Ahmedabad ના કોમોડિટીની પેઢીના વેપારીને સુરતના વેપારીએ આપી ધમકી

અમદાવાદ (Ahmedabad)ના થલતેજમાં રહેતાં અને સિંધુભવન રોડ ઉપર કોમોડિટીની પેઢી ચલાવતાં વેપારીને જાનથી મારી નાખવાની ધમકી મળી છે. નાણાકીય વ્યવહારોના ભાગરૂપે આપેલી બે વચન ચિઠ્ઠી સંદર્ભે નજીકના સંબંધી અને સુરતના વેપારીએ વ્યાજ સાથે નાણા નહી ચુકવે તો મારી નાખવાની ધમકી આપતાં છેવટે મામલો પોલીસ સ્ટેશનમાં પહોંચ્યો છે. અમદાવાદ (Ahmedabad)ના વેપારીએ સુરતના વેપારી સામે બોડકદેવ પોલીસ સ્ટેશનમાં ફરિયાદ નોંધાવતા પોલીસે ગુનો નોંધી તપાસ હાથ ધરી છે. 

થલતેજ વિસ્તારમાં રહેતા દિવ્યેન વસંતરાય રાયઠઠ્ઠા સાથે જૂની ચિઠ્ઠીને લઈ વિવાદ થયો છે. મામલો વર્ષ 2020નો છે, જ્યારે પરિવારમાં ચાલી રહેલા નાણાંકીય વ્યવહારોના ભાગરૂપે બે વચન ચિઠ્ઠી તૈયાર કરવામાં આવી હતી. આ ચિઠ્ઠીઓ માત્ર કાગળ પર હતી. એક પ્રકારનો વાયદો હતો કે 'ભુપતાણી એસોસિએ' નામની પેઢી તેમના દાદા સ્વ.રમેશભાઈ ભુપતાણી સંચાલિત કરતા હતા અને તેમને આ પેઢી વેચાણ કરવાની હતી. દિવ્યેનભાઈએ આ પેઢીને ખરીદવા માટે એડવાન્સ રકમ RTGS દ્વારા ચૂકવી દીધી હતી. અચાનક તેમના કૌટુંબિક સગા અને સુરત ખાતે રહેતાં કેતનભાઈ રાયઠઠ્ઠા તરફથી વારંવાર ફોન કરીને વ્યાજ સહિત વધુ નાણાંની માંગણી કરવા લાગ્યા હતા. દિવ્યેનભાઈના કહેવા મુજબ તેમણે પહેલા જ નાણાં ચુકવી દીધા હોવા છતાં કેતનભાઈએ પૈસા માટે દબાણ ચાલુ રાખ્યુ હતુ. 

16 એપ્રિલ 2025 ના રોજ કેતનભાઈએ દિવ્યેનભાઈની ઓફિસ પર આવીને અપશબ્દો બોલી ધમકી આપી હતી. તે સમયે ગભરાયેલા દિવ્યેનભાઈએ તરત જ વચન ચિઠ્ઠીના સાક્ષી પ્રવિણભાઈ કોટકને ફોન કરીને જાણ કરી હતી. પ્રવિણભાઈએ કેતનભાઈ સાથે ફોન પર વાત કરીને સમગ્ર બાબતને સમજાવાનો પ્રયાસ કર્યો હતો. દિવ્યેનભાઈની વ્યક્તિગત લેતીદેતી બાકી રહેતી નથી તેમ જણાવ્યુ હોવા છતાં કેતનભાઈએ ઊંચા અવાજે ધમકી આપી 15 દિવસમાં નહી ચુકવે તો જાનથી મારી નાખવાની ધમકી આપી હતી. વાત માત્ર આટલેથી નહીં અટકતાં 28 મે 2025 ના રોજ મોબાઇલ પર ફરી ધમકી આપીને રસ્તા પર દેખાશે તો મારી નાખવા કહ્યું હતું.
 
દિવ્યેનભાઈએ કહ્યું હતું કે, આ વિવાદ મામલે વડોદરા-સુરત હાઈવે પર ભાઈકાકા હોલમાં કેતનભાઈ સાથે બેઠક યોજાઈ હતી. તે સમયે કહ્યું કે, મારે કોઈ રૂપિયો ચુકવવાનો નથી. તેથી કેતનભાઈએ મારા ઉપર હુમલો કર્યો હતો. આ મામલે વડોદરા પોલીસ કમિશનરને અરજી પણ આપી હતી. કેતનભાઈની ધમકીથી વ્યથિત થઈને દિવ્યેનભાઈએ બોડકદેવ પોલીસ સ્ટેશનમાં કેતનભાઈ રાયઠઠ્ઠા સામે ફરિયાદ નોંધાવી છે.  બોડકદેવ પોલીસે સુરતના કેતનભાઈ મગનભાઈ રાયઠઠ્ઠા (ઠક્કર) સામે ગુનો નોંધીને વધુ તપાસ હાથ ધરી છે.