Surat : બારડોલી પાસે બાબલા નહેરમાં 2 યુવકો તણાયા, પરિવારમાં આક્રંદ!

બારડોલી નજીક આવેલી બાબલા નહેર ફરી એકવાર બે યુવાનો માટે કાળ બનીને આવી છે. ઉધનાના બે ગાઢ મિત્રો, જેઓ નહેર કિનારે પેશાબ કરવા ગયા હતા, તેઓના કરુણ મોતથી સમગ્ર પંથકમાં અને ખાસ કરીને તેમના પરિવારોમાં શોકનો માહોલ છવાઈ ગયો છે. આ ઘટનાએ નહેર કિનારે બેદરકારી અને સાવચેતીના અભાવનું ભયાવહ પરિણામ છતું કર્યું છે.

પ્રાપ્ત માહિતી અનુસાર, આ દુર્ઘટના બારડોલી પાસેની બાબલા નહેરમાં બની હતી. મોહંમદ વજુઉદ્દીન અને આકાશ દેવેન્દ્ર પટેલ નામના બે મિત્રો નહેર કિનારે પેશાબ કરવા માટે ઊભા હતા. તે જ સમયે, અચાનક એક મિત્રનો પગ લપસ્યો અને તે નહેરમાં ખાબક્યો. તેને બચાવવા માટે બીજો મિત્ર પણ નહેરમાં કૂદી પડ્યો, પરંતુ નહેરના પ્રવાહ અને પાણીની ઊંડાઈનો અંદાજ ન હોવાથી બંને મિત્રો પાણીમાં ગરકાવ થઈ ગયા.

ઘટનાની જાણ થતાં જ ફાયર બ્રિગેડ અને સ્થાનિક તરવૈયાઓની ટીમ દ્વારા તાત્કાલિક શોધખોળ શરૂ કરવામાં આવી હતી. આશરે 15 કલાકની અથાક શોધખોળ બાદ બીજા યુવકનો મૃતદેહ પણ મળી આવ્યો હતો. આ કરુણ ઘટનાથી ઉધનામાં રહેતા મોહંમદ વજુઉદ્દીન અને આકાશ દેવેન્દ્ર પટેલના પરિવારો પર આભ તૂટી પડ્યું છે. આશાસ્પદ યુવાનોના અકાળે અવસાનથી તેમના સ્વજનો અને મિત્રવર્તુળમાં ઊંડો શોક વ્યાપી ગયો છે.

આ પણ વાંચો : Ahmedabad : 10 જૂને પશ્ચિમના વિસ્તારોમાં મેગા પાણીકાપ, લાખો લોકોને હાલાકી!

આ ઘટનાએ ફરી એકવાર નહેરો, તળાવો કે પાણીના સ્ત્રોતો નજીક સાવચેતી રાખવાની અને કોઈપણ પ્રકારની બેદરકારી ટાળવાની જરૂરિયાત પર ભાર મૂક્યો છે. તંત્ર દ્વારા આવા જોખમી સ્થળોએ ચેતવણીના બોર્ડ લગાવવા અને સુરક્ષાના પગલાં ભરવા અનિવાર્ય બન્યા છે, જેથી ભવિષ્યમાં આવા કરુણ બનાવોને ટાળી શકાય.

આ પણ વાંચો : Rajkot : હનીટ્રેપમાં નવો વળાંક, સગીરાનો ચોંકાવનારો ખુલાસો, પોલીસ ભૂમિકા શંકાના દાયરામાં!