મેળા વેલફેર એસોસિએશન સરકાર સામે મેદાને, લોકમેળા બંધ કરવાની ચિમકી

 ઓલ ગુજરાત મેળા વેલફેર એસોસિએશન દ્વારા આજે પત્રકાર પરિષદનું આયોજન કરીને સરકાર સામે ખુલ્લો રણઘોષ કર્યો છે. એસોસિએશને સ્પષ્ટ શબ્દોમાં કહ્યું છે કે સરકાર દ્વારા અમલમાં મુકવામાં આવેલી SOP (સ્ટાન્ડર્ડ ઓપરેટિંગ પ્રોસિજર) અને અન્ય નિયમો કાર્યક્ષમ અને વ્યાવહારિક નથી, જેનાથી આખું મેળા ઉદ્યોગ ઘૂંટણિયે આવી ગયું છે.

એસોસિએશનના પ્રતિનિધિઓએ જણાવ્યું કે ફાઉન્ડેશન માટે જે ખર્ચ થાય છે તે પ્રાઇવેટ મેળા ઓર્ગેનાઈઝર્સ માટે પોસાય તેટલો નથી. તેમજ સરકાર રાઈડ્સ માટે બિલ અને ઓપરેટર લાયસન્સની માંગ કરી રહી છે, જ્યારે મોટાભાગની રાઈડ્સ એસેમ્બલ પ્રકારની હોય છે અને લાયસન્સ મેળવી શકાતું જ નથી.

એસોસિએશનના નેતાઓએ ચિમકી આપી છે કે જો સરકાર SOPમાં જરૂરી ફેરફાર નહીં કરે તો ગુજરાતના તમામ જાહેર અને ખાનગી મેળાઓ બંધ કરી દેવામાં આવશે. હાલમાં એસોસિએશનમાં રાજ્યભરના 400થી વધુ સભ્યો જોડાયેલા છે અને તમામના લાભ માટે આ મુદ્દે એકજ મુદ્રામાં વાત થઈ રહી છે.

મેળા ઉદ્યોગના પ્રતિનિધિઓનું કહેવું છે કે, "અમે અનેક વખત લેખિત અને મૌખિક રીતે રજૂઆત કરી પરંતુ કોઈ સમાધાન આવ્યું નથી. રાજકોટના મેળાઓ હાલ મુશ્કેલીમાં છે અને જો રાજકીય નેતૃત્વનો અભાવ રહેશે તો આખું ગુજરાત આવા દિવસો જોઈ શકે છે."

• ફાઉન્ડેશનના ખર્ચમાં છૂટછાટ આપવામાં આવે
• રાઈડ્સ ઓપરેટર લાયસન્સની શરતોમાં શિથિલતા લાવવામાં આવે
• રાઈડ્સના બિલની ફરજ ટાળવી

આ પણ વાંચો--- વડોદરામાં સમસ્યાથી ઘેરાયેલા લોકોએ કોર્પોરેટરોનો ઘેરાવ કર્યો