Jamnagar માં મેઘરાજાની મહેર: ડેમ છલકાયા, નીચાણવાળા વિસ્તારોમાં એલર્ટ

જામનગર જિલ્લા અને તાલુકાના ગ્રામ્ય તેમજ શહેરી વિસ્તારોમાં ગાજવીજ સાથે ધોધમાર વરસાદે ધમાકેદાર એન્ટ્રી કરી છે. રાત્રિના 8 વાગ્યા સુધીમાં જિલ્લામાં પોણા ઇંચથી લઈને સાડા 6 ઇંચ સુધીનો વરસાદ નોંધાયો છે. ખાસ કરીને જામનગર અને કાલાવડ પંથકમાં ભારે વરસાદના કારણે વાણીયા વાગડીયા ડેમ 100 ટકા ભરાઈ ગયો છે, જેના પરિણામે ડેમ ઓવરફ્લો થયો છે. સિંચાઈ વિભાગે નીચાણવાળા ગામડાઓ જેવા કે વાગડીયા, વાણિયા, મોટી ભલસાણ અને સૂમરી ભલસાણના ગ્રામજનોને ડેમના વ્હેણવાળા વિસ્તારોમાં અવરજવર ન કરવા અને સાવચેત રહેવા અપીલ કરી છે.   જળાશયોમાં નવા નીરની આવક   જામનગર જિલ્લામાં મેઘરાજાએ મન મૂકીને વરસાદ વરસાવ્યો, જેના લીધે જિલ્લાના અનેક જળાશયોમાં નવા નીરની આવક થઈ છે. જામનગર શહેરનો જીવાદોરી સમાન રણજીતસાગર ડેમ પણ ઝડપથી ભરાઈ રહ્યો છે. હાલમાં રણજીતસાગર ડેમની સપાટી 24 ફૂટે પહોંચી છે, જ્યારે તેની કુલ ક્ષમતા સાડા 27 ફૂટ છે. આમ, ડેમ હજુ સાડા ત્રણ ફૂટ ખાલી છે, પરંતુ સતત પાણીની આવકને ધ્યાને રાખીને જામનગર મહાનગરપાલિકાએ શહેરના નીચાણવાળા વોર્ડ નંબર 2, 4, 10, 11, 12 અને 16 તેમજ અન્ય લો-લાયિંગ વિસ્તારોના રહેવાસીઓને સાવચેત રહેવા અને નદીના પટમાં અવરજવર ન કરવા સૂચના આપી છે.

• જોડિયા: સૌથી વધુ સાડા 6 ઇંચ વરસાદ નોંધાયો, જેમાં ચારથી આઠ વાગ્યાના ગાળામાં 6 ઇંચ વરસાદ ખાબક્યો. તાલુકા મથક પાણીથી ઘેરાયું.
• કાલાવડ: પોણા 5 ઇંચ વરસાદ નોંધાયો.
• જામજોધપુર: અઢી ઇંચ વરસાદ.
• જામનગર: પોણા 2 ઇંચ વરસાદ.
• લાલપુર: પોણા 2 ઇંચ વરસાદ.
• ધ્રોલ: પોણો ઇંચ વરસાદ.

ભારે વરસાદ અને ડેમ ઓવરફ્લો થવાની સ્થિતિને ધ્યાને રાખીને જામનગર જિલ્લા વહીવટી તંત્ર અને મહાનગરપાલિકા દ્વારા નીચાણવાળા વિસ્તારોમાં રહેતા લોકોને સતર્ક રહેવા જણાવાયું છે. ખાસ કરીને નદીના કિનારે અથવા ડેમના પાણીના વહેણવાળા વિસ્તારોમાં જવાનું ટાળવા સૂચના આપવામાં આવી છે. વહીવટી તંત્ર દ્વારા સતત દેખરેખ રાખવામાં આવી રહી છે, જેથી કોઈ અનિચ્છનીય ઘટના ન બને.   આ વરસાદે જામનગર જિલ્લાને ખેતી અને પીવાના પાણીની દૃષ્ટિએ રાહત આપી છે, પરંતુ સાથે સાથે સાવચેતીની પણ જરૂર છે. ગ્રામજનો અને શહેરીજનોને વહીવટી તંત્રની સૂચનાઓનું પાલન કરવા અપીલ કરવામાં આવે છે.