બજાર ખુલતાની સાથે જ કિંમતી ધાતુઓમાં કડાકો

Gold-Silver Rate Fall: વૈશ્વિક બજારના નબળા સંકેતો પાછળ સ્થાનિક બજારમાં પણ સોના અને ચાંદીના ભાવમાં ઘટાડાનો સિલસિલો સતત ચાલુ રહ્યો છે. બુધવારે, અઠવાડિયાના ત્રીજા ટ્રેડિંગ દિવસે મલ્ટી કોમોડિટી એક્સચેન્જ (MCX) પર કારોબાર શરૂ થતાંની સાથે જ બંને કિંમતી ધાતુઓના ભાવ ગગડી ગયા હતા. અવિરત ઘટાડાને કારણે ચાંદીના વાયદાના ભાવ તૂટીને રૂ. 2.22 લાખ પર આવી ગયા હતા, જ્યારે 24 કેરેટ શુદ્ધ સોનાનો 10 ગ્રામનો ભાવ ઘટીને રૂ. 1.44 લાખના સ્તરે પહોંચી ગયો છે. બજારના નિષ્ણાતોના મતે પ્રોફિટ બુકિંગ અને આંતરરાષ્ટ્રીય દબાણના કારણે આ કિંમતી ધાતુઓ દરરોજ સસ્તી થઈ રહી છે.

એક જ દિવસમાં ચાંદીના ભાવમાં રૂ. 3,824 નો મોટો ઘટાડો
બુધવારે કોમોડિટી બજાર ખુલતાની સાથે જ ચાંદીના વાયદાના ભાવમાં મોટો કડાકો જોવા મળ્યો હતો. ખાસ કરીને 3 જુલાઈની એક્સપાયરી ડેટ ધરાવતી ચાંદી, જે પાછલા ટ્રેડિંગ દિવસે ₹2,25,834 પ્રતિ કિલોગ્રામ પર મજબૂતાઈથી બંધ થઈ હતી, તે શરૂઆતના સેશનમાં જ ગગડીને ₹222,010 પ્રતિ કિલોગ્રામ પર આવી ગઈ હતી. આનો અર્થ એ થયો કે 1 kg ચાંદીના ભાવમાં એક જ ઝાટકે ₹3,824 નો મોટો ઘટાડો નોંધાયો છે. ચાલુ અઠવાડિયાના માત્ર 3 ટ્રેડિંગ દિવસોમાં જ ચાંદીના ભાવમાં પ્રતિ કિલોગ્રામ રૂ. 10,000 થી વધુનો ઘટાડો થઈ ચૂક્યો છે. ગયા અઠવાડિયાના અંતિમ ટ્રેડિંગ દિવસે એટલે કે શુક્રવારે 1 kg ચાંદીનો ભાવ રૂ. 2,33,185 હતો, જે હવે રૂ. 11,175 જેટલો ઘટી ગયો છે.

સોનાના ભાવ પણ 1.50 ટકા તૂટ્યા
માત્ર ચાંદી જ નહીં, પરંતુ સોનાના ભાવમાં પણ ફ્યુચર્સ ટ્રેડમાં તીવ્ર ઘટાડો નોંધાયો છે. MCX ગોલ્ડ રેટ પર નજર કરીએ તો, માર્કેટ ઓપન થતાંની સાથે જ સોનામાં અંદાજે 1.50% નો ઘટાડો જોવા મળ્યો હતો. પાછલા ટ્રેડિંગ સેશનમાં 5 ઓગસ્ટની એક્સપાયરી ધરાવતું 10 ગ્રામ 24 કેરેટ સોનું ₹1,46,529 પર બંધ થયું હતું, જે બુધવારે ઘટીને ₹1,44,223 પ્રતિ 10 ગ્રામ થઈ ગયું હતું. આ ઘટાડા સાથે પીળી ધાતુ ખરીદનારાઓને પ્રતિ 10 gram એ રૂ. 2,306 નો સીધો ફાયદો મળ્યો છે. ગયા શુક્રવારે સોનું રૂ. 1,47,203 પર બંધ થયું હતું, જેની સરખામણીએ વર્તમાન ભાવ રૂ. 2,980 જેટલો સસ્તો થયો છે.

સ્થાનિક બજારોમાં પણ ખરીદીની સુવર્ણ તક
મલ્ટી કોમોડિટી એક્સચેન્જ (MCX) ના ફ્યુચર્સ ટ્રેડિંગની સાથે-સાથે દેશના વિવિધ શહેરોના સ્થાનિક હાજર બજાર (Spot Market) માં પણ સોના અને ચાંદીના ભાવ દરરોજ નીચે આવી રહ્યા છે. લગ્નસરાની સિઝન પૂર્વે જ બંને કિંમતી ધાતુઓ હવે તેમના ઓલ-ટાઇમ હાઇસ્તર કરતાં નોંધપાત્ર રીતે સસ્તા ભાવે ઉપલબ્ધ થતાં ગ્રાહકો અને જ્વેલર્સમાં ખરીદી માટે ભારે ઉત્સાહ જોવા મળી રહ્યો છે.