Surat ફરી શર્મસાર, 15 વર્ષીય સગીરાને પ્રેમજાળમાં ફસાવી ગર્ભવતી બનાવી!

સુરતમાં સગીરાઓ માટે સોશિયલ મીડિયા કેટલું જોખમી બની રહ્યું છે તેનો વધુ એક ચિંતાજનક કિસ્સો સામે આવ્યો છે. શહેરના ઉમરવાડા વિસ્તારમાં 15 વર્ષીય સગીરાને 25 વર્ષના યુવકે દુષ્કર્મ આચરી ગર્ભવતી બનાવતા ખળભળાટ મચી ગયો છે. આ ઘટનાએ ફરી એકવાર યુવા પેઢીમાં સોશિયલ મીડિયાના દુરુપયોગ અને તેના ગંભીર પરિણામો પર લાલબત્તી ધરી છે.

પ્રાપ્ત માહિતી અનુસાર, પીડિત સગીરા અને આરોપી યુવક સોશિયલ મીડિયાના માધ્યમથી મિત્ર બન્યા હતા. આ મિત્રતા ધીમે ધીમે પ્રેમ સંબંધમાં પરિણમી હતી. યુવકે આ સગીરાને મળવાના બહાને વારંવાર દુષ્કર્મ આચર્યું હતું, જેના પરિણામે સગીરા ગર્ભવતી બની હતી. સગીરાના પેટમાં ચાર માસનો ગર્ભ હોવાનું સામે આવતા પરિવારજનો સ્તબ્ધ થઈ ગયા હતા.

આ ઘટનાની જાણ થતાં જ પુણા પોલીસે તાત્કાલિક કાર્યવાહી હાથ ધરી હતી. પોલીસે 25 વર્ષીય આરોપી યુવક પંકજ સરોજની ધરપકડ કરી છે. પોલીસે આરોપી વિરુદ્ધ POCSO સહિતની કલમો હેઠળ ગુનો નોંધી વધુ તપાસ શરૂ કરી છે.

આ પણ વાંચો : Surat માં બેફામ ગુનેગારો, કાયદો વ્યવસ્થા તળિયે, જાહેરમાં ત્રણ રાઉન્ડ ફાયરિંગ!

પુણા પોલીસ સ્ટેશનના પી.આઈ. વી.એમ. દેસાઈએ જણાવ્યું હતું કે, સગીરાના પરિવારજનોએ ગર્ભપાત (અબોર્શન) માટે મંજૂરી માગી છે. આ ઘટનાએ સમાજમાં સગીરાઓની સુરક્ષા અને સોશિયલ મીડિયાના દુરુપયોગ પર ગંભીર ચિંતા ઉભી કરી છે. વાલીઓ અને શિક્ષણ સંસ્થાઓ દ્વારા બાળકોને સોશિયલ મીડિયાના જોખમો અંગે જાગૃત કરવા અને સાવચેતી રાખવા પર ભાર મૂકવો અત્યંત જરૂરી છે.

આ પણ વાંચો : Surat માં હૃદયદ્રાવક ઘટના: રજા પર આવેલા આર્મી જવાનનું પાંચમા માળેથી પટકાતા કરુણ મોત!