UPમાં ડ્રગ્સ માફિયા પાસેથી કરોડોની રોકડ ઝડપાઈ

ઉત્તર પ્રદેશમાં ડ્રગ્સ માફિયાઓ સામે પોલીસે મોટી કાર્યવાહી હાથ ધરી છે. માણિકપુર પોલીસ સ્ટેશનની ટીમે રાજેશ મિશ્રા ગેંગ પર દરોડો પાડી ₹2.01 કરોડ રોકડ, 6.075 કિલો ગાંજા અને 577 ગ્રામ સ્મેક (હેરોઈન) જપ્ત કર્યા છે. જપ્ત કરાયેલા ડ્રગ્સ અને રોકડની કુલ કિંમત ₹3 કરોડથી વધુ હોવાનું અનુમાન છે.

પોલીસ તપાસમાં ખુલ્યું કે ગેંગ લીડર રાજેશ મિશ્રા જેલની અંદરથી આખું નેટવર્ક ચલાવી રહ્યો હતો, જ્યારે તેની પત્ની રીના મિશ્રા બહારથી ગેંગ સંચાલિત કરતી હતી. દરોડા દરમિયાન રીના મિશ્રા, પુત્ર વિનાયક મિશ્રા, પુત્રી કોમલ મિશ્રા અને સંબંધીઓ અજિત કુમાર તથા યશ મિશ્રાની ધરપકડ કરવામાં આવી. તેઓ ઘરમાં પ્લાસ્ટિક થેલીઓમાં ડ્રગ્સ છુપાવી રહ્યા હતા ત્યારે પોલીસ પહોંચી ગઈ.

પોલીસે ઘરમાંથી મળેલી રોકડ રકમની ગણતરીમાં કુલ 22 કલાકનો સમય લાગ્યો હતો. આ ઉત્તર પ્રદેશના ઇતિહાસમાં સૌથી મોટી રોકડ રિકવરી ગણાય છે. અગાઉ પણ રાજેશ મિશ્રા પરિવારની ₹3.06 કરોડની મિલકત જપ્ત થઈ ચૂકી છે. રીના અને વિનાયક મિશ્રા બંને NDPS એક્ટ હેઠળ અગાઉથી જ આરોપી છે.

તપાસમાં વધુમાં ખુલ્યું કે રાજેશ મિશ્રાએ બનાવટી દસ્તાવેજોનો ઉપયોગ કરીને જામીન મેળવ્યા હતા. હાલ માણિકપુર પોલીસ સ્ટેશનમાં NDPS એક્ટની કલમો હેઠળ કેસ નંબર 239/25 દાખલ થયો છે. પોલીસ અધિક્ષકે જણાવ્યું છે કે આ કાર્યવાહી ડ્રગ્સ વિરુદ્ધ ચાલી રહેલી વિશેષ ઝુંબેશનો ભાગ છે અને આવી ગેરકાયદેસર પ્રવૃત્તિઓ સામે કડક કાર્યવાહી ચાલુ રહેશે. ગેંગના અન્ય સભ્યોની શોધ ચાલુ છે.