અમદાવાદના ખોખરા વિસ્તારમાં આવેલી સેવન્થ ડે સ્કૂલમાં એક ચોંકાવનારી અને દુ:ખદ ઘટના બની છે, જ્યાં ધોરણ 8ના એક વિદ્યાર્થીએ સામાન્ય ધક્કામુક્કીની બાબતમાં ધોરણ 10ના વિદ્યાર્થીની છરી મારી હત્યા કરી છે. આ ઘટના બાદ ભારે તણાવ સર્જાતા, મોટી સંખ્યામાં વાલીઓ અને સિંધી સમાજના લોકો સ્કૂલ પર એકઠા થયા હતા અને ભારે હોબાળો મચાવ્યો હતો, જેના કારણે સ્કૂલને તાત્કાલિક રજા જાહેર કરવાની ફરજ પડી હતી.
આ સમગ્ર ઘટનાની વિગત એવી છે કે, એક અઠવાડિયા પહેલાં 15 વર્ષીય સગીર અને તેના પિતરાઈને ધોરણ 8ના 2 વિદ્યાર્થીઓ સાથે સીડી પર ધક્કામુક્કી થઈ હતી. આ સામાન્ય બાબત પર શરૂ થયેલી બોલાચાલી બંને જૂથ વચ્ચે ચાલુ રહી. મંગળવારે &nbsp;જ્યારે સ્કૂલ છૂટી ત્યારે ધોરણ 10નો વિદ્યાર્થી સ્કૂલની સામે મણિયાશા સોસાયટીના ગેટ પાસે પહોંચ્યો હતો.
આ સમયે, ધોરણ 8ના વિદ્યાર્થીએ તેની સાથે ફરી બોલાચાલી શરૂ કરી અને અચાનક પોતાની પાસે છુપાવેલી છરી કાઢીને ધોરણ-10ના વિદ્યાર્થી પર હુમલો કર્યો હતો. ગંભીર ઈજા થતાં વિદ્યાર્થીને મણિનગરની ખાનગી હોસ્પિટલમાં દાખલ કરાયો હતો, જ્યાં સારવાર દરમિયાન તેમનું મોત થયું હતું.
હત્યાની આ ઘટના બાદ વિદ્યાર્થીની માતાએ ખોખરા પોલીસ સ્ટેશનમાં ફરિયાદ નોંધાવતા પોલીસે તાત્કાલિક કાર્યવાહી હાથ ધરી હતી. પોલીસે હત્યા કરનાર સગીર વિદ્યાર્થીને જુવેનાઇલ એક્ટ હેઠળ રાઉન્ડ અપ કર્યો છે. પોલીસે આ કેસમાં CCTV ફૂટેજ મેળવી, ઘટના સમયે હાજર અન્ય વિદ્યાર્થીઓ અને સ્કૂલના સ્ટાફના નિવેદનો પણ નોંધ્યા છે. પોલીસ તપાસમાં એ પણ સામે આવ્યું છે કે, હત્યા કરનાર વિદ્યાર્થી સામે અગાઉ પણ સ્કૂલને અનેક ફરિયાદો મળી હતી અને તે અંગે કાર્યવાહી પણ કરવામાં આવી હતી.
અમદાવાદ શહેરના DEO રોહિત ચૌધરીએ આ મામલે સ્કૂલની બેદરકારી બદલ નોટિસ ફટકારી છે અને તાત્કાલિક રિપોર્ટ રજૂ કરવા આદેશ કર્યો છે. કાયદાકીય પાસાઓની વાત કરીએ તો, આ કેસમાં 7 વર્ષ કે તેથી વધુ સજાની જોગવાઈ છે.&nbsp;

સેવન્થ ડે સ્કૂલ

સામાન્ય બોલાચાલીમાં ધોરણ 8ના વિદ્યાર્થીએ ધોરણ 10ના વિદ્યાર્થીને છરી મારતા થયું મોત

August 20, 2025 | 09:52 IST