દિલ્હીમાં 24 વર્ષની યુવતી સાથે સામુહિક દુષ્કર્મ

દિલ્હીના ઉત્તર વિસ્તારમાં આવેલા સિવિલ લાઈન્સ વિસ્તારમાં 24 વર્ષની યુવતી સાથે રવિવારે 10મી ઓગસ્ટની રાત્રે સામુહિક દુષ્કર્મ થયાની ઘટના સામે આવી છે. આ યુવતી ગુરુગ્રામ સ્થિત એક ખાનગી કંપનીમાં નોકરી કરે છે. પીડિતાની ફરિયાદ મુજબ, એક મિત્ર દ્વારા પાર્ટી માટે આમંત્રણ મળ્યા બાદ તે અંડર હિલ રોડ નજીક આવેલા એક ઘરમાં ગઈ હતી, જ્યાં 2 પરિચિત મિત્રો અને 2 અજાણ્યા યુવકો સાથે મોડી રાત સુધી પાર્ટી ચાલતી રહી હતી.

પાર્ટી દરમિયાન, પીડિતાએ આરોપ લગાવ્યો કે, દારૂમાં કંઈક ભેળવીને તેના પર ચારેય યુવકો દ્વારા સામુહિક દુષ્કર્મ આચરવામાં આવ્યું હતું. યુવતીએ એવો ગંભીર આરોપ પણ લગાવ્યો છે કે, આરોપીઓએ તેને માર માર્યો અને સમગ્ર કૃત્યનો વીડિયો બનાવી લીધો હતો. બાદમાં તેને ધમકી આપવામાં આવી કે, જો તેણે પોલીસને કંઈ જણાવ્યું તો આ વીડિયો સોશિયલ મીડિયા પર અપલોડ કરી દેવામાં આવશે.

આ આરોપીઓએ યુવતી પર સામુહિક દુષ્કર્મ પછી ઘરની બહાર છોડી દીધા અને ત્યાંથી ભાગી ગયો હતો. યુવતીએ હિંમત કરીને તરત જ પોલીસને ફોન કરીને સમગ્ર ઘટનાની જાણ કરી. પોલીસના અધિકારીઓ ઘટના સ્થળે પહોંચ્યા બાદ પીડિતાનું તાત્કાલિક રીતે તબીબી પરીક્ષણ કરાવાયું છે. યુવતીના પરિવારજનોને જાણ કરી દેવામાં આવી છે અને તેને કાઉન્સેલિંગ પણ આપવામાં આવ્યું છે.

દિલ્હી પોલીસના જણાવ્યા અનુસાર, FIR નોંધી લેવામાં આવી છે અને IPCની સંબંધિત કલમો હેઠળ ગુનો દાખલ કરીને તપાસ શરૂ કરવામાં આવી છે. પોલીસે તે ઘરનું નિરીક્ષણ પણ કર્યું જ્યાં ઘટનાનો આરોપ છે, પણ આરોપીઓ ત્યાં હાજર ન હતા. હાલ પોલીસ આરોપીઓની ઓળખ કરવા માટે CCTV ફૂટેજ ચકાસી રહી છે અને તમામ સંભવિત સોર્સ પરથી તપાસ ચલાવી રહી છે. અત્યારસુધીમાં કોઈ ધરપકડ કરવામાં આવી નથી, પણ તપાસ ઝડપી ગતિએ ચાલી રહી છે.