મતદાન કરવા જતા લોકોને નડ્યો અકસ્માત, બે લોકોના મોત

આજે ગુજરાતની 8000થી વધુ ગ્રામ પંચાયતોમાં ચૂંટણી યોજાઈ રહી છે. સવારથી જ શાંતિપૂર્ણ માહોલમાં લોકો મતદાન કરવા પહોંચી રહ્યા છે. આ દરમિયાન જિલ્લામાં મતદાન કરવા જઇ રહેલા લોકોને અકસ્માત નડ્યો છે.

અમદાવાદથી દાહોદ મતદાન કરવા જઇ રહેલા લોકોની કાર સંતરામપુર બાયપાસ નજીક ટ્રેલર સાથે અથડાઇ હતી. જેમાં બે લોકોના ઘટના સ્થળે જ મોત નીપજ્યા હતા અને 13 લોકો ઇજાગ્રસ્ત થયા છે. ઘટનાની જાણ સંતરામપુર પોલીસને થતાં તેઓ તાત્કાલિક ઘટના સ્થળે દોડી આવ્યા હતા અને આગળની તપાસ હાથ ધરી છે. 

વધુ વિગતો મુજબ, કારમાં સવાર તમામ લોકો દાહોદના ઝાલોદના વજીલા અને દાદગઢ ગામના વતની હતા. તેઓ ગ્રામ પંચાયતની ચૂંટણી માટે મતદાન કરવા જઇ રહ્યા હતા તે જ સમયે તેમને અકસ્માત નડ્યો હતો. આ અકસ્માતમાં બે લોકોના મોત થયા છે. જ્યારે 13થી વધુ ઇજાગ્રસ્તોને સંતરામપુર જનરલ હોસ્પિટલ લઇ જવામાં આવ્યા છે.