દિવાળીએ માવઠું? ગુજરાતમાં 6 દિવસ વરસાદની આગાહી!

ગુજરાતમાંથી નૈઋત્યનું ચોમાસું ભલે વિદાય લઈ ચૂક્યું હોય, પરંતુ હવામાન વિભાગ (IMD) દ્વારા રાજ્યમાં આગામી છ દિવસ સુધી હળવાથી સામાન્ય વરસાદનું જોર યથાવત્ રહેવાની આગાહી કરવામાં આવી છે. હાલમાં પૂર્વના પવનો ફૂંકાઈ રહ્યા છે, જેના કારણે ખાસ કરીને દક્ષિણ ગુજરાત અને સૌરાષ્ટ્રના દરિયાકાંઠાના ભાગોમાં મેઘમહેર જોવા મળી શકે છે.

ક્યાં-ક્યાં પડશે વરસાદ?

હવામાન વિભાગના જણાવ્યા અનુસાર, આગામી છ દિવસ દરમિયાન દક્ષિણ ગુજરાત અને સૌરાષ્ટ્રના દરિયાકાંઠાના વિસ્તારોમાં છૂટાછવાયા સ્થળો પર ગાજવીજ સાથે હળવાથી સામાન્ય વરસાદ પડી શકે છે.

16 અને 17 ઓક્ટોબર: દક્ષિણ ગુજરાતમાં તાપી, નવસારી, ડાંગ, વલસાડમાં વરસાદની સંભાવના છે. 17 ઓક્ટોબરે સૌરાષ્ટ્રમાં ભાવનગર, અમરેલી અને ગીર સોમનાથમાં પણ વરસાદ વરસી શકે છે.

18 ઓક્ટોબર: અમરેલી, ગીર સોમનાથ, ડાંગ, નવસારી, વલસાડમાં વરસાદની શક્યતા છે.

19થી 21 ઓક્ટોબર: ગીર સોમનાથ, ડાંગ, નવસારી, વલસાડમાં વરસાદનું જોર રહેવાની સંભાવના છે.

બાકીના તમામ વિસ્તારોમાં વાતાવરણ શુષ્ક રહેવાની આગાહી છે. હવામાન વિભાગે તાપમાન અંગે જણાવ્યું છે કે આગામી સાત દિવસ દરમિયાન મહત્તમ તાપમાનમાં કોઈ મોટો ફેરફાર નહીં થાય, પરંતુ લઘુત્તમ તાપમાન 24 કલાક બાદ ધીરે ધીરે બેથી ત્રણ ડિગ્રી વધવાની સંભાવના છે.

આ ઉપરાંત, અરબી સમુદ્રમાં એક નવી સિસ્ટમ સક્રિય થઈ છે, જે આગામી સપ્તાહમાં લો પ્રેશર એરિયામાં ફેરવાશે. આ સિસ્ટમના પગલે ગુજરાત નહીં પણ કેરળ, તમિલનાડુ અને પુડુચેરીમાં આગામી સાત દિવસમાં ભારેથી અતિ ભારે વરસાદની આગાહી કરવામાં આવી છે, જેના કારણે દક્ષિણ ભારતમાં સ્થિતિ ગંભીર બની શકે છે.