અકીલ અખ્તર હત્યા કેસમાં પરિવારજનો સામે ફરિયાદ

સીબીઆઈએ અકીલ અખ્તર હત્યા કેસમાં મૃતકના પિતા (પૂર્વ DGP, પંજાબ), મૃતકની માતા (પૂર્વ માર્ગ-મકાન મંત્રી, પંજાબ), મૃતકની પત્ની અને મૃતકની બહેન સામે ફરિયાદ નોંધાઈ છે.

ફરિયાદમાં આરોપ મૂકવામાં આવ્યા છે કે, અકીલ અખ્તર પંજાબના પૂર્વ ડીજીપી મોહમ્મદ મુસ્તફા અને પંજાબના પૂર્વ માર્ગ અને મકાન મંત્રી રઝિયા સુલતાનાના પુત્ર છે. તેઓ હાલમાં પંચકુલાના માનસા દેવી મંદિર પાસે સેક્ટર-4 રહેતાં હતા. અકીલ અખ્તરનું 16 ઓક્ટોબર 2025ના રોજ શંકાસ્પદ સંજોગોમાં મૃત્યુ થયું હતું. મૃતક અકીલ અખ્તર અને તેમના પરિવાર વચ્ચે ઘણાં સમયથી અસંતોષ હતો.

27 ઓગસ્ટ, 2025ના રોજ મૃતક અકીલ અખ્તરે સોશિયલ મીડિયા પર જાહેરમાં એક વીડિયો પોસ્ટ કર્યો હતો. જેમાં તેણે જણાવ્યું હતું કે, તેમને તેમના પિતા અને તેમની પોતાની પત્ની વચ્ચે ગેરકાયદે સંબંધો હોવાનું જાણવા મળ્યું છે. આ વીડિયોમાં તેણે ઉલ્લેખ કર્યો હતો કે તેમની માતા અને બહેન સહિત તેમનો સમગ્ર પરિવાર તેમને મારી નાખવા અથવા ખોટા કેસમાં ફસાવવાનું કાવતરું ઘડી રહ્યો છે.

અગાઉ હરિયાણા રાજ્ય સરકારે અકીલ અખ્તરની હત્યા સંદર્ભે હરિયાણાના પંચકુલા જિલ્લાના પી.એસ. મનસા દેવી કોમ્પ્લેક્સ ખાતે નોંધાયેલી એફઆઈઆર નંબર 131 ની તપાસ સીબીઆઈને ટ્રાન્સફર કરી હતી. સીબીઆઈએ મૃતક અકીલ અખ્તરના પિતા, તેની માતા, પત્ની અને બહેન સામે હત્યાનો ગુનો નોંધીને વધુ તપાસ હાથ ધરી છે.