અમદાવાદમાં રંગલા-રંગલીના પોસ્ટર્સનો વિવાદ વકર્યો!

અમદાવાદ શહેરમાં સતર્કતા ગૃપ દ્વારા લગાવાયેલાં પોસ્ટર્સનો વિવાદ થયો છે. ટ્રાફિક જાગૃતિના નામે વિવાદિત પોસ્ટર્સ લગાવનાર સતર્કતા ગૃપ સામે સોલા પોલીસ સ્ટેશનમાં જાણવાજોગ ફરિયાદ નોંધાતા વિવાદ વધુ વકરે તેવા એંધાણ વર્તાઈ રહ્યા છે. 

સતર્કતા ગૃપે ટ્રાફિક જાગૃતિના પોસ્ટર્સ લગાવવાની મંજૂરી હેઠળ રંગલા-રંગલીના વિવાદિત પોસ્ટર્સ લગાવી મહિલા સુરક્ષા સામે આંગળી ચિંધતાં વિવાદ થયો હતો. જેના કારણે અમદાવાદ શહેર ટ્રાફિક પોલીસ વિભાગે સોલા પોલીસ સ્ટેશનમાં જાણવાજોગ નોંધાવી કોના કહેવાથી પોસ્ટર્સ લગાવ્યા હતા તે મુદ્દે તપાસ કરવા સૂચના આપી છે.  

તાજેતરમાં થયેલાં એક સરવેમાં દેશના મહાનગરોમાં અમદાવાદ શહેર સૌથી સુરક્ષિત શહેર જાહેર કરાયું છે. લોકોની સુરક્ષા, કાયદો અને વ્યવસ્થા, તેમજ મહિલાઓની સુરક્ષા જેવા મુદ્દાઓને લઈ ડેટાબેઝ તૈયાર કરાયો હતો. સુરક્ષિત શહેર હોવાના દાવા સામે સવાલ ઉઠાવતા વિવાદાસ્પદ પોસ્ટર્સ લાગતાં પોલીસની કામગીરી સામે સવાલ ઉઠ્યા હતા. નવરાત્રિ પહેલાં ચાંદલોડિયા બ્રિજ અને સોલા વિસ્તારમાં પોસ્ટર્સ લગાવવામાં આવતાં વિરોધપક્ષે સવાલ ઉઠાવ્યા હતા. જેના કારણે સ્થાનિક રાજકારણ ગરમાયું હતું.

ટ્રાફિક વિભાગના પૂર્વ ઝોન DCP સફિન હસને શું કહ્યું?

આ મામલે ટ્રાફિક વિભાગના પૂર્વ ઝોન DCP સફિન હસને જણાવ્યુ કે, સતર્કતા ગૃપ દ્વારા ટ્રાફિક જાગૃતિ કેળવવા પોસ્ટર્સ લગાવાની મંજૂરી ટ્રાફિક વિભાગ પાસે લીધી હતી. જો કે, મહિલા સુરક્ષા તરફ આંગળી ચિંધતા પોસ્ટર્સ હોવાની જાણ થતાં તાત્કાલિક હટાવી દેવામાં આવ્યા છે. જ્યારે સોલા પોલીસ સ્ટેશનમાં વિવાદિત પોસ્ટર્સ લગાવવા બાબતે જાણવા જોગ ફરિયાદ દાખલ કરીને ક્યાં ઉદ્દેશ્યથી અને કોના કહેવાથી પોસ્ટર્સ લગાવ્યા હતા તેની તપાસ કરવામાં આવશે.

તેમણે ઉમેર્યુ કે, મહિલા સુરક્ષા સરવે અનુસાર અમદાવાદ મહિલાઓ માટે સુરક્ષિત શહેર છે. મહિલાની સુરક્ષા માટે નિર્ભયા પ્રોજેક્ટ પર પણ કામ કરવામાં આવી રહ્યું છે. સતર્કતા ગૃપ દ્વારા લગાવેલા બેનર સાથે પોલીસને કોઈ સંબંધ નથી. આઠથી દસ વિસ્તારમાં ખોટા મેસેજ પોસ્ટર્સ હટાવી દેવામાં આવ્યા છે.

ટ્રાફિક વિભાગના પૂર્વ ઝોન DCP નીતા દેસાઈએ શું કહ્યું?

ટ્રાફિક વિભાગ પશ્ચિમ ઝોનના DCP નીતા દેસાઈએ જણાવ્યુ કે, સતર્કતા ગૃપ દ્વારા ટ્રાફિક જાગૃતિ બાબતે પોસ્ટર લગાવવા મંજૂરી માગી હતી. જેમાં હેલ્મેટ પહેરવા, સીટ બેલ્ટ લગાવવા જેવી બાબતે જાગૃતતા લાવવા માટે પોસ્ટર લગાવવામાં આવતાં હતા. NGO દ્વારા થઈ રહેલી કામગીરીની ટ્રાફિક વિભાગને અગાઉથી જાણ હતી. જો કે, વિવાદિત પોસ્ટર લગાવ્યા હોવાની જાણ થતા ટ્રાફિક વિભાગને થતાં તાત્કાલિક હટાવી દેવામાં આવ્યા છે. ટ્રાફિક જાગૃતિ સિવાયના અન્ય કોઈપણ પોસ્ટર ન લગાવવા સતર્કતા ગૃપને સૂચના આપવામાં આવી છે. વિવાદિત પોસ્ટર લગાવવા બાબતે તપાસ કરવામાં આવશે.

શું હતો સમગ્ર મામલો?

અમદાવાદ શહેરના કેટલાક વિસ્તારોમાં ડિવાઈડર પર મહિલાઓએ રાતની પાર્ટીઓમાં જવાનું નહીં રેપ-ગેંગરેપ થઈ શકે છે તેવા પોસ્ટર લગાવવામાં આવ્યા હતા. પોસ્ટર્સમાં લખવામાં આવેલા સ્લોગનથી મહિલાઓની સુરક્ષા સામે સવાલ ઊભા કરાયા હતા. જેમાં એ રંગલી, રાતની પાર્ટીઓમાં જવાનું નહીં... રેપ-ગેંગરેપ થઈ શકે છે, એ રંગલા અંધારામાં સુમસામ જગ્યાએ રંગલીને લઈ જવી નહીં... રેપ-ગેંગરેપ થઈ જાય તો...? આવું લખેલાં પોસ્ટર્સના વીડિયો સોશિયલ મીડિયામાં વાયરલ થયા હતા. સોલા, ચાણક્યપુરી બ્રિજ અને આસપાસના વિસ્તારોમાં લગાવેલા પોસ્ટર્સના કારણે વિવાદ થયો હતો. જેના કારણે પોસ્ટર્સ હટાવી દેવામાં આવ્યા હતા.  

સેફ્ટી ઈન્ડેક્સમાં અમદાવાદ શહેર અવ્વલ

વૈશ્વિક સ્તરે જાણીતી એજન્સી દ્વારા કરાયેલા સરવેમાં અમદાવાદ શહેરને દેશના સૌથી સુરક્ષિત શહેરમાં પ્રથમ સ્થાન મળ્યું છે. ટોપટેન શહેરોમાં મુંબઈ સાતમા ક્રમાંકે છે. કંપનીએ લોકોની સુરક્ષા, કાયદો અને વ્યવસ્થા સહિતના મુદ્દાને આધારે ડેટાબેઝ કરીને સરવે કર્યો હતો. આ સેફ્ટી ઇન્ડેક્સમાં અમદાવાદને 100 માંથી 68.3 પોઇન્ટ મળ્યા હતા. સરવેમાં કાયદો અને વ્યવસ્થા, ગુના નિવારણનો દર, સીસીટીવી નેટવર્ક, મહિલાઓની સુરક્ષા જેવા મુદ્દા ધ્યાનમાં રાખવામાં આવ્યા હતા.