NEET UG-2025 પરિણામ જાહેર: ટોપ ટેનમાં ગુજરાતના બે વિદ્યાર્થીએ સ્થાન મેળવ્યું

નેશનલ ટેસ્ટિંગ એજન્સી (NTA)એ શનિવારે NEET UG-2025નું પરિણામ જાહેર કર્યુ છે. જેમાં ગુજરાતના બે વિદ્યાર્થીએ ટોપ ટેનમાં સ્થાન મેળવ્યું છે. અમદાવાદના જેનીલ ભાયાણીએ છઠ્ઠો અને ભવ્ય ઝાએ આઠમો રેન્ક મેળવી ગુજરાતનું ગૌરવ વધાર્યુ છે. હનુમાનગઢના રહેવાસી મહેશકુમારે 720 માંથી 686 ગુણ સાથે પ્રથમ રેન્ક મેળવ્યો છે. છેલ્લા ત્રણ વર્ષથી સીકરની સંસ્થામાં તૈયારી કરી રહ્યો હતો. જ્યારે ઇન્દોરના ઉત્કર્ષ અવધિયાએ બીજો ક્રમ મેળવ્યો છે.

ટોપ ટેનમાં આવેલા વિદ્યાર્થીઓ

રેન્ક 1: મહેશ કુમાર, 99.9999547 પર્સન્ટાઇલ, રાજસ્થાન

રેન્ક 2: ઉત્કર્ષ અવધિયા, 99.9999095 પર્સન્ટાઈલ, મધ્ય પ્રદેશ

રેન્ક 3: કૃષાંગ જોશી, 99.9998189 પર્સેન્ટાઇલ, મહારાષ્ટ્ર

રેન્ક 4: મૃણાલ કિશોર ઝા, 99.9998189 પર્સન્ટાઈલ, દિલ્હી

રેન્ક 5: અવિકા અગ્રવાલ, 99.9996832 પર્સન્ટાઈલ, દિલ્હી

રેન્ક 6: જેનીલ વિનોદભાઈ ભાયાણી, 99.9996832 પર્સન્ટાઈલ, ગુજરાત

રેન્ક 7: કેશવ મિત્તલ, 99.9996832 પર્સન્ટાઈલ, પંજાબ

રેન્ક 8: ઝા ભવ્ય ચિરાગ, 99.9996379 પર્સન્ટાઈલ, અમદાવાદ, ગુજરાત

રેન્ક 9: હર્ષ કેદાવત, 99.9995474 પર્સેન્ટાઇલ, દિલ્હી

રેન્ક 10: આરવ અગ્રવાલ, 99.9995474 પર્સેન્ટાઇલ, મહારાષ્ટ્ર

કોટામાં અભ્યાસ કરતાં ત્રણ વિદ્યાર્થીઓ ટોપ ટેનમાં

નેશનલ ટેસ્ટિંગ એજન્સીએ જણાવ્યું હતું કે, આ વર્ષે 12.36 લાખ ઉમેદવારો ક્વોલિફાય થયા છે. દિલ્હીની અવિકા અગ્રવાલે મહિલા ગૃપમાં પાંચમો ક્રમ મેળવ્યો છે. રાજસ્થાનના કોટામાં અભ્યાસ કરતા ત્રણ વિદ્યાર્થીઓએ ટોપ ટેનમાં સ્થાન મેળવ્યું છે. દિલ્હીનો મૃણાલ કિશોર ઝા, ચોથો ક્રમ, ચંદીગઢનો કેશવ મિત્તલ, સાતમો ક્રમ અને અમદાવાદનો ભવ્ય ઝા, આઠમો ક્રમ મેળવનાર રાજસ્થાનના કોટામાં અભ્યાસ કરતા હતા.

ફાઈનલ આન્સર કી સવારે જાહેર કરાઈ

પરીક્ષાની ફાઈનલ આન્સર કી શનિવારે સવારે જાહેર કરવામાં આવી હતી. તેમાં 1 પ્રશ્નનો જવાબ બદલાઈ ગયો છે. બુકલેટ 45ની પ્રોવિઝનલ આન્સર કીમાં પ્રશ્ન નંબર 40 માટે સાચો વિકલ્પ 2 હતો. અંતિમ આન્સર કી માં બંને વિકલ્પો 1, 2 સાચા દર્શાવવામાં આવ્યા છે. બુકલેટ 46માં પ્રશ્ન નંબર 14 માટે સાચો જવાબ 1 થી 1, 4 કરવામાં આવ્યો છે. તેવી જ રીતે બુકલેટ 47માં પ્રશ્ન નંબર 20 માટે સાચો વિકલ્પ 3 થી 2, 3 કરવામાં આવ્યો છે. જ્યારે બુકલેટ 48માં પ્રશ્ન નંબર 15 માટે સાચો વિકલ્પ 4 થી 3, 4 કરવામાં આવ્યો છે.

દેશમાં MBBS કોર્સ માટે કુલ 1.18 લાખ બેઠકો

ભારતમાં MBBS કોર્સ માટે કુલ 1,18,190 બેઠકો છે. તેમાંથી 1,15,250 બેઠકો વર્ષ 2024-25ના શૈક્ષણિક સત્ર દરમિયાન ભરાઈ ગઈ છે. મેડિકલ કાઉન્સેલિંગ કમિટી (MCC) 15 ટકા ઓલ ઈન્ડિયા ક્વોટા હેઠળ MBBS અને BDS બેઠકો માટે કાઉન્સેલિંગ પ્રક્રિયા હાથ ધરશે. NEET UG સ્કોરના આધારે મેડિકલ કાઉન્સેલિંગ કમિટી (MCC) MBBS, BDS અને અન્ય મેડિકલ UG અભ્યાસક્રમોમાં પ્રવેશ માટે NEET UG કાઉન્સેલિંગ-2025 કરશે. MCC 15 ટકા ઓલ ઈન્ડિયા ક્વોટા (AIQ) માટે કાઉન્સેલિંગ કરશે. જ્યારે 85 ટકા બેઠકો રાજ્ય કાઉન્સેલિંગ દ્વારા ભરવામાં આવશે.

કાઉન્સેલિંગ ફોર્મ ભરતી વખતે MBBS અને BDS બંને માટે સમાન રીતે પ્રવેશ મેળવવો પડશે. પસંદગી કરતી વખતે પ્રાથમિકતા નક્કી કરવી પડશે. સ્ટેટ કાઉન્ટ રાઉન્ડ-1 ઓલ ઈન્ડિયા ક્વોટા (AIQ) રાઉન્ડ-1 પછી શરૂ થશે. પહેલા AIQમાં પસંદગી ન થાય તો રાજ્ય કાઉન્સેલિંગમાં પસંદગી થઈ શકશે. તેવી જ રીતે બીજા, ત્રીજા અને ચોથા રાઉન્ડ માટે તારીખ વગેરેની માહિતી NMC અને રાજ્ય સરકારની કાઉન્સેલિંગ સંસ્થાના નોટિફિકેશનમાં ઉપલબ્ધ કરાવવામાં આવશે.

મેડિકલ એડમિશન એક્ઝિક્યુટિવ રિયા શર્માએ જણાવ્યું હતું કે, આ વર્ષે સરકારી કોલેજોમાં MBBSમાં પ્રવેશ માટેનો સામાન્ય કટ ઓફ 660 થી 670 અને અન્ય અનામત કેટેગરીઓ માટે 590 થી 600 રહેવાની ધારણા છે. BDS માટે કટ ઓફ સામાન્ય કેટેગરી માટે 500+ અને અન્ય અનામત કેટેગરીઓ માટે 450+ રહેવાની શક્યતા છે. ઘણા ઉમેદવારોને સારી અને ઓછી ફી ધરાવતી સરકારી કોલેજોમાં પ્રવેશ મળતો નથી. તેવી સ્થિતિમાં ઉમેદવારો અન્ય દેશોમાં MBBS કરવાનો વિકલ્પ પસંદ કરે છે. ઘણા દેશો એવા છે જ્યાં તબીબી શિક્ષણ અને હોસ્ટેલનો ખર્ચ કોઈપણ ખાનગી ભારતીય કોલેજ કરતા ઘણો ઓછો હોય છે.

ઉલ્લેખનીય છે કે, NEET-UG પરીક્ષા 4 મે ના રોજ બપોરે 2 થી સાંજે 5 વાગ્યા સુધી દેશના 5 હજારથી વધુ કેન્દ્રો પર યોજાઈ હતી. આ પરીક્ષા પાસ કરનારા વિદ્યાર્થીઓને મેડિકલ કોલેજોમાં MBBS અભ્યાસક્રમોમાં સીધો પ્રવેશ મળશે. NEET UG માટે 22.7 લાખથી વધુ ઉમેદવારો નોંધાયા હતા. 13.76 લાખ વિદ્યાર્થીઓ અને 9.98 લાખ વિદ્યાર્થીનીઓએ નોંધણી કરાવી હતી. 20.8 લાખ વિદ્યાર્થીઓએ પરીક્ષા આપી હતી.

75 વિદ્યાર્થીના પરિણામ જાહેર કરાયા નથી

ઇન્દોર કેન્દ્રો પર NEET UG પરીક્ષા આપનારા 75 ઉમેદવારોએ ફરિયાદ કરી હતી. તેઓએ જણાવ્યું હતું  કે, 4 મેના રોજ તોફાન અને વીજળી ગુલ થવાન કારણે તેમનું પેપર બગડ્યું હતું. મધ્યપ્રદેશ હાઇકોર્ટની ઇન્દોર બેન્ચમાં દાખલ કરાયેલી અરજીઓની સુનાવણી 9 જૂને કરવામાં આવી હતી. કોર્ટે કહ્યું હતું કે NTA 75 ઉમેદવાર સિવાયનાં બધાનાં પરિણામો જાહેર કરી શકે છે. આ 75 વિદ્યાર્થીનાં પરિણામ પછીથી જાહેર કરવામાં આવશે. ત્યારબાદ NEET UG-2025નું અંતિમ મેરિટ બનાવવામાં આવશે.