ગૌતમ અદાણીને અમેરિકી કોર્ટમાંથી મોટી રાહત
ન્યૂયોર્ક: અદાણી ગ્રુપના ચેરમેન અને અબજોપતિ ગૌતમ અદાણી માટે અમેરિકાથી મોટી કાનૂની રાહત મળી છે. અમેરિકી ફેડરલ જજ નિકોલસ ગેરોફિસે ગૌતમ અદાણી સામેના ફોજદારી કેસને ફગાવી દીધો છે. આ કેસમાં અદાણી સામે કથિત લાંચ અને છેતરપિંડીના આરોપો મૂકવામાં આવ્યા હતા. જોકે, કેસ બંધ કરતાં જજે અમેરિકી ન્યાય વિભાગની કાર્યવાહી અંગે ગંભીર ચિંતા પણ વ્યક્ત કરી છે.
2024થી ચાલી રહેલી કાનૂની લડાઈનો અંત
આ કેસ 2024માં શરૂ થયો હતો. અમેરિકી ફરિયાદીઓએ આરોપ મૂક્યો હતો કે અદાણી અને અન્ય આરોપીઓએ ભારતમાં સોલર એનર્જી પ્રોજેક્ટના કોન્ટ્રાક્ટ મેળવવા માટે ભારતીય અધિકારીઓને આશરે $265 મિલિયનની લાંચ આપવાની યોજના બનાવી હતી. સાથે જ અમેરિકી રોકાણકારોને કંપનીના ભ્રષ્ટાચાર વિરોધી રેકોર્ડ અંગે ગેરમાર્ગે દોરવાનો આરોપ પણ હતો.&nbsp;અદાણી ગ્રુપ અને ગૌતમ અદાણીએ આ આરોપોને સતત નકારી કાઢ્યા હતા. અદાણી પોતે આ ફોજદારી આરોપોમાં અમેરિકી કોર્ટમાં હાજર થયા નહોતા.
DOJએ કેમ કેસ પાછો ખેંચ્યો?
અમેરિકી ન્યાય વિભાગે કેસ સમાપ્ત કરવાની માંગ કરતા દલીલ કરી હતી કે મામલો મુખ્યત્વે વિદેશી પ્રવૃત્તિઓ સાથે જોડાયેલો છે, તેને સાબિત કરવો મુશ્કેલ છે અને તે વિભાગની વર્તમાન પ્રાથમિકતાઓ સાથે સુસંગત નથી. જજે અગાઉ DOJ પાસે આ નિર્ણય પાછળના કારણો અંગે વધુ વિગત માંગી હતી.&nbsp;કેસની કાર્યવાહી દરમિયાન અદાણીના અગાઉના $10 બિલિયનના અમેરિકી રોકાણના વચન અંગે પણ સવાલો ઉઠ્યા હતા. જોકે, DOJએ સ્પષ્ટ કર્યું હતું કે આ રોકાણ વચને કેસ પાછો ખેંચવાના નિર્ણયને પ્રભાવિત કર્યો નથી.
જજે DOJની રીત સામે વ્યક્ત કરી ચિંતા
જજ ગેરોફિસે કેસ ફગાવવાની મંજૂરી આપી, પરંતુ DOJના અધિકારી ટ્રેન્ટ મેકકોટરની કેસ સંભાળવાની રીત પર સવાલ ઉઠાવ્યા. જજના જણાવ્યા મુજબ, તપાસ કરનારા ફરિયાદીઓ અને એજન્સીઓના અધિકારીઓને પૂરતી રીતે સામેલ કર્યા વગર નિર્ણય લેવામાં આવ્યો હોવાની બાબત ચિંતાજનક છે. જોકે, જજે સ્પષ્ટ કર્યું કે કેસ ફગાવવાનો નિર્ણય મૂળ આરોપો સાચા હતા કે નહીં તેનો ચુકાદો નથી.
અદાણી ગ્રુપ માટે મોટી કાનૂની રાહત
ચુકાદા બાદ ગૌતમ અદાણીએ અમેરિકી કોર્ટના નિર્ણયનું સ્વાગત કર્યું અને ન્યાયિક પ્રક્રિયા પ્રત્યે પોતાનો વિશ્વાસ વ્યક્ત કર્યો.&nbsp;આ ચુકાદો અદાણી ગ્રુપ માટે મહત્વપૂર્ણ કાનૂની રાહત માનવામાં આવી રહ્યો છે. અમેરિકી ફોજદારી કેસનો અંત ગ્રુપની વૈશ્વિક બિઝનેસ છબી અને રોકાણકારોના વિશ્વાસ માટે પણ મહત્વપૂર્ણ બની શકે છે.

જજે DOJની કાર્યવાહી પર ઉઠાવ્યા સવાલ

August 11, 2026 | 15:41 IST