ગર્લ્સ હોસ્ટેલ સામેનો વીડિયો વાયરલ, પછી નિરમા યુનિવર્સિટીમાં ‘બ્લેક ડે’; શું છે આખો મામલો?

Nirma University Hostel Controversy: અમદાવાદની નિરમા યુનિવર્સિટીમાં ગર્લ્સ હોસ્ટેલ સામે કથિત અશ્લીલ હરકતનો વીડિયો વાયરલ થયા બાદ વિવાદ વકર્યો છે. H-4 ગર્લ્સ હોસ્ટેલની વિદ્યાર્થિનીઓ દ્વારા રેકોર્ડ કરવામાં આવ્યો હોવાનો દાવો કરાતા આ વીડિયોને લઈને વિદ્યાર્થીઓમાં નારાજગી જોવા મળી રહી છે. મામલો હવે પોલીસ સુધી પહોંચ્યો છે અને સોલા પોલીસે અજાણ્યા વ્યક્તિની ઓળખ કરવા તપાસ શરૂ કરી છે. H-5 બ્લોકની કન્સ્ટ્રક્શન સાઇટ પર કામ કરતા લોકોની પણ પૂછપરછ કરવામાં આવી રહી છે. 1 ઓક્ટોબરે નિરમા યુનિવર્સિટી કેમ્પસમાં મોટી સંખ્યામાં વિદ્યાર્થીઓ કાળા કપડાં પહેરીને વિરોધ માટે પહોંચ્યા હતા. વિદ્યાર્થીઓએ પ્લેકાર્ડ સાથે વિરોધ નોંધાવીને ‘બ્લેક ડે’ મનાવ્યો હતો. ગર્લ્સ હોસ્ટેલમાં વિદ્યાર્થિનીઓની સુરક્ષા, ફરિયાદો પર કાર્યવાહી અને કેમ્પસમાં સુરક્ષા વ્યવસ્થાને લઈને વિદ્યાર્થીઓએ સવાલ ઉઠાવ્યા હતા.

ગર્લ્સ હોસ્ટેલ સામે કથિત અશ્લીલ હરકતનો વીડિયો વાયરલ
વિદ્યાર્થીઓના જણાવ્યા મુજબ, H-4 ગર્લ્સ હોસ્ટેલમાંથી H-5 બ્લોકની આસપાસની કથિત ઘટનાનો વીડિયો રેકોર્ડ કરવામાં આવ્યો હતો. નવા બની રહેલા H-5 બિલ્ડિંગની નજીક એક વ્યક્તિ કથિત રીતે અશ્લીલ હરકત કરતો હોવાનો વીડિયો સામે આવ્યો હતો. વીડિયો સોશિયલ મીડિયા અને વિદ્યાર્થી જૂથોમાં વાયરલ થયા બાદ મામલો ચર્ચામાં આવ્યો હતો.

પોલીસે શરૂ કરી તપાસ
મામલો સામે આવ્યા બાદ નિરમા યુનિવર્સિટીના મુખ્ય સુરક્ષા અધિકારીએ સોલા પોલીસ સ્ટેશનમાં અજાણ્યા વ્યક્તિ સામે ફરિયાદ નોંધાવી હોવાનું અહેવાલોમાં જણાવાયું છે. પોલીસે વાયરલ વીડિયોની હકીકત ચકાસવા અને તેમાં દેખાતા વ્યક્તિની ઓળખ કરવા તપાસ શરૂ કરી છે. કન્સ્ટ્રક્શન સાઇટ પર તે સમયે હાજર રહેલા કામદારો અંગે પણ માહિતી એકત્ર કરવામાં આવી રહી છે.

વિદ્યાર્થીઓએ સુરક્ષાને લઈને ઉઠાવ્યા સવાલ
વિદ્યાર્થીઓનો આક્ષેપ છે કે ગર્લ્સ હોસ્ટેલમાં રહેતી વિદ્યાર્થિનીઓની સુરક્ષાને લઈને વધુ સઘન વ્યવસ્થા જરૂરી છે. કેટલાક વિદ્યાર્થીઓએ ફરિયાદ બાદ કરવામાં આવેલી કાર્યવાહી અંગે પણ સવાલ ઉઠાવ્યા છે. અહેવાલો મુજબ, હોસ્ટેલની આસપાસ સુરક્ષા વ્યવસ્થાને લઈને વિદ્યાર્થીઓએ વાંધો વ્યક્ત કર્યો છે. આ મુદ્દે વિદ્યાર્થી સંગઠન NSUIએ પણ તપાસ અને સુરક્ષા વ્યવસ્થાની સમીક્ષાની માંગ કરી છે.

સોશિયલ મીડિયા પર શરૂ થયું અભિયાન
ઘટના બાદ વિદ્યાર્થીઓએ સોશિયલ મીડિયા મારફતે મુદ્દો ઉઠાવવાનું શરૂ કર્યું હતું. 1 ઓક્ટોબરે કાળા કપડાં પહેરીને કેમ્પસમાં વિરોધ કરવાની અપીલ કરવામાં આવી હતી. ત્યારબાદ વિદ્યાર્થીઓ પ્લેકાર્ડ સાથે કેમ્પસમાં પહોંચ્યા અને ગર્લ્સ હોસ્ટેલની સુરક્ષા તથા ફરિયાદો અંગે પોતાની નારાજગી વ્યક્ત કરી હતી. હાલ પોલીસ વાયરલ વીડિયો, ઘટનાસ્થળ, કન્સ્ટ્રક્શન સાઇટ પર હાજર લોકો અને અન્ય પુરાવાના આધારે તપાસ કરી રહી છે. વીડિયો સાચો છે કે નહીં અને તેમાં દેખાતી વ્યક્તિની ઓળખ પોલીસ તપાસ પૂર્ણ થયા બાદ જ સમગ્ર ઘટનાની હકીકત અને જવાબદારી અંગે વધુ સ્પષ્ટતા થઈ શકશે.