બનાસકાંઠા જિલ્લા પંચાયત, 14 તાલુકા પંચાયત, 5 નગરપાલિકાની પ્રાથમિક મતદાર યાદી અટવાઈ

બનાસકાંઠા જિલ્લા પંચાયત, બનાસકાંઠાની 14 તાલુકા પંચાયત અને 5 નગરપાલિકાની પ્રાથમિક મતદાર યાદી પ્રસિદ્ધ કરવામાં આવી નથી. નખત્રાણા, વાઘોડિયા, ટંકારા, ઈડર, સોજીત્રા, બોરસદ નગરપાલિકા તેમજ બનાસકાંઠા જિલ્લા પંચાયત અને 14 તાલુકા પંચાયતોમાં સીમાંકન અને અન્ય કામગીરી પેન્ડીંગ હોવાથી પ્રાથમિક મતદાર યાદી પ્રસિદ્ધ થઈ શકી નહી હોવાનું રાજ્ય ચૂંટણી આયોગના સૂત્રો દ્વારા જાણવા મળ્યુ છે. જ્યારે 73 નગરપાલિકા, ખેડા જિલ્લા પંચાયત અને 3 તાલુકા પંચાયતોની પ્રાથમિક મતદાર યાદી પ્રસિદ્ધ કરીને 8 જાન્યુઆરી સુધી વાંધા અરજીઓ મંગાવવામાં આવી છે.

રાજ્ય ચૂંટણી આયોગ દ્વારા 19 ડિસેમ્બરે 73 નગરપાલિકા, જૂનાગઢ મહાનગરપાલિકા અને ખેડા જિલ્લાની 2 તાલુકા પંચાયત તેમજ ગાંધીનગર તાલુકા પંચાયતની પ્રાથમિક મતદાર યાદી પ્રસિદ્ધ કરવામાં આવી છે. આ ઉપરાંત નગરપાલિકાની 16 બેઠકોની પેટા ચૂંટણી માટેની પ્રાથમિક મતદાર યાદી પ્રસિદ્ધ કરવામાં આવી છે. પ્રાથમિક મતદાર યાદી અંગે કોઈપણ નાગરિકને વાંધો હોય તો 8 જાન્યુઆરી સુધી વાંધા અરજીઓ સ્વીકારવામાં આવશે. ત્યારબાદ આખરી મતદાર યાદી પ્રસિદ્ધ કરવામાં આવશે.

સીમાંકન તેમજ અન્ય કામગીરી પેન્ડિંગ હોવાના કારણે રાજ્ય ચૂંટણી આયોગે નખત્રાણા, વાઘોડિયા, ટંકારા, ઈડર, સોજીત્રા, બોરસદ નગરપાલિકા તેમજ બનાસકાંઠા જિલ્લા પંચાયત અને 14 તાલુકા પંચાયતોની પ્રાથમિક મતદાર યાદી પ્રસિદ્ધ કરી નથી. સ્થાનિક સ્વરાજની સંસ્થાઓની ચૂંટણીની તૈયારીના ભાગરૂપે અગાઉ 12 ડિસેમ્બરના રોજ પ્રાથમિક મતદાર યાદી પ્રસિદ્ધ થવાની હતી. પરંતુ વહીવટી કારણોસર એક પ્રાથમિક મતદાર પ્રસિદ્ધિમાં એક સપ્તાહનો વિલંબ થયો હતો. જ્યારે ગ્રામ પંચાયતોની ચૂંટણી માટેની મતદાર યાદી બે સપ્તાહ સુધી લંબાય તેવું સૂત્રો દ્વારા જાણવા મળ્યુ છે.

ખેડા અને બનાસકાંઠા જિલ્લા પંચાયત, 79 નગરપાલિકા, 17 તાલુકા પંચાયત તેમજ 539 વિભાજન બાદ અસ્તિત્વમાં આવેલી નવી ગ્રામ પંચાયતો સહિત 3 વર્ષથી પેન્ડીંગ રહેલી 4765 ગ્રામ પંચાયતોની ચૂંટણીનું આયોજન કરાયુ છે. આ ઉપરાંત સભ્યોના રાજીનામા કે મૃત્યુના કારણે ખાલી પડેલી સ્થાનિક સ્વરાજની સંસ્થાઓની બેઠકોની પેટા ચૂંટણી થનાર છે. 

રાજ્યમાં આ વખતે પ્રથમ વખત 27 ટકા ઓબીસી અનામત સાથે સ્થાનિક સ્વરાજની સંસ્થાઓની ચૂંટણી યોજાશે. અનુસૂચિત જાતિ માટે 7 ટકા, અનુસૂચિત જનજાતિ માટે 14 ટકા અને જનરલ માટે 52 ટકા અનામત બેઠકો સાથે ચૂંટણી યોજાશે. સ્થાનિક સ્વરાજની સંસ્થાઓમાં ઓબીસીને 10 ટકા અનામત અપાતી હતી. સુપ્રિમકોર્ટના નિર્દેશ અનુસાર 27 ટકા અનામત નહી અપાતા વિવિધ સંગઠનો દ્વારા રજૂઆત કરવામાં આવી હતી. તેના પગલે રાજ્ય સરકારે નિવૃત ન્યાયાધીશ કે.એસ.ઝવેરીના અધ્યક્ષ સ્થાને સ્થાનિક સ્વરાજની સંસ્થાઓમાં ઓબીસી અનામતની બેઠકો નક્કી કરવા સમર્પિત આયોગની રચના કરી હતી. સમર્પિત આયોગના રિપોર્ટ બાદ રાજ્ય સરકારે ઓબીસીની 27 ટકા અનામત બેઠકો સાથે સ્થાનિક સ્વરાજની સંસ્થાઓની ચૂંટણી કરવાનો નિર્ણય કર્યો છે.