સૌરાષ્ટ્રમાં મેઘમહેર: જોડિયામાં 7 ઈંચ વરસાદ, ખેડૂતોમાં ખુશીનો માહોલ

સૌરાષ્ટ્રમાં રવિવારે (22મી જૂન) વાદળછાયા વાતાવરણ વચ્ચે ગરમી અને બફારા બાદ વરસાદનું આગમન થયું હતું, જેનાથી વાતાવરણમાં ઠંડક પ્રસરી ગઈ હતી. આ મેઘમહેરમાં સૌથી વધુ જામનગરના જોડિયામાં સાંબેલાધાર 7 ઈંચ વરસાદ નોંધાયો હતો, જેના કારણે સર્વત્ર જળબંબાકારની સ્થિતિ સર્જાઈ હતી. આ ઉપરાંત, કાલાવડ, કેશોદ અને ઘેડ પંથકમાં પાંચ ઈંચ, જ્યારે પડધરી, મેંદરડા, માણાવદર અને કુતિયાણામાં ધોધમાર ચાર ઈંચ મેઘકૃપા વરસી હતી. આ વરસાદથી ખેડૂતોમાં આનંદનો માહોલ છવાઈ ગયો છે.

જામનગર જિલ્લામાં ભારે વરસાદ

જામનગર શહેરમાં રવિવારે બપોરના ત્રણ વાગ્યાથી ધીમી ધારે છાંટા શરૂ થયા હતા, જે રાત્રે 8 વાગ્યા સુધીમાં બે ઈંચ વરસાદમાં પરિવર્તિત થયા હતા. કાલાવડ પંથકમાં રાત્રે 8 વાગ્યા સુધીમાં પાંચ ઈંચ વરસાદ પડ્યો હતો, જેના કારણે નદી-નાળાઓમાં પૂર જેવી સ્થિતિ સર્જાઈ હતી. જોડિયામાં બપોરે 4 વાગ્યાથી રાત્રે 8 વાગ્યા સુધીમાં સૌથી વધુ 7 ઈંચ મુશળધાર વરસાદ તૂટી પડ્યો હતો. આ સિવાય જામજોધપુરમાં 2.5 ઈંચ, લાલપુરમાં 2 ઈંચ, અને ધ્રોલમાં અડધો ઈંચ વરસાદ નોંધાયો હતો.

પોરબંદર અને જૂનાગઢ જિલ્લામાં ચોમાસાનો પ્રારંભ

પોરબંદર જિલ્લામાં પણ અંતે ચોમાસું સક્રિય થયું હોય તેમ રવિવારે દિવસભર વરસાદ વરસ્યો હતો. પોરબંદર શહેર અને તેની આસપાસના વિસ્તારમાં મોડી સાંજ સુધીમાં દોઢ ઈંચ વરસાદ નોંધાયો હતો. જોકે, સૌથી વધુ વરસાદ માધવપુર ઘેડ અને તેની આજુબાજુના ઘેડ પંથકમાં 5 ઈંચ જેટલો નોંધાયો છે. દરિયાઈ પટ્ટી પર 4થી 5 ઈંચ વરસાદ વરસતા અનેક ખેતરો પાણીમાં ગરકાવ થઈ ગયા હતા. કુતિયાણા અને તેની આજુબાજુના વિસ્તારમાં 4 ઈંચ વરસાદ વરસ્યો હતો, જ્યારે રાણાવાવ, આદિત્યાણા અને બરડા ડુંગરમાં પણ 2 ઈંચથી વધુ વરસાદ પડ્યો હતો.

જૂનાગઢ જિલ્લામાં પણ 1થી 5 ઈંચ સુધી વરસાદ નોંધાયો. સૌથી વધુ કેશોદમાં 5 ઈંચ વરસાદના કારણે ઉતાવળી નદીમાં પૂર આવ્યું હતું. મેંદરડામાં પણ 4 ઈંચ ધોધમાર મેઘકૃપા વરસી હતી. જૂનાગઢ શહેરમાં 2 ઈંચ, માણાવદરમાં 2 ઈંચ, વંથલીમાં અઢી ઈંચ, વિસાવદરમાં 2 ઈંચ, માંગરોળમાં 2 ઈંચ, માળિયામાં 2.5 ઈંચ, અને ભેંસાણમાં 1 ઈંચ વરસાદ વરસ્યો હતો. ગિરનાર પર સિઝનનો પ્રથમવાર 3 ઈંચ વરસાદ પડતા પર્વત પરથી ઝરણાંઓ વહેતા થયા હતા.

રાજકોટ, મોરબી, દેવભૂમિ દ્વારકા, ગીર સોમનાથ અને અમરેલીમાં પણ વરસાદ

સૌરાષ્ટ્રના અન્ય વિસ્તારોની વાત કરીએ તો, રાજકોટ જિલ્લામાં સૌથી વધુ પડધરીમાં ધોધમાર 4 ઈંચ અને જેતપુરમાં 3 ઈંચ વરસાદથી જળબંબાકાર થયો હતો. ધોરાજીમાં 2.5 ઈંચ, ઉપલેટામાં 2 ઈંચ, તથા રાજકોટ, ગોંડલ અને જામકંડોરણામાં અડધો ઈંચ વરસાદ નોંધાયો હતો. મોરબી જિલ્લામાં વાંકાનેરમાં 1 ઈંચ વરસાદ પડ્યો હતો. દેવભૂમિ દ્વારકા જિલ્લામાં ભાણવડમાં 1 ઈંચ અને ખંભાળિયામાં અડધો ઈંચ વરસાદ નોંધાયો. ગીર સોમનાથ જિલ્લામાં તાલાલા, વેરાવળ અને ગીરગઢડામાં અડધો ઈંચ વરસાદ વરસ્યો હતો. અંતે, અમરેલી જિલ્લામાં વડિયામાં 1.5 ઈંચ, અમરેલી, બગસરા અને બાબરામાં 1 ઈંચ, જ્યારે ધારી, લીલીયા, લાઠી અને સાવરકુંડલામાં અડધો ઈંચ વરસાદ નોંધાયો હતો.