Kutch : SMC ની મોટી કાર્યવાહી, ₹1.28 કરોડનો વિદેશી દારૂ ઝડપાયો, 16 ની ધરપકડ

ગુજરાતમાં દારૂબંધીના દાવાઓ વચ્ચે સ્ટેટ મોનિટરિંગ સેલ (SMC) એ કચ્છ જિલ્લામાં અત્યાર સુધીની સૌથી મોટી કાર્યવાહી પૈકી એક કરતા ₹1.28 કરોડની કિંમતનો વિદેશી દારૂનો જંગી જથ્થો ઝડપી પાડ્યો છે. કચ્છના માનકુવા વિસ્તારમાં થયેલા આ દરોડામાં 16 શખ્સોની ધરપકડ કરવામાં આવી છે, જ્યારે 6 અન્ય આરોપીઓને વોન્ટેડ જાહેર કરવામાં આવ્યા છે.

દારૂનો જંગી જથ્થો અને કરોડોનો મુદ્દામાલ જપ્ત...

ગુપ્ત માહિતીના આધારે SMC ટીમે માનકુવામાં દરોડો પાડતા, ₹1.28 કરોડની કિંમતની 19,548 નંગ વિદેશી દારૂની બોટલો નો વિશાળ જથ્થો મળી આવ્યો હતો. દારૂના આ જંગી જથ્થા સાથે, SMC એ 3 વાહન અને 5 મોબાઈલ ફોન પણ જપ્ત કર્યા હતા. સમગ્ર કાર્યવાહી દરમિયાન, દારૂ, વાહનો અને મોબાઈલ સહિત કુલ ₹1.70 કરોડની કિંમતનો મુદ્દામાલ જપ્ત કરવામાં આવ્યો છે, જે ગુજરાતમાં દારૂની ગેરકાયદેસર પ્રવૃત્તિઓના વ્યાપક નેટવર્કને છતો કરે છે.

16 આરોપીઓની ધરપકડ, 6 વોન્ટેડ...

આ દરોડામાં SMC એ ઘટનાસ્થળેથી 16 શખ્સોની ધરપકડ કરી છે. પકડાયેલા આરોપીઓ સામે દારૂબંધી ભંગ, હેરાફેરી અને ગુનાહિત કાવતરા સહિતની કલમો હેઠળ ગુનો નોંધી આગળની કાયદેસરની કાર્યવાહી હાથ ધરવામાં આવી છે. આ ઉપરાંત, આ રેકેટમાં સંડોવાયેલા અન્ય 6 શખ્સોને વોન્ટેડ જાહેર કરવામાં આવ્યા છે અને તેમને ઝડપી પાડવા માટે શોધખોળ શરૂ કરવામાં આવી છે.

આ પણ વાંચો : Ahmedabad શહેર કોંગ્રેસ પ્રમુખપદ પર વિવાદ, સોનલ પટેલની પસંદગી સામે દાવેદારોનો બળાપો

SMC ની આ સફળ કામગીરી દર્શાવે છે કે, ગુજરાતમાં દારૂબંધીના કડક અમલ માટે તંત્ર કટિબદ્ધ છે અને આવા મોટા દારૂના રેકેટોને નેસ્તનાબૂદ કરવા માટે સઘન પ્રયાસો કરવામાં આવી રહ્યા છે. આ કાર્યવાહીથી બુટલેગરો અને દારૂની હેરાફેરી કરનારાઓમાં ફફડાટ વ્યાપી ગયો છે.

આ પણ વાંચો : Banaskantha માં મેઘ તાંડવ, દાંતામાં ભેખડો ધસી પડી, વડગામના ખેતરો બેટ બન્યા!