Ahmedabad : બાંગ્લાદેશી નાગરિક ભારતીય બની ફરતો રહ્યો, અમદાવાદ એરપોર્ટ પર પોલ ખૂલી!

અમદાવાદ SOG (સ્પેશિયલ ઓપરેશન્સ ગ્રુપ) એ એક મોટી સફળતા હાંસલ કરી છે. પશ્ચિમ બંગાળમાંથી બોગસ ડોક્યુમેન્ટ્સ મેળવીને ભારતીય પાસપોર્ટ બનાવનાર એક બાંગ્લાદેશી હિન્દુ નાગરિકને અમદાવાદ એરપોર્ટ પરથી ઝડપી પાડવામાં આવ્યો છે. આ ઘટનાએ રાષ્ટ્રીય સુરક્ષા અને પાસપોર્ટ બનાવવાની પ્રક્રિયા પર ગંભીર સવાલો ઉભા કર્યા છે.

બીપ્લોબ હાલદારનો કૌભાંડનો પર્દાફાશ!

ઝડપાયેલા બાંગ્લાદેશી નાગરિકનું નામ બીપ્લોબ હાલદાર છે. તે બોગસ ડોક્યુમેન્ટ્સના આધારે બનાવેલા ભારતીય પાસપોર્ટ પર કુવૈત જવા માટે અમદાવાદ એરપોર્ટ પહોંચ્યો હતો, ત્યારે ઇમિગ્રેશન અધિકારીઓને તેના પર શંકા ગઈ અને તેને ઝડપી પાડવામાં આવ્યો. SOG ના ACP એન.એલ. દેસાઈએ આ અંગે પુષ્ટિ કરી છે.

તપાસમાં સામે આવ્યું કે, બીપ્લોબ હાલદારે 2015 માં પશ્ચિમ બંગાળના એજન્ટ છપન હસ્તક આ બોગસ ભારતીય પાસપોર્ટ બનાવ્યો હતો. આ માટે તેણે બોગસ જન્મના પ્રમાણપત્રનો ઉપયોગ કર્યો હતો, જેના આધારે તેણે પોતાનું આધારકાર્ડ, વોટર કાર્ડ અને પાનકાર્ડ સહિતના તમામ ભારતીય દસ્તાવેજો બનાવ્યા હતા. આ દસ્તાવેજોના આધારે જ તેણે ભારતીય પાસપોર્ટ પણ મેળવી લીધો હતો. આ ખુલાસો દર્શાવે છે કે કઈ રીતે ભારતીય દસ્તાવેજ પ્રણાલીમાં છીંડા છે, જેનો દુરુપયોગ વિદેશી નાગરિકો દ્વારા થઈ રહ્યો છે.

છ વર્ષ કુવૈતમાં નોકરી, બાંગ્લાદેશી મહિલા સાથે લગ્ન અને ફરી ભારત!

બીપ્લોબ હાલદાર આ બોગસ ભારતીય પાસપોર્ટના આધારે છ વર્ષ સુધી કુવૈતમાં નોકરી કરી આવ્યો હતો. નોકરી કરીને તે પરત ભારત આવ્યો. ભારતમાં આવ્યા બાદ તેણે બાંગ્લાદેશના વિઝા મેળવીને પોતાના વતન બાંગ્લાદેશ ગયો હતો અને ત્યાં એક બાંગ્લાદેશી મહિલા સાથે લગ્ન પણ કર્યા હતા. લગ્ન કરીને તે ફરીથી ભારત આવ્યો અને બીજી વાર પૈસા કમાવવા માટે કુવૈત જવા નીકળ્યો, ત્યારે અમદાવાદ એરપોર્ટ પર તેની પોલ ખુલી પડી.

આ ઘટના એ વાતનો જીવતો જાગતો પુરાવો છે કે, કેવી રીતે વિદેશી નાગરિકો બોગસ દસ્તાવેજો બનાવીને ભારતીય ઓળખ મેળવી રહ્યા છે અને તેનો ઉપયોગ આંતરરાષ્ટ્રીય સ્તરે અવરજવર માટે કરી રહ્યા છે. અમદાવાદ એરપોર્ટ પોલીસ સ્ટેશનમાં બીપ્લોબ હાલદાર વિરુદ્ધ ગુનો નોંધવામાં આવ્યો છે અને SOG દ્વારા તેની ધરપકડ કરીને વધુ તપાસ હાથ ધરવામાં આવી છે. આ તપાસમાં આવા અન્ય કેટલા કૌભાંડો બહાર આવે છે અને આવા એજન્ટોના નેટવર્કનો પર્દાફાશ થાય છે તે જોવું રહ્યું. શું આ કિસ્સો દેશની સુરક્ષા એજન્સીઓ માટે લાલબત્તી સમાન નથી?