દિલ્હીમાં દિલ દહલાવનારી ઘટના: સગીરા પર દુષ્કર્મ બાદ હત્યા

દિલ્હીના નોર્થ ઈસ્ટ વિસ્તારમાં શનિવારે સાંજે એક હૃદયદ્રાવક ઘટના સામે આવી છે, જ્યાં એક સગીરા પર દુષ્કર્મ આચરી તેની હત્યા કરવામાં આવી છે. પોલીસે આ મામલાને ગંભીરતાથી લઈ તપાસ શરૂ કરી દીધી છે. આરોપ છે કે નહેરુ વિહાર ગલી નંબર બે પાસે બિરયાનીનો ઠેલો લગાવનાર અને તેના કેટલાક મિત્રોએ મળીને નવ વર્ષની બાળકી સાથે દુષ્કર્મ આચર્યું અને પછી તેની હત્યા કરી ઘટના સ્થળેથી ફરાર થઈ ગયા.બાળકીનો મૃતદેહ સૂટકેસમાંથી મળ્યો

સગીરા બાળકીના શંકાસ્પદ સંજોગોમાં થયેલા મૃત્યુની જાણ થતાં પોલીસ પણ ઘટના સ્થળે પહોંચી હતી. પ્રાથમિક તબીબી તપાસના આધારે યૌન શોષણની આશંકા વ્યક્ત કરવામાં આવી રહી છે, તેમ અધિકારીઓએ જણાવ્યું હતું.

પોલીસના એક વરિષ્ઠ અધિકારીએ જણાવ્યું કે, દયાલપુર પોલીસ સ્ટેશનમાં રાત્રે 8 વાગ્યેને 41 મિનિટે પીસીઆર કોલ આવ્યો, જેના પગલે નહેરુ વિહારની ગલી નંબર બેમાં એક ટીમ મોકલવામાં આવી. ટીમે જોયું કે બાળકીના પિતા તેને પહેલાથી જ જગ પ્રવેશ ચંદ્ર હોસ્પિટલમાં લઈ ગયા હતા, જ્યાં ડોકટરોએ તેને મૃત જાહેર કરી હતી. અધિકારીએ વધુમાં જણાવ્યું કે, ડોકટરોને બાળકીના ચહેરા પર ઈજાના નિશાન મળ્યા અને યૌન શોષણની શક્યતા વ્યક્ત કરી. પોલીસે ભારતીય ન્યાય સંહિતા ની સંબંધિત કલમો અને યૌન અપરાધોથી બાળકોના સંરક્ષણ (પોક્સો) અધિનિયમની કલમ 6 હેઠળ કેસ દાખલ કર્યો છે.

આ ઘટના બાદ વિસ્તારના લોકોમાં ભારે ગુસ્સો જોવા મળી રહ્યો છે. પરિસ્થિતિને કાબૂમાં લેવા માટે વિસ્તારમાં પોલીસ દળ તૈનાત કરવામાં આવ્યું છે. દયાલપુર પોલીસે મૃતદેહનો કબજો લઈ તપાસ શરૂ કરી દીધી છે. પોલીસ આરોપીઓની શોધ પણ કરી રહી છે. પુરાવા એકત્ર કરવા અને આરોપીઓની ઓળખ કરીને તેમને પકડવા માટે ઘણી ટીમો બનાવવામાં આવી છે.