અમદાવાદ વિમાન દુર્ઘટનામાં મણિપુરની 2 યુવા કેબિન ક્રૂ સભ્યાઓનું દુઃખદ અવસાન

અમદાવાદ એરપોર્ટ પરથી ટેકઓફ થયાના થોડા સમય પછી જ ક્રેશ થયેલા એર ઈન્ડિયાના વિમાનમાં મણિપુરના 2 કેબિન ક્રૂ સભ્યો સવાર હતા. આ અકસ્માતમાં બંનેનું મૃત્યુ થયું. તેમની ઓળખ 20 વર્ષીય કોંગબારીલાટપમ નગાન્થોઈ શર્મા અને 26 વર્ષીય લામનુથેમ સિંગસન તરીકે થઈ છે. મણિપુરના ભૂતપૂર્વ મુખ્યમંત્રી એન બિરેન સિંહે સોશિયલ મીડિયા પ્લેટફોર્મ "X" પર પોસ્ટ કરીને આ બંનેના મૃત્યુની પુષ્ટિ કરી.

એન બિરેન સિંહે પોસ્ટમાં લખ્યું કે, "અમદાવાદમાં એર ઈન્ડિયાના વિમાન દુર્ઘટનામાં જીવ ગુમાવનારાઓમાં મણિપુરના 2 યુવાન કેબિન ક્રૂ સભ્યો, કોંગરાબૈલાટપમ નગાન્થોઈ શર્મા અને લામનુથેમ સિંગસનનો પણ સમાવેશ થાય છે તે જણાવતા ખૂબ જ દુઃખ થાય છે. બંને અત્યંત જીવંત અને સમર્પિત હતા. તેમનું અચાનક અવસાન તેમના પરિવારો, મિત્રો અને આપણા બધા માટે એક મોટું નુકસાન છે. તેમના આત્માને શાંતિ મળે અને તેમના પ્રિયજનોને આ અકલ્પનીય પીડાને દૂર કરવાની શક્તિ મળે."

મણિપુરના રાજ્યપાલ અજય કુમાર ભલ્લા અને ભૂતપૂર્વ મુખ્યમંત્રી બિરેન સિંહે વિમાન દુર્ઘટના પર શોક અને સંવેદના વ્યક્ત કરી છે. રાજભવને તેના X હેન્ડલ પર જણાવ્યું છે કે, "મણિપુરના રાજ્યપાલે અમદાવાદથી લંડન જતી ફ્લાઈટ દરમિયાન થયેલા વિમાન દુર્ઘટના પર ઊંડો શોક વ્યક્ત કર્યો છે. તેમણે આ દુર્ભાગ્યપૂર્ણ અકસ્માતમાં ઈજાગ્રસ્ત થયેલા તમામ લોકોના ઝડપી સ્વસ્થ થવા માટે ભગવાનને પ્રાર્થના કરી છે."

કોંગબારીલાટપમ નગાન્થોઈ શર્મા મણિપુરના થૌબલ જિલ્લાના હતા અને મૈતેઈ સમુદાયના હતા, જ્યારે લામનુન્થેમ સિંગસન જે થાડૌ જાતિના હતા અને કાંગપોકપી જિલ્લાના હતા.

કોંગબારીલાત્પમ નગાન્થોઈ શર્માના એક સંબંધીએ ઈંફાલમાં જણાવ્યું હતું કે, વિમાન દુર્ઘટના વિશે સાંભળ્યા પછી તેમણે તેમને ઘણી વાર ફોન કર્યો હતો પરંતુ કોઈ પણ ફોન રિસીવ થયો ન હતો. "તેનો મોબાઇલ ફોન ચાલુ હતો અને સતત રિંગ વાગી રહી હતી. ટેકઓફ પહેલાં તેમનો છેલ્લો સંદેશ હતો કે, હું લંડન જઈ રહી છું. અમે થોડીવારમાં ઉડાન ભરીશું. ત્યારબાદ અમે વાત કરી શકીશું નહીં,"

પરિવારે જણાવ્યું હતું કે, નગન્થોઈ શર્માને 3 વર્ષ પહેલાં ઈંફાલમાં ભરતી અભિયાન દરમિયાન એર ઈન્ડિયા દ્વારા પસંદ કરવામાં આવી હતી, જ્યારે તે ગ્રેજ્યુએશનનો અભ્યાસ કરી રહી હતી. પસંદગી પછી, તેણીને મુંબઈમાં પોસ્ટ કરવામાં આવી હતી.