કંબોડિયા અને નેપાળથી ઓપરેટ થતી ચાઈનીઝ સાયબર ક્રાઈમ ટોળકી ઝબ્બે

કંબોડિયા અને નેપાળથી ઓપરેટ થતી ચાઈનીઝ સાયબર ક્રાઈમ ટોળકીને ઝડપી પાડવામાં અમદાવાદ શહેર સાબયર ક્રાઈમ બ્રાન્ચને સફળતા મળી છે. અમદાવાદના 4 તેમજ ભાવનગર અને જૂનાગઢના 1-1 શખ્સ મળી કુલ 6 શખ્સોને ઝડપી સાયબર ક્રાઈમ પોલીસે પૂછપરછ હાથ ધરી છે. અમદાવાદના એક વેપારીને કાઠમંડુ બોલાવી હોટલમાં ગોંધી રાખી તેના બેંક એકાઉન્ટમાં રૂપિયા 48.85 લાખનું ટ્રાન્ઝેક્શન કર્યુ હોવાનું તપાસમાં સામે આવ્યુ છે. દુબઈથી લીગલ ફંડના નાણા આવશે તેમ કહીને લોકોને ડિજિટલ અરેસ્ટ કરતાં હોવાની ચોંકાવનારી વિગતો પ્રકાશમાં આવી છે. 

અમદાવાદ શહેર સાયબર ક્રાઈમ બ્રાન્ચે રાજ્યના લોકો પાસેથી બેંક એકાઉન્ટ ભાડે મેળવી તેમાં લાખો રૂપિયાનું ટ્રાન્ઝેક્શન કરીને કમિશન મેળવતી તેમજ સાયબર ક્રાઈમ કરતી ટોળકીને ઝડપી પાડી છે. અમદાવાદના એક વેપારીને બેંકના કરંટ ખાતામાં ટ્રાન્ઝેક્શન કરીને કમિશન આપવાની લાલચ આપી કાઠમંડુની હોટલમાં 6 દિવસ ગોંધી રાખી ડિજિટલ અરેસ્ટ અને ઈન્વેસ્ટમેન્ટ ફ્રોડ જેવી ઠગાઈ કરી હતી. વેપારીએ ફરિયાદ નોંધાવ્યા બાદ સાયબર ક્રાઈમ બ્રાન્ચે અમદાવાદના મનન ગોસ્વામી, ગૌતમ ઉર્ફે માર્કો ચૌહાણ, ચિરાગ ઉર્ફે મનન ઢોલા, આરીફ સૈયદ, રાહુલ યાદવ અને યશ યાદવ નામના શખ્સોની ધરપકડ કરી છે.

અમદાવાદ શહેર સાયબર ક્રાઈમ બ્રાન્ચના DCP લવિના સિન્હાએ જણાવ્યુ હતુ કે, અમદાવાદના એક વેપારીને કામકાજ અપાવવાની રાહુલ યાદવ, યશ યાદવ અને આરીફે લાલચ આપી હતી. લાલચ આપ્યા બાદ વેપારીનું બેંકનું કરન્ટ એકાઉન્ટ ભાડે આપવાના બદલામાં કમિશન આપવાની લાલચ આપી હતી. ત્યારબાદ તેઓ વેપારીને નેપાળના કાઠમંડુ લઈ ગયા હતા. જ્યાં વેપારીનો મોબાઈલ, સીમકાર્ડ, એટીએમ કાર્ડ પડાવી લઈ હોટલમાં 6 દિવસ ગોંધી રાખ્યા હતા. વેપારીને કંઈક ખોટું થઈ રહ્યાની શંકા જતાં અમદાવાદ આવીને સાયબર ક્રાઈમમાં ફરિયાદ કરી હતી. ત્યારબાદ બેંક એકાઉન્ટમાં તપાસ કરતાં રૂપિયા 48.85 લાખનું ટ્રાન્ઝેક્શન કરવામાં આવ્યુ હતુ. આ કેસમાં વિદેશમાં રહીને કામ કરતાં ગુજરાતના 3 શખ્સો તેમજ ભારતમાં રહેતાં 4 શખ્સોને વોન્ટેડ જાહેર કરાયા છે.

સાયબર ટોળકીની મોડસ ઓપરેન્ડી

બેંકના ખાતાધારકને દુબઈથી લીગલ ફંડના નાણા આવશે તેમ જણાવી ખાતાધારકનો વિશ્વાસ કેળવી નેપાળના કાઠમંડુમાં હોટલમાં ગોંધી રાખી ચાઈનીઝ ટોળકી સાથે મળી ખાતાધારકની મંજૂરી વગર બેંક એકાઉન્ટ, રજિસ્ટર મોબાઈલ નંબરના સીમકાર્ડ, રજિસ્ટર ઈમેઈલ આઈડીનો એક્સેસ મેળવી લઈ તે બેંક એકાઉન્ટમાં ચાઈનીઝ શખ્સો દ્વારા કંબોડિયાથી ઓપરેટ થતાં ડિજિટલ એરેસ્ટ, ઈન્વેસ્ટમેન્ટ ફ્રોડ, ટેલિગ્રામ ટાસ્ક ફ્રોડ જેવા સાયબર ઠગાઈના નાણાના ટ્રાન્ઝેક્શન કરી ગુનો આચરતા હતા. આ પ્રકારની મોડસ ઓપરેન્ડીથી કામ કરતી ગેંગ ભારતમાંથી અલગ અલગ એકાઉન્ટ હોલ્ડર શોધી બેંક એકાઉન્ટોની ડિટેઈલ્સ સાયબર ક્રાઈમ ઓપરેટ કરતી વિદેશી ગેંગને આપતા હોય છે. જે બેંક એકાઉન્ટોમાં ભારત અને અન્ય દેશોમાંથી સાયબર ફ્રોડનો ભોગ બનનાર લોકોના નાણા મેળવી સાયબર ક્રાઈમ આચરવામાં આવે છે.

એજન્ટ તરીકે પણ કામ કરે છે ટોળકી

આ ટોળકી ભારતના લોકોને કંબોડિયામાં નોકરી અપાવી દેવાની લાલચ આપી બેરોજગાર યુવાનોને વાયા વિયેતનામથી કંબોડિયા લઈ જાય છે. ત્યાં કંબોડિયાની સરહદ પાસે ગોંધી રાખી સાયબર ફ્રોડની કામગીરી કરાવે છે. ટોળકીના એજન્ટને પ્રતિ યુવક દીઠ રૂપિયા 1300 ડોલર ચુકવાતા હોવાનું તપાસમાં સામે આવ્યુ છે. જ્યારે બેંક એકાઉન્ટ ભાડે આપવા બદલ ટોળકીના શખ્સને એકાઉન્ટ દીઠ રૂપિયા 50 થી 75 હજાર મળતા હતા. જ્યારે એકાઉન્ટ ધારકને માત્ર 10 થી 15 હજાર આપતા હોય છે.