સોનાના વધતા ભાવો, ખરીદી કરવી કે રાહ જોવી?

છેલ્લા કેટલાક મહિનાઓથી સોનાના ભાવમાં સતત વધારો થઈ રહ્યો છે, જે રોકાણકારો અને ખરીદદારો બંને માટે ચર્ચાનો વિષય બન્યો છે. બેનિફિટ ન્યુઝ નેટવર્ક દ્વારા આ વિષય પર જવેલર્સ એસોસિએશનના પ્રમુખ જીગર સોની  સાથે એક મહત્વપૂર્ણ ચર્ચા કરવામાં આવી છે. ભારતમાં પણ સોનાની માંગ વધી રહી છે, અને વિશેષજ્ઞો મુજબ, 2025 ના અંત સુધીમાં સોનાનો ભાવ ₹95,000 પ્રતિ 10 ગ્રામ સુધી પહોંચી શકે છે તેવા અનુમાનો પણ લગાવવામાં આવી રહ્યા છે. તો ચાલો જાણીએ કે સોનાનો ભાવ શા માટે આટલો હાઈ જઈ રહ્યો છે.

વિશ્વ સ્તરે સોનાના ભાવ વધારો કેમ?

તમને જણાવી દઈએ કે, ટેરિફ યુદ્ધના કારણે વિશ્વભરના શેર બજારોમાં અસરો પડી છે, અને રોકાણકારો સુરક્ષિત વિકલ્પ તરીકે સોનામાં રોકાણ કરી રહ્યા છે. સેન્ટ્રલ બેંકો, મ્યુચ્યુઅલ ફંડ્સ, અને મોટા રોકાણકારો સોનાની ખરીદી વધારી રહ્યા છે. જેના કારણે સોનાનો ભાવ સતત ઉંચકાઈ રહ્યો છે. 

ભારતમાં સોનાની સ્થિતિ અને ભાવનો અંદાજ...

જીગર સોનીએ કહ્યું, ભારતમાં પણ સોનાની માગમાં સતત વધારો થઇ રહ્યો છે. અને વિશેષજ્ઞો મુજબ 2025 ના અંત સુધીમાં સોનાનો ભાવ રૂપિયા 95,000 પ્રતિ 10 ગ્રામ સુધી પહોંચી શકે છે. વધુમાં જાણવા મળ્યું છે કે, લોકો ફિઝિકલ ગોલ્ડ અને ETF ગોલ્ડમાં વધુ રોકાણ કરી રહ્યા છે. ગોલ્ડ બોન્ડ્સની લોકપ્રિયતા પણ વધી રહી છે. આ સમયે વધુ લોકો ખરીદી કરતાં રોકાણને મહત્વ આપી રહ્યા છે.

શું હાલમાં રોકાણ કરવું ફાયદાકારક છે?

જીગર સોનીએ કહ્યું, સોનામાં રોકાણ હંમેશા ફાયદાકારક રહે છે. ભાવ ઓછો થયો તો પણ લાંબા ગાળે તે ફરી વધી શકે છે અને તમને સારો નફો મળી શકે છે. જેમ કે નોટબંધીના સમયે જેમણે ₹60,000 ના ભાવે સોનું ખરીદ્યું હતું, આજે તેનો ભાવ ₹90,000 થયો છે. "સોનું કોઈપણ ભાવે લો, તે લાંબા ગાળે વધશે જ. જો તમે રોકાણ કરવા ઈચ્છો છો, તો હાલનો સમય યોગ્ય છે!"