એર ઇન્ડિયા ક્રેશ: 31 DNA મેચ થયા, 13 મૃતદેહ સોંપાયા

12 જૂન, 2025 ના રોજ અમદાવાદથી લંડન જઈ રહેલી એર ઈન્ડિયાની ફ્લાઈટ AI171 ના દર્દનાક ક્રેશને આજે ત્રણ દિવસ વિતી ચૂક્યા છે. આ ભયાવહ દુર્ઘટનામાં મૃત્યુ પામેલા લોકોના મૃતદેહની ઓળખ પ્રક્રિયા અમદાવાદ સિવિલ હોસ્પિટલમાં યુદ્ધના ધોરણે ચાલી રહી છે.

DNA સેમ્પલિંગ અને ઓળખ પ્રક્રિયા: સિવિલ હોસ્પિટલમાં સતત બીજા દિવસે મૃતકો અને તેમના પરિવારજનોના DNA સેમ્પલિંગની કાર્યવાહી ચાલુ રહી હતી. હોસ્પિટલના એડિશનલ સુપ્રિટેન્ડેન્ટ ડૉ. રજનીશ પટેલે આ અંગે માહિતી આપતા જણાવ્યું કે, શનિવારે રાત્રે 10 વાગ્યા સુધીમાં ત્રણ પરિવારોને મૃતદેહ સોંપી દેવામાં આવ્યા હતા. જ્યારે આજે સવારે 9 વાગ્યા સુધીમાં વધુ 9 મૃતદેહ મળી કુલ 13 મૃતદેહ પરિવારોને સોંપવામાં આવ્યા છે. શનિવાર સુધીમાં કુલ 248 લોકોના DNA સેમ્પલનું વેરિફિકેશન થઈ ચૂક્યું છે, જેમાંથી 31 લોકોના DNA મેચ થયા છે. જોકે, પૂર્વ મુખ્યમંત્રી વિજય રૂપાણીના DNA મેચનો કોઈ રિપોર્ટ હજુ સુધી આવ્યો નથી.

શનિવારથી અત્યાર સુધીમાં મૃતદેહો સોંપાયા

શનિવાર:
-પૂર્ણિમા પટેલ
-બાબુ હિરપરા
-વિમલ હિરપરા

ગત રાત્રિથી મૃતદેહ સોંપાયા

-શુભાષચંદ્ર અમીન
-કલ્પના પ્રજાપતિ
-દિનેશ પટેલ
-કૃષ્ણ પટેલ
-દશરથ પટેલ
-દહીગોરી પટેલ
-ખુશ્બુ રાજપુરોહિત
-કૈલાશ પટેલ
-જયા ગજ્જર
-અંજુ શર્મા

મૃતદેહોને વતન પહોંચાડવા ખાસ વ્યવસ્થા

આ દુર્ઘટનામાં ગુજરાતના અલગ અલગ 18 જિલ્લાના મૃતકોનો સમાવેશ થાય છે. તેમના મૃતદેહોને વતનમાં સુરક્ષિત રીતે પહોંચાડવા માટે કુલ 230 ટીમો બનાવવામાં આવી છે, જે પોલીસ એસ્કોર્ટ સાથે મૃતદેહોને તેમના નિવાસસ્થાન સુધી પહોંચાડશે.

ઈજાગ્રસ્તોની સ્થિતિ

 પ્લેન ક્રેશ દુર્ઘટનામાં મેસમાં અને આસપાસના વિસ્તારમાં હાજર 32 લોકો ઈજાગ્રસ્ત થયા હતા. તેમાંથી 8 લોકોની હાલ સારવાર ચાલી રહી છે, જેમાં એકની હાલત ગંભીર હોવાનું જાણવા મળ્યું છે. અન્ય ઈજાગ્રસ્તોને સારવાર બાદ રજા આપી દેવામાં આવી છે.

ખુશ્બુ રાજપુરોહિતનો મૃતદેહ રાજસ્થાન લઈ જવાશે

આ દુર્ઘટનામાં રાજસ્થાનના જોધપુરની રહેવાસી ખુશ્બુ રાજપુરોહિત નામની યુવતીનું પણ મૃત્યુ થયું હતું. તેના પરિવારજનો મૃતદેહ લેવા માટે અમદાવાદ પહોંચી ગયા છે. ખુશ્બુના પિતા તેને અમદાવાદ મૂકવા આવ્યા હતા અને રાજસ્થાન પરત ફરતી વખતે જ તેમને પ્લેન ક્રેશની જાણ થઈ હતી. DNA સેમ્પલ મેચ થયા બાદ ખુશ્બુનો મૃતદેહ આજે રાજસ્થાન ખાતે લઈ જવામાં આવશે.

અમદાવાદ સિવિલ હોસ્પિટલના એડિશનલ સુપરિન્ટેન્ડેન્ટ ડૉ. રજનીશ પટેલે સત્તાવાર માહિતી આપતા જણાવ્યું કે, અત્યાર સુધીમાં 31 મૃતકોના DNA મેચ થયા છે. આ પૈકી, ગઈકાલે 3 અને આજે 10 મળીને કુલ 13 મૃતદેહો તેમના સ્વજનોને સોંપવામાં આવ્યા છે. બાકીના 31 સ્વજનોને પણ જાણ કરવામાં આવી છે અને સિવિલ હોસ્પિટલમાંથી ફોન આવ્યા બાદ જ તેમણે મૃતદેહ લેવા માટે આવવાનું રહેશે.

 

પરિવારજનોને ડેઝિગ્નેટેડ નંબર પરથી આવતા ફોન કોલને જ ધ્યાનમાં લેવા અપીલ

પરિજનોને વિનંતી છે કે, તેઓ ફક્ત અમદાવાદ સિવિલ હોસ્પિટલના ડેઝિગ્નેટેડ નંબર પરથી અધિકૃત વ્યક્તિ દ્વારા કરવામાં આવેલા ફોન કોલને જ ધ્યાને લે. આ કોલમાં જ DNA મેચ થયાની અને પાર્થિવ દેહ લેવા આવવાની જાણ કરવામાં આવશે.અમદાવાદ સિવિલ હોસ્પિટલ દ્વારા જાહેર કરાયેલા અધિકૃત નંબરો નીચે મુજબ છે, જેનો ઉપયોગ પરિજનોનો સંપર્ક કરવા માટે કરવામાં આવી રહ્યો છે: 9429915911, 9429916096, 9429916118, 9429916378, 9429916608, 9429916622, 9429916682, 9429916758, 9429916771, 9429916875.