ઈન્કમ ટેક્સે લગાવ્યો ઈન્ડિગો પર રૂ. 944 કરોડનો દંડ

દેશની સૌથી મોટી એરલાઈન ઈન્ડિગોએ ઈન્કમ ટેક્સ વિભાગ દ્વારા લગાવવામાં આવેલ રૂ. 944.20 કરોડના દંડને ખોટો ગણાવ્યો છે અને કહ્યું છે કે તે આ આદેશને કાયદાકીય રીતે પડકારશે. એરલાઇનની મૂળ કંપની ઇન્ટરગ્લોબ એવિએશનને શનિવારે આવકવેરા વિભાગ તરફથી પેનલ્ટી નોટિસ મળી હતી. રવિવારે એક નિયમનકારી ફાઇલિંગમાં, કંપનીએ કહ્યું કે આ દંડ મૂલ્યાંકન વર્ષ 2021-22 માટે છે.

કંપનીનું માનવું છે કે આ આદેશ કાયદા અનુસાર નથી. ઈન્ડિગોએ પણ આ ઓર્ડરને ખોટો ગણાવ્યો છે. ઈન્ડિગોએ ખાતરી આપી છે કે તે દંડ સામે કાયદાકીય પગલાં લેશે. ભારે દંડ હોવા છતાં, ઈન્ડિગોએ સ્પષ્ટતા કરી છે કે આ ઓર્ડરની તેની નાણાકીય, ઓપરેશનલ અથવા એકંદર બિઝનેસ પ્રવૃત્તિઓ પર કોઈ અસર થશે નહીં.

આ દંડ એવા સમયે લગાવવામાં આવ્યો છે જ્યારે ઈન્ડિગો પહેલાથી જ નાણાકીય પડકારોનો સામનો કરી રહી છે. નાણાકીય વર્ષ 2025 ના ત્રીજા ક્વાર્ટરમાં ઈન્ડિગોના ચોખ્ખા નફામાં 18.6 ટકાનો ઘટાડો થયો છે. આ સમયગાળા દરમિયાન, એરલાઈનની આવક એક વર્ષ અગાઉ 2,998.1 કરોડ રૂપિયાથી ઘટીને 2,448.8 કરોડ રૂપિયા થઈ ગઈ છે.

આ સિવાય ઓક્ટોબર-ડિસેમ્બર ક્વાર્ટરમાં કંપનીની ઓપરેશનલ કોસ્ટ 20 ટકા વધીને રૂ. 20,466 કરોડ થઈ છે, જેની અસર કંપનીના નફા પર જોવા મળી છે. DGCA ના માસિક પેસેન્જર ટ્રાફિક રિપોર્ટ અનુસાર, IndiGo 63.7 ટકા માર્કેટ શેર સાથે દેશની સૌથી મોટી એરલાઇન છે. ફેબ્રુઆરી 2025માં આ બજેટ એરલાઇનમાં 89.40 લાખ મુસાફરોએ ઉડાન ભરી હતી.

ઈન્ડિગો પછી એર ઈન્ડિયા ગ્રુપ આવે છે, જેમાં એર ઈન્ડિયા એક્સપ્રેસ પણ સામેલ છે. ફેબ્રુઆરીમાં, 38.30 લાખ મુસાફરોએ ટાટા ગ્રૂપની એરલાઇન્સમાં ઉડાન ભરી હતી, જે એરલાઇનનો બજાર હિસ્સો 27.3 ટકા પર લઈ ગયો હતો. અકાસા એર 6.59 લાખ મુસાફરોનું વહન કરે છે અને એરલાઇનનો બજાર હિસ્સો 4.7 ટકા હતો. સ્પાઇસજેટ 4.54 લાખ મુસાફરોને વહન કરે છે અને એરલાઇનનો બજાર હિસ્સો 3.2 ટકા હતો.