નશામાં ધૂત એક છોકરીએ કાર ચડાવી રેલ્વે પાટા પર, લોકોના જીવ તાળવે 

તેલંગાણામાં ગુરુવારે સવારે રંગારેડ્ડી જિલ્લાના શંકરપલ્લી નજીક એક મહિલાએ હદ વટાવી નાખી હતી. 34 વર્ષીય મહિલા ગુરુવારે સવારે 7 વાગ્યે શંકરપલ્લી સ્ટેશન પર પોતાની કારને રેલ્વે ટ્રેક પર લઈ ચલાવવાની હિંમત કરી હતી. ઉત્તર પ્રદેશના લખનૌની વોમિકા સોની તરીકે ઓળખાતી મહિલા શંકરપલ્લી-નાગુલાપલ્લી સ્ટેશનો વચ્ચેના લેવલ-ક્રોસિંગ ગેટ પર અચાનક રેલ્વે ટ્રેક પર ઘૂસી ગઈ હતી. 

નાગુલાપલ્લીના સ્થાનિક લોકોએ મહિલાને ટ્રેક પર કાર ચલાવતી જોઈ તેના પર બૂમો પાડી અને વાહન રોકવાનો પ્રયાસ કર્યો હતો. જેમાં સોનીએ તેમને લાકડી બતાવીને ધમકી આપી, તેમને તેની નજીક આવતા અટકાવ્યા અને કારને ઝડપથી રેલ્વે ટ્રેક પર હંકારી દીધી. ગામલોકોએ રેલ્વે કર્મચારીઓને જાણ કરી જેમણે ઉચ્ચ રેલ્વે અધિકારીઓને જાણ કરીને તે રૂટ પર ચાલતી ટ્રેન પાઇલટને પણ જાણ કરવામાં આવી હતી. પરિણામે સાવચેતીના પગલા તરીકે રૂટ પર ટ્રેન સેવાઓ બંધ કરવામાં આવી હતી.

શંકરપલ્લી અને નાગુલાપલ્લી સ્ટેશનો વચ્ચે ટ્રેક ઉપર લગભગ 7 કિલોમીટર સુધી પોતાની કાર ચલાવીને જાહેર સંપત્તિને નુકસાન પહોંચાડવા બદલ 34 વર્ષીય મહિલાની ધરપકડ કરી છે. રેલ્વે સ્ટાફ દ્વારા તેને રોકવાના પ્રયાસો છતાં તેની કાર, કિયા સોનેટ ચલાવવાનું ચાલુ રાખ્યું હતું. પોલીસ અધિકારી દ્વારા સોની નશામાં હોવાની પણ જાણ થઈ છે. સોનીના પરિવાર સાથે વાતચીતમાં તે ડિપ્રેશનમાં હોવાનું પણ જાણવા મળ્યું. 

સમગ્ર ઘટનાનો વિડીયો સોશ્યલ મીડિયા પર વાઇરલ થયો હતો. આ ઘટનાના કારણે હૈદરાબાદ-બેંગલુરુ રૂટ પર લગભગ એક કલાક સુધી ટ્રેન સેવાઓ ખોરવાઈ ગઈ હતી અને કેટલીક ટ્રેનોને આસપાસના રેલ્વે સ્ટેશનો પર રોકવામાં આવી હતી.