હવે માલદીવમાં ભારતની UPI સેવા ઝડપથી થશે શરૂ, રાષ્ટ્રપતિ ડૉ. મુઇઝુએ લીધો નિર્ણય

માલદીવના રાષ્ટ્રપતિએ તેમના દેશમાં ભારતની UPI સેવા શરૂ કરવાનો નિર્ણય લીધો

માલદીવના રાષ્ટ્રપતિ મોહમ્મદ મુઈઝુએ માલદીવમાં ભારતની UPI સેવા શરૂ કરવા માટે જરૂરી પગલાં લેવાનો નિર્ણય કર્યો છે.

રાષ્ટ્રપતિ કાર્યાલય દ્વારા જારી કરવામાં આવેલા નિવેદનમાં કહેવામાં આવ્યું છે કે આ પગલાથી માલદીવની અર્થવ્યવસ્થાને ફાયદો થવાની આશા છે. માલદીવને ભારતની UPI સુવિધા સાથે વધુ સારા નાણાકીય વ્યવહારો અને ડિજિટલ ઈન્ફ્રાસ્ટ્રક્ચરમાં મદદ મળશે.

કેબિનેટની બેઠકમાં આર્થિક વિકાસ અને વેપાર મંત્રી દ્વારા રજૂ કરાયેલા પત્ર પર ઉંડાણપૂર્વક ચર્ચા કર્યા બાદ આ નિર્ણય લેવામાં આવ્યો છે.

"રાષ્ટ્રપતિ ડૉ. મુઇઝુએ માલદીવમાં UPI શરૂ કરવા માટે એક કન્સોર્ટિયમ બનાવવાનો નિર્ણય કર્યો છે," નિવેદનમાં જણાવાયું છે.

મુઇઝુએ સૂચન કર્યું કે દેશમાં કાર્યરત બેંકો, ટેલિકોમ કંપનીઓ, સરકારની માલિકીની કંપનીઓ અને ફિનટેક કંપનીઓને કન્સોર્ટિયમમાં સામેલ કરવી જોઈએ. તેમણે કન્સોર્ટિયમની મુખ્ય એજન્સી તરીકે ટ્રેડનેટ માલદીવ્સ કોર્પોરેશન લિમિટેડની પણ નિમણૂક કરી.

"તેમણે માલદીવમાં UPIના રોલઆઉટની દેખરેખ રાખવા માટે આર્થિક વિકાસ અને વેપાર મંત્રાલયની આગેવાની હેઠળ ઇન્ટર-એજન્સી કોઓર્ડિનેટિંગ ટીમ બનાવવાનું પણ નક્કી કર્યું," રાષ્ટ્રપતિ કાર્યાલયના એક નિવેદનમાં જણાવાયું હતું.

આ ટીમમાં નાણા મંત્રાલય, ગૃહ સુરક્ષા અને ટેકનોલોજી મંત્રાલય અને માલદીવ મોનેટરી ઓથોરિટી સામેલ હશે.

આ વર્ષે ઓગસ્ટમાં વિદેશ મંત્રી એસ. જયશંકરની મુલાકાત દરમિયાન, માલદીવ્સ અને ભારતે ટાપુ રાષ્ટ્રમાં UPI લાગુ કરવા માટે એક એમઓયુ પર હસ્તાક્ષર કર્યા હતા.

નેશનલ પેમેન્ટ્સ કોર્પોરેશન ઓફ ઈન્ડિયા દ્વારા સંચાલિત નાણાકીય ઈન્ટરફેસ પહેલાથી જ ભારતની બહાર અન્ય ઘણા દેશોમાં ઉપયોગમાં લેવાય છે. UPI નો ઉપયોગ UAE, શ્રીલંકા, ફ્રાન્સ, મલેશિયા, સિંગાપોર, નેપાળ, UK અને મોરેશિયસમાં થાય છે. તે જ સમયે, આ દેશોની યાદીમાં બહુ જલ્દી માલદીવનું નવું નામ જોડાવા જઈ રહ્યું છે.