આગામી 72 કલાકે ગુજરાતમાં મેઘરાજા ધમરોળશે

ગુજરાત પર હાલ એક મજબૂત સિસ્ટમ સક્રિય થઈ છે જેના કારણે આગામી 48 કલાક ગુજરાત માટે ખૂબ જ ભારે સાબિત થઈ શકે છે. હવામાન વિભાગે દક્ષિણ ગુજરાત, સૌરાષ્ટ્ર અને મધ્ય ગુજરાતના કેટલાક જિલ્લાઓમાં ભારેથી અતિભારે વરસાદનું એલર્ટ આપ્યું છે. બંગાળની ખાડીમાં સર્જાયેલા બે લો પ્રેશર એરિયા અને અરબ સાગરમાં સક્રિય થયેલા સાયક્લોનિક સર્ક્યુલેશનના કારણે રાજ્યમાં મુશળધાર વરસાદની શક્યતા છે.

આજે સોમવારે જૂનાગઢ, પોરબંદર, નવસારી, તાપી, ડાંગ અને વલસાડમાં ઓરેન્જ એલર્ટ સાથે અતિભારે વરસાદની આગાહી કરવામાં આવી છે. આ ઉપરાંત, ગીર-સોમનાથ, અમરેલી, ભાવનગર, દ્વારકા, જામનગર, રાજકોટ, બોટાદ, મોરબી, કચ્છ, બનાસકાંઠા, પાટણ, મહેસાણા, સાબરકાંઠા, અરવલ્લી, વડોદરા, છોટાઉદેપુર, ભરૂચ, નર્મદા અને સુરતમાં યલો એલર્ટ સાથે ગાજવીજ સાથે ભારે વરસાદની સંભાવના છે.

મંગળવારે વરસાદનું જોર વધુ વધશે. દ્વારકા, પોરબંદર, નવસારી અને વલસાડમાં અત્યંત ભારે વરસાદની આગાહી છે. આ ઉપરાંત, રાજકોટ, જૂનાગઢ, ગીર-સોમનાથ, અમરેલી, ભાવનગર, ભરૂચ, સુરત, તાપી અને ડાંગમાં અતિભારે વરસાદ વરસી શકે છે. રાજ્યના બાકીના તમામ જિલ્લાઓમાં પણ ભારે વરસાદની શક્યતા છે.

બુધવારે પણ મેઘમહેર યથાવત રહેશે. અમરેલી, ભાવનગર, નવસારી અને વલસાડમાં ગાજવીજ સાથે અત્યંત ભારે વરસાદની આગાહી છે. જ્યારે દ્વારકા, પોરબંદર, જૂનાગઢ, ગીર-સોમનાથ, રાજકોટ, ભરૂચ, સુરત, તાપી અને ડાંગમાં ઓરેન્જ એલર્ટ સાથે અતિભારે વરસાદની સંભાવના છે.

હવામાન વિભાગે જણાવ્યું છે કે, ગુજરાતમાં 19 અને 20 ઓગસ્ટ માટે રેડ એલર્ટ જાહેર કરવામાં આવ્યું છે, એટલે કે આ સમયગાળામાં કોઈ કોઈ જગ્યાએ 8 ઇંચથી પણ વધુ વરસાદ ખાબકી શકે છે. આ વરસાદી સિસ્ટમ ઓગસ્ટ મહિનાના અંત સુધી સક્રિય રહી શકે છે.

અમદાવાદ અને ગાંધીનગરમાં 20 અને 21 ઓગસ્ટ સુધીમાં ભારે વરસાદ પડવાની શકયતાઓ રહેલી છે. અંબાજી પગપાળા જતા યાત્રીઓને પણ વરસાદ નડી શકે છે. ગણેશચતુર્થીમાં અને પર્યુષણના સમયમાં પણ વરસાદી ઝાપટા પડી શકે છે.