SMC અરજી ન સાંભળતા હવે સ્થાનિકો હાઈકોર્ટના શરણે

સુરતના ડભોલી રોડ પર આવેલી ઓમકાર સોસાયટી, વખારીયા વાડીના રહીશોએ સુરત મ્યુનિસિપલ કોર્પોરેશન (SMC) સામે ગંભીર આરોપો સાથે ગુજરાત હાઈકોર્ટમાં ધા નાખી છે. ઓમકાર સોસાયટીના અઢાર સભ્યોએ તેમના એડવોકેટ નિમિષ એમ. કાપડિયા અને ઋષભ કાપડિયા મારફત સ્પેશિયલ સિવિલ એપ્લિકેશન નં. 9877/2025 દાખલ કરીને મનપાના અધિકારીઓની બેદરકારી અને ગેરકાયદે બાંધકામોને પ્રોત્સાહન આપવા બદલ આકરા સવાલો ઉઠાવ્યા છે.

ગેરકાયદે કોમર્શિયલ બાંધકામો અને રહીશોની વ્યથા

વર્ષ 2005 માં રહેઠાણ માટેના લેઆઉટ પ્લાન સાથે મંજૂર થયેલી ઓમકાર સોસાયટીના પ્લોટ નં. 33 ના માલિક જયેન્દ્રભાઈ સવાણી અને પ્લોટ નં. 2 ના માલિક ભાવિકાબેન નરેશભાઈ ગઢીયાએ ગેરકાયદેસર રીતે કોમર્શિયલ પ્રકારનું બાંધકામ કર્યું હોવાનો આરોપ અરજદારોએ લગાવ્યો છે. આટલું જ નહીં, તાજેતરમાં પ્લોટ નં. 32 ના માલિકો ગંભીરસિંહ અને ભગીરથસિંહ ખેરાડીયાએ પણ આવું જ ગેરકાયદે બાંધકામ શરૂ કર્યું છે.

અરજદારોએ જણાવ્યું કે, પ્લોટ નં. 33 ના ગેરકાયદે બાંધકામ અંગે તેમણે વારંવાર રજૂઆતો કરી હતી. SMC એ બાંધકામ દૂર કરવા અને વધુ થતું અટકાવવા માટે હુકમો પણ કર્યા હતા, તેમ છતાં પ્લોટ નં. 33 ના માલિકે પોતાનું બાંધકામ પૂર્ણ કરી દીધું.

મનપાના અધિકારીઓની નિષ્ફળતા અને માહિતી છુપાવવાનો આરોપ

આ મામલે અરજદારો અને તેમના પરિવારના સભ્યોએ કોર્પોરેશનમાં વારંવાર લેખિત ફરિયાદો કરી હતી, પરંતુ મ્યુનિસિપલ કમિશનર, ઝોનલ ઓફિસર અને અન્ય સંબંધિત અધિકારીઓ પોતાની ફરજ બજાવવામાં સંપૂર્ણપણે નિષ્ફળ રહ્યા હતા. આ ત્રણ પ્લોટ અંગે થયેલી કાયદેસર કાર્યવાહીના કાગળો માહિતી અધિકાર કાયદા હેઠળ કાર્યપાલક ઇજનેર, કતારગામ પાસે માંગવામાં આવ્યા હોવા છતાં, તેમણે માહિતી આપવાનો ઇનકાર કર્યો હતો. અરજદારોએ સ્પષ્ટપણે જણાવ્યું છે કે આ અધિકારીઓએ ગેરકાયદેસર બાંધકામ કરનારાઓને પ્રોત્સાહન મળે તે રીતે વર્તન કર્યું છે. કોઈ પણ લેખિત રજૂઆતો અને વકીલશ્રીની લીગલ નોટિસનો પણ અધિકારીઓએ જવાબ આપ્યો નથી.

હાઈકોર્ટની લાલ આંખ અને કારણદર્શક નોટિસ

પાડોશી તરીકે અરજદારોને અધિકાર છે કે, તેમના પાડોશીઓ ગેરકાયદેસર બાંધકામ કરે તો તેને દૂર કરાવવાનો તેમનો અધિકાર છે. સદર કેસમાં SMC તરફથી વકીલ કૌશલ પંડયા હાજર થયા અને કોર્ટમાં નિવેદન કર્યું કે, જો ગેરકાયદેસર બાંધકામ જણાશે તો ભલે નામદાર હાઈકોર્ટમાં રિટ પિટિશન પેન્ડિંગ હોય તો પણ કોર્પોરેશન કાયદેસર કાર્યવાહી કરી શકશે.

આ સંજોગોમાં,  હાઈકોર્ટના જસ્ટિસ મૌન ભટ્ટ સાહેબની કોર્ટે સુરતના મ્યુનિસિપલ કમિશનર, કાર્યપાલક ઇજનેર અને ઉત્તર ઝોન કતારગામના ઝોનલ ઓફિસર, વધારાના સીટી એન્જિનિયર ઉત્તર ઝોન કતારગામ તથા ઉપરોક્ત ચાર ગેરકાયદેસર બાંધકામ કરનારા વ્યક્તિઓ વિરુદ્ધ કારણદર્શક નોટિસ જારી કરી છે. કેસની વધુ સુનાવણી 01.09.2025 ના રોજ રાખવામાં આવી છે.

આ ઘટના સુરત મનપાના અધિકારીઓની કાર્યશૈલી અને જવાબદારી પર ગંભીર પ્રશ્નાર્થ ઊભા કરે છે. હાઈકોર્ટના આદેશ બાદ હવે મનપા આ મામલે શું કાર્યવાહી કરે છે તે જોવું રહ્યું.