વાહનચાલકોને મોંઘવારીનો વધુ એક ઝટકો

CNG Prices Hike: ગુજરાતમાં વાહનચાલકોને મોંઘવારીનો વધુ એક આર્થિક ઝટકો લાગ્યો છે. અદાણી ટોટલ ગેસ બાદ હવે ગુજરાત ગેસ અને અદાણી દ્વારા CNGના ભાવમાં પ્રતિ કિલો ₹2 નો વધારો જાહેર કરવામાં આવ્યો છે. આ ભાવ વધારાના કારણે અમદાવાદ, મોરબી અને રાજ્યના અન્ય વિસ્તારોમાં CNG વાહનોની મુસાફરી થોડી મોંઘી બનશે. ગુજરાત ગેસનો ભાવ અગાઉ ₹83 આસપાસ હતો, જે હવે વધીને પ્રતિ કિલો ₹85.20 થઈ ગયો છે. બીજી તરફ, અદાણી ટોટલ ગેસ લિમિટેડ દ્વારા પણ ₹2 નો વધારો ઝીંકવામાં આવતા અમદાવાદ અને વડોદરા જેવા શહેરોમાં CNGનો નવો ભાવ વધીને ₹90.02 પ્રતિ કિલો પર પહોંચી ગયો છે.

અદાણી અને ગુજરાત ગેસના દરો વચ્ચે તફાવત
તાજેતરના ભાવવધારા બાદ પણ ગુજરાત ગેસનું CNG અદાણી ટોટલ ગેસની સરખામણીએ હજુ પણ સસ્તું છે. ગુજરાત ગેસનું CNG પ્રતિ કિલો ₹85.20 ના ભાવે ઉપલબ્ધ છે, જ્યારે અદાણીનું CNG પ્રતિ કિલો ₹90.02 ના ભાવે વેચાઈ રહ્યું છે. આ ઉપરાંત, રાજ્યના અન્ય શહેરોની વાત કરીએ તો નવસારીમાં CNGનો ભાવ ₹90.70, પોરબંદરમાં ₹89.51, ખેડામાં ₹89.11 અને સુરેન્દ્રનગરમાં ₹88.86 પ્રતિ કિલો આસપાસ ચાલી રહ્યો છે. અદાણી કંપની દ્વારા આ વર્ષે એટલે કે જાન્યુઆરી 2026 થી લઈને અત્યાર સુધીમાં પાંચમી વખત ભાવ વધારો કરવામાં આવ્યો છે, જેમાં અગાઉ 7 ફેબ્રુઆરી, 2 એપ્રિલ, 16 મે અને 27 મે 2026 ના રોજ પણ ભાવ વધારવામાં આવ્યા હતા.

મિડલ ઈસ્ટમાં તણાવ અને સતત ભાવવધારાનું કારણ
મિડલ ઈસ્ટમાં ફરીથી તણાવ શરૂ થવાની સીધી અસર ભારતમાં જોવા મળી રહી છે, જેના કારણે ઈંધણના ભાવમાં સતત ફેરફારો થઈ રહ્યા છે. પરિણામે અદાણી અને ગુજરાત ગેસ જેવી મુખ્ય કંપનીઓ દ્વારા CNGના ભાવમાં વારંવાર વધારો કરવામાં આવી રહ્યો છે. જાન્યુઆરી 2026 થી શરૂ થયેલી આ ભાવવધારાની સિલસિલો હજુ પણ યથાવત છે, જેના લીધે સામાન્ય નાગરિકો અને વાહનચાલકો માટે ઈંધણનો ખર્ચ દિવસેને દિવસે મોંઘો સાબિત થઈ રહ્યો છે.

વાહનચાલકો અને માસિક બજેટ પર આર્થિક ભારણ
CNGના ભાવમાં થયેલા આ સતત વધારાની સીધી અસર લાખો વાહનચાલકોના માસિક બજેટ પર પડી રહી છે. ખાસ કરીને રોજિંદા મુસાફરી કરતા કાર, ઓટો-રિક્ષા, ટેક્સી અને અન્ય કોમર્શિયલ વાહનચાલકોને હવે ઈંધણ પાછળ વધુ નાણાં ખર્ચવા પડી રહ્યા છે. અચાનક થયેલા આ વધારાને કારણે સામાન્ય નાગરિકોની ચિંતાઓમાં વધારો થયો છે, અને પરિવહન ક્ષેત્ર સાથે સંકળાયેલા લોકોનું માનવું છે કે જો આગામી સમયમાં ભાવ વધારો ચાલુ રહેશે તો મુસાફરીના ખર્ચ પર પણ વધુ નકારાત્મક અસર પડશે.