Rajkot-Bhavnagar હાઈવે પર કાળનો પંજો, સરકારી અધિકારી સહિત બેના કરુણ મોત!

રાજકોટ-ભાવનગર હાઈવે ફરી એકવાર લોહીયાળ બન્યો છે. ગત મોડી રાત્રે બનેલી એક હૃદયદ્રાવક ઘટનામાં મહીકા ગામ નજીક વિઠ્ઠલવાવ ગૌશાળા પાસે એક ગોઝારા અકસ્માતમાં રાજકોટ માર્ગ અને મકાન વિભાગ (R&B) ના કાર્યપાલક ઈજનેર ચંપક પટેલ અને કોન્ટ્રેક્ટ ડ્રાઈવર જાવેદ પઢિયારના ઘટનાસ્થળે જ કરુણ મોત નિપજ્યા છે. આ અકસ્માત એટલો ભયાનક હતો કે કાર ડિવાઈડર તોડીને સીધી 10 ફૂટ ઊંડા નાળામાં ખાબકી હતી, જે કાયદો અને વ્યવસ્થાની સાથે સાથે માર્ગ સલામતી પર પણ ગંભીર સવાલો ઉભા કરે છે.

પ્રાથમિક વિગતો મુજબ, ભાવનગર ખાતે સરકારી કામગીરી પૂર્ણ કરી રાજકોટ પરત ફરી રહેલી બોલેરો કાર વિઠ્ઠલવાવ પાસેની ગોળાઈમાં અચાનક કાબુ ગુમાવી બેઠી હતી. કારે ડિવાઈડર તોડીને નાળામાં પટકાવતા તેનો કચ્ચરઘાણ નીકળી ગયો હતો.

મૃતકોની ઓળખમાં, ચંપક પટેલ (ઉં.વ. 55) છેલ્લા 3 વર્ષથી R&B વિભાગમાં કાર્યપાલક ઈજનેર તરીકે ફરજ બજાવતા હતા. જ્યારે, જાવેદભાઈ પઢિયાર (ઉં.વ. 34) છેલ્લા 15 વર્ષથી કોન્ટ્રેક્ટ બેઝ પર ડ્રાઈવર તરીકે વિભાગ સાથે સંકળાયેલા હતા. આ અકસ્માતમાં બંનેના ઘટનાસ્થળે જ શ્વાસ થંભી જતાં પરિવારજનો અને સરકારી વર્તુળોમાં શોકનો માહોલ છવાઈ ગયો છે.ચંપક પટેલ અને જાવેદ પઢિયારના બાળકોએ પોતાના પિતા ગુમાવ્યા છે, જેના કારણે બંને પરિવારોમાં ગમગીનીનો માહોલ છે.

આ પણ વાંચો : Surat માં બેફામ ગુનેગારો, કાયદો વ્યવસ્થા તળિયે, જાહેરમાં ત્રણ રાઉન્ડ ફાયરિંગ!

સ્થાનિક રાહદારીએ અકસ્માતની જાણ પોલીસને કરતા, પોલીસ કાફલો તાત્કાલિક ઘટના સ્થળે દોડી ગયો હતો. પોલીસે મૃતદેહોને પોસ્ટમોર્ટમ અર્થે ખસેડી વધુ તપાસ હાથ ધરી છે. આ અકસ્માત પાછળ માર્ગની ખામી, ઓવરસ્પીડ કે ડ્રાઈવરની બેદરકારી જવાબદાર છે તે દિશામાં પોલીસે તપાસ શરૂ કરી છે. પરંતુ, આ ઘટના ફરી એકવાર ગુજરાતના માર્ગોની સલામતી અને રાત્રિના સમયે ડ્રાઈવિંગની સાવચેતી અંગે ગંભીર ચિંતા જગાવે છે. આવા જીવલેણ અકસ્માતો અટકાવવા માટે તંત્ર ક્યારે જાગૃત થશે તે એક મોટો પ્રશ્ન છે.

આ પણ વાંચો : Surat માં હૃદયદ્રાવક ઘટના: રજા પર આવેલા આર્મી જવાનનું પાંચમા માળેથી પટકાતા કરુણ મોત!