અમદાવાદમાં CNGના ભાવમાં વધારો, જનતા પર વધુ એક ભાર

અદાણી ટોટલ ગેસ લિમિટેડ (ATGL) દ્વારા અમદાવાદમાં કોમ્પ્રેસ્ડ નેચરલ ગેસ (CNG)ના ભાવમાં પ્રતિ કિલોએ ₹1.50નો તોતિંગ વધારો કરવામાં આવ્યો છે. નવા ભાવવધારા બાદ હવે અમદાવાદમાં સીએનજીનો છૂટક ભાવ ₹83.77 પ્રતિ કિલો થઈ ગયો છે. સીએનજીના ભાવમાં થયેલા વધારાની સીધી અસર અમદાવાદના હજારો ઓટો-રિક્ષા ચાલકો, સીએનજી ટેક્સી ઓપરેટરો અને મધ્યમ વર્ગના વાહનચાલકો પર પડશે.

1 એપ્રિલ 2026થી અન્ય આવશ્યક ચીજવસ્તુઓ અને ઇંધણના ભાવમાં વધારાનો ટ્રેન્ડ જોવા મળી રહ્યો છે, ત્યારે 2 એપ્રિલથી અમલી બનેલા આ વધારાએ વાહનચાલકોની કમર તોડી નાખી છે. વર્ષ 2026ની શરૂઆતમાં જાન્યુઆરીમાં ભાવમાં આંશિક ઘટાડો થયો હતો. પરંતુ ત્યારબાદ ટૂંકા ગાળામાં બે વખત ભાવ વધારી દેવામાં આવ્યા છે.

ચાર મહિનામાં CNGમાં બીજી વખત વધારો

અદાણી ટોટલ ગેસમાં 1 જાન્યુઆરી 2026ના રોજ ₹1.21નો ઘટાડો કરાયો હતો. જો કે, બાદમાં 7 ફેબ્રુઆરી 2026ના રોજ ₹0.50નો એટલે કે 50 પૈસાનો વધારો કરાયો હતો. ત્યારબાદ 2 એપ્રિલ 2026ના રોજ ₹1.50નો વધારો કરાયો છે. જાન્યુઆરીમાં મળેલી ₹1.21ની રાહત સામે અત્યાર સુધીમાં ₹2.00નો વધારો ઝીંકી દેવામાં આવ્યો છે.

છેલ્લા કેટલાક વર્ષોથી સીએનજીના ભાવ સતત ઉપર જઈ રહ્યા છે. વર્ષ 2025માં જ ચાર વખત ભાવ વધારો કરવામાં આવ્યો હતો, જેના કારણે કુલ ₹3.40નો વધારો થયો હતો. નીચે મુજબના સમયગાળામાં ભાવમાં ફેરફાર જોવા મળ્યા છે:

જુલાઈ 2023 થી ઓક્ટોબર 2023 વચ્ચે પાંચ વખત ₹0.15નો નજીવો વધારો કરાયો હતો. ફેબ્રુઆરી 2024 માં ₹1.00 અને ડિસેમ્બર 2024માં ₹0.22 વધારો કરાયો હતો. ત્યારબાદ જાન્યુઆરી 2025માં ₹1.50નો મોટો વધારો કરાયો હતો.

નાગરિકો ઉપર મોંઘવારીનો વધુ એક માર

નાગરિકો મોંઘવારીના મારનો સામનો કરી દૈનિક ખર્ચને સંતુલિત કરવાનો પ્રયાસ કરી રહ્યા છે. CNGનો ઉપયોગ મોટી સંખ્યામાં ઓટો-રિક્ષા, ટેક્સી અને ખાનગી વાહનોમાં થઈ રહ્યો છે. તેવા સમયે સામાન્ય માણસ માટે અદાણી ટોટલ ગેસનો નિર્ણય ફટકા સમાન છે.

1લી એપ્રિલથી ઇંધણ અને અન્ય આવશ્યક ચીજવસ્તુઓના ભાવ સતત વધી રહ્યા છે. જેના કારણે ગ્રાહકો પર વધારાનો બોજ પડી રહ્યો છે. તાજેતરમાં, ઈરાન યુદ્ધને કારણે દેશભરમાં કોમર્શિયલ સિલિન્ડરના ભાવમાં મોટો વધારો થયો હતો. આંતરરાષ્ટ્રીય ક્રૂડ ઓઇલના ભાવમાં વધારાથી કોમર્શિયલ LPGના ભાવ પર અસર પડી હતી. સરકારી તેલ કંપનીઓએ કોમર્શિયલ LPG સિલિન્ડરના ભાવમાં ₹195.50નો વધારો કર્યો છે.

પશ્ચિમ એશિયામાં ચાલી રહેલા યુદ્ધથી ઉદભવેલા સંકટની અસર ભારતમાં દેખાઈ રહી છે. અત્યાર સુધી સરકાર દાવો કરતી હતી કે, પરિસ્થિતિ નિયંત્રણમાં છે. પરંતુ કોમર્શિયલ LPG અને ઉડ્ડયન ઇંધણના ભાવમાં વધારાથી સ્પષ્ટ થઈ ગયું છે કે સમસ્યા હવે વધુ ઘેરી બની રહી છે. તેના કારણે સામાન્ય લોકો સૌથી વધુ પ્રભાવિત થશે. જો ઈરાન અને અમેરિકા-ઈઝરાયલ વચ્ચેનો સંઘર્ષ લાંબા સમય સુધી ચાલુ રહેશે તો પરિસ્થિતિ વધુ ખરાબ થવાની શક્યતા છે.