અમરેલીમાં 8 વર્ષના બાળકની આંખમાંથી 30 જીવતી જૂ મળી, તબીબો પણ થયા અચંબિત

અમરેલીના સાવરકુંડલામાં 1 અત્યંત દુર્લભ અને ચોંકાવનારી તબીબી ઘટના સામે આવી છે. અહીં 8 વર્ષના બાળકની આંખની પાંપણોમાંથી 30 જેટલી જીવતી જૂ તથા 35 જેટલા ઈંડા સર્જરી દ્વારા દૂર કરવામાં આવ્યા છે, જેના કારણે તબીબી જગતમાં ચકચાર મચી છે.

બાળકને સતત આંખમાં ખંજવાળ, અગવડતા અને લાલાશ થતી હતી, જેના પગલે તેને લલ્લુભાઈ શેઠ આરોગ્ય કેન્દ્ર લઈ જવામાં આવ્યો હતો. ડૉ. મૃગાંક પટેલ અને તેમની ટીમે તપાસ કરી ત્યારે જીવતી જૂની હાજરીથી તબીબો પણ ચકિત થઈ ગયા હતા.

જટિલ સર્જરી દ્વારા આખરે બાળકની આંખમાંથી 30 જૂ અને 35 ઈંડા સફળતાપૂર્વક દૂર કરવામાં આવ્યા હતા. તબીબોએ આ ઘટનાને ગંભીર ગણાવી અને વધુ તપાસ માટે દસ્તાવેજો બનાવી રહ્યા છે.

આ સ્થિતિનું તબીબી નામ પેડિક્યુલોસિસ પાલ્પેબ્રારમ (Pediculosis Palpebrarum) છે. સામાન્ય રીતે, જૂ માથાના વાળમાં જોવા મળે છે, પરંતુ પાંપણોમાં મળવી દુર્લભ છે. એવું માનવામાં આવે છે કે ઘણીવાર પ્યુબિક લાઈસ શરીરના અન્ય ભાગોમાંથી સંપર્ક દ્વારા આંખ સુધી આવી શકે છે, જ્યારે કદાચ હેડ લાઈસ પણ સ્થાનીય રીતે અહીં પહોંચે છે.

આ લક્ષણોમાં મુખ્યત્વે આંખમાં ખંજવાળ, બળતરા, લાલાશ, પાણી આવવું અને પાંપણો પર સફેદ ઇંડાઓનો દેખાવ થાય છે. તબીબો માટે આ કિસ્સો હવે તબીબી સંશોધનનો વિષય બન્યો છે, અને પીડિત બાળકની હાલત હાલ સંપૂર્ણપણે સ્થિર છે.