અમરેલીના ધારીના મૌલાનાનું પાકિસ્તાન કનેક્શન ખૂલ્યુ? અમરેલી SOGએ ઉઠાવ્યો

જમ્મુ-કશ્મીરના પહેલગામમાં આતંકી હુમલા બાદ કેન્દ્ર અને રાજ્ય સરકાર સફાળી જાગી છે. અમરેલી SOGએ ધારીના હિમખીમડીપરાના મદ્રેસામાં ભણાવતા શંકાસ્પદ મૌલાનાને ઉઠાવીને પૂછપરછ શરૂ કરી છે. SOGની પૂછપરછ દરમિયાન મૌલાનાનું પાકિસ્તાન કનેક્શન સામે આવ્યું છે. તેના વ્હોટ્સએપમાંથી પાકિસ્તાન અને અફઘાનિસ્તાનનાં 7 શંકાસ્પદ ગૃપ મળતાં પોલીસે તે દિશામાં તપાસ હાથ ધરી છે.

અમરેલી જિલ્લામાં ગેરકાયદે વસવાટ કરતા લોકોની SOGએ તપાસ હાથ ધરી છે. તપાસ દરમિયાન  ધારીના હિમખીમડીપરાના મદ્રેસામાં ભણાવતા મૌલાના મોહંમદ ફઝલ અબ્દુલ અઝીઝ શેખ ઉપર શંકા ગઇ હતી. તેની પાસે રહેઠાણના આધાર પુરાવા માગ્યા હતા. આધાર પુરાવા રજૂ ન કરતાં મૌલાનાને ઉઠાવી ધારી પોલીસ સ્ટેશનમાં લવાયો હતો. જ્યાં પૂછપરછ કરતાં તે મૂળ અમદાવાદના જુહાપુરાનો રહેવાસી હોવાનું જાણવા મળ્યું હતું.

પોલીસે મૌલાના મોહંમદફઝલ અબ્દુલઅઝીઝ શેખ સામે જાણવા જોગ ફરિયાદ દાખલ કરીને મોબાઇલ કબજે લીધો છે. તેના વ્હોટ્સએપમાંથી પાકિસ્તાન અને અફઘાનિસ્તાનનાં 7 ગૃપ મળ્યા હતા. મૌલાનાના મૂળ રહેઠાણ અંગે કોઈ પુરાવા મળ્યા નથી. અમરેલીમાં કેટલ સમયથી રહેતો હતો અને કોના-કોના સંપર્કમાં હતો તે અંગે તપાસ શરૂ કરી છે. આ બાબતે અમરેલી SP સંજય ખરાતે જણાવ્યું કે મૌલાનાની શંકાસ્પદ પ્રવૃત્તિઓ લાગતાં અટકાયત કરીને પૂછપરછ કરતાં તેનું પાકિસ્તાની કનેક્શન હોવાનું લાગી રહ્યું છે. હજું તેની પૂછપરછ ચાલુ છે. મૌલાના પાકિસ્તાની કનેક્શન ધરાવે છે કે કેમ એ તપાસ બાદ જાણવા મળશે.