1.5 કરોડના ડિજિટલ અરેસ્ટનો ગુનો નોંધાયો હતો. પ્રાથમિક તપાસમાં 300 કરોડનું ટ્રાન્ઝેક્શન કર્યાનું બહાર આવ્યું છે.

અમદાવાદના આંબાવાડી વિસ્તારમાં ઓફિસ ખોલીને સાયબર ઠગાઈ કરતી ‘ઠકરાર’ ગેંગને ઝડપી પાડવામાં અમદાવાદ સાયબર ક્રાઈમ બ્રાન્ચને સફળતા મળી છે. ધવલ ઠકરારની ઓફિસમાંથી અલગ-અલગ બેંકની 65 પાસબુક, અલગ-અલગ બેંકની 158 ચેકબુક, 45 ડેબિટ-ક્રેડિટ કાર્ડ, મોબાઈલ નંગ-12, 49 સીમ કાર્ડ, કેશ કાઉન્ટીંગ મશીન, 37.11 લાખ રોકડ મળી કુલ 37.57 લાખના મુદ્દામાલ સાથે સાવન ઠકરાર અને ગોવિંદ રાવલની પોલીસે ધરપકડ કરી છે. ધવલ ઠકરાર અને બ્રિજરાજ ગઢવી જ્યુડિશિયલ કસ્ટડી હેઠળ છે. આ કેસમાં જામીન પર મુક્ત થયેલા કેવલ ગઢવી અને હસમુખ પટેલની ધરપકડ કરવા પોલીસે તજવીજ હાથ ધરી છે. જ્યારે મુખ્ય આરોપી મિલન હાલમાં દુબઈમાં હોવાનું જાણવા મળ્યું છે.

‘ઠકરાર’ ગેંગ સામે ₹ 16.04 કરોડની ઠગાઈની 404 ફરિયાદો

‘ઠકરાર’ ગેંગ સામે હાલમાં રૂપિયા 1.05 કરોડના ડિજિટલ અરેસ્ટની ફરિયાદ નોંધાઈ છે. અગાઉ તેમની સામે અમદાવાદમાં 54 લાખ અને 32 લાખ તેમજ ગાંધીધામમાં ડિજિટલ અરેસ્ટની ફરિયાદો નોંધાઈ છે. નેશનલ સાયબર ક્રાઈમ રિપોર્ટીંગ પોર્ટલમાં ‘ઠકરાર’ ગેંગ સામે મોટાભાગના રાજ્યોમાંથી 404 ફરિયાદો નોંધાઈ છે. ‘ઠકરાર’ ગેંગે દેશમાં રૂપિયા 16.04 કરોડની સાયબર ઠગાઈ આચર્યાનો ખુલાસો થયો છે.

કેવી રીતે સાયબર કૌભાંડ આચરતાં હતા?

અમદાવાદ ક્રાઈમ બ્રાન્ચના જેસીપી શરદ સિંઘલે જણાવ્યુ કે, મુખ્ય આરોપી મિલન દુબઈમાં રહીને ચાઇનીઝ ગેંગ સાથે કામ કરે છે. તે ભારતમાં રહેલાં આરોપીઓને ડિજિટલ વોલેટ પૂરા પાડવાનું કામ કરતો હતો. મિલન ‘ઠકરાર’ ગેંગના મુખ્ય કર્તાહર્તા ધવલ ઠકરાર અને સાવન દ્વારા ઓપરેટ કરવામાં આવતાં ડમી એકાઉન્ટોમાં સાયબર ઠગાઈના નાણા ટ્રાન્સફર કરતો હતો. આ નાણા ધવલ ઠકરાર અને સાવન એટીએમ, ચેક અથવા સીએમએસ મારફતે ઉપાડતા હતા.

ઠગાઈના નાણા ઉપાડી લીધા બાદ આ રકમ આંગડિયા પેઢી મારફતે બ્રિજરાજ ગઢવી અને હસમુખ પટેલને મોકલી આપતા હતા. ત્યારબાદ બંને શખ્સો આ રકમ ક્રિપ્ટો(USDT)માં કન્વર્ટ કરતાં હતાં. ક્રિપ્ટોમાં કન્વર્ટ કર્યા બાદ બ્રિજરાજ અને હસમુખ તે ક્રિપ્ટો સાવન અને ધવલ મારફતે દુબઈ સ્થિત મિલનને ક્રિપ્ટો વોલેટમાં મોકલી આપતાં હતા. મિલન દુબઈથી ચાઇનીઝ ગેંગને સાયબર ફ્રોડના પૈસા ક્રિપ્ટોમાં કન્વર્ટ કરી દેશ બહાર મોકલી આપતો હોવાનું તપાસમાં સામે આવ્યું છે. જ્યારે 300 કરોડથી વધુનું ટ્રાન્ઝેક્શન ઠકરાર ગેંગે કર્યું હોવાનું બહાર આવ્યું છે.

‘ઠકરાર’ ગેંગનો ગુનાહિત ભૂતકાળ

‘ઠકરાર’ ગેંગના સાવન ઠકરાર, ધવલ ઠકરાર, ગોવિંદ રાવલ, બ્રિજરાજ ગઢવી, કેવલ ગઢવી અને હસમુખ પટેલ સામે ડિજિટલ અરેસ્ટ તેમજ ઈન્વેસ્ટમેન્ટ ફ્રોડના ગુના નોંધાયેલા છે. અમદાવાદમાં ત્રણ અને ગાંધીધામમાં એક ફરિયાદ નોંધાઈ છે. જ્યારે દુબઈ સ્થિત મિલનને એબસ્કોન્ડર જાહેર કરાયો છે.

‘ઠકરાર’ ગેંગ સામે ગુજસીટોક હેઠળ ગુનો નોંધાયો

રૂપિયા 16.04 કરોડની સાયબર ઠગાઈમાં પકડાયેલી ‘ઠકરાર’ ગેંગ સામે અમદાવાદ સાયબર ક્રાઈમ બ્રાન્ચે ગુજસીટોક હેઠળ ગુનો નોંધીને ગેંગના તમામ સભ્યોને પકડવાની તજવીજ હાથ ધરી છે. હાલમાં સાવન અને ગોવિંદ રાવલની સાયબર ક્રાઈમે કસ્ટડી લીધી છે. ધવલ અને બ્રિજરાજ જ્યુડિશિયલ કસ્ટડી હેઠળ છે. કેવલ અને હસમુખ હાલમાં જામીન પર મુક્ત છે. બંને શખ્સોને પરત કસ્ટડીમાં લેવા તજવીજ હાથ ધરવામાં આવી છે. જ્યારે મુખ્ય આરોપી મિલન દુબઈ હોવાથી તેને પકડવા માટે સાયબર ક્રાઈમ બ્રાન્ચે કાર્યવાહી હાથ ધરી હોવાનું ક્રાઈમ બ્રાન્ચના જેસીપી શરદ સિંઘલે જણાવ્યુ હતું.