દેશમાં કોરોનાના કેસમાં થયો વધારો, નવા XF-G વેરિયન્ટથી ચિંતામાં થયો વધારો

દેશમાં કોરોના વાયરસના કેસોમાં ફરીથી વધારો જોવા મળી રહ્યો છે. કેન્દ્રીય આરોગ્ય મંત્રાલય દ્વારા સોમવારે જાહેર કરવામાં આવેલા અંકડાઓ મુજબ, એક્ટિવ કેસની સંખ્યા 6,491 સુધી પહોંચી છે.

ગુજરાતમાં છેલ્લા 24 કલાકમાં કોરોનાના 235 નવા કેસ નોંધાયા છે. જેને લઈને રાજ્યમાં એક્ટિવ કેસની સંખ્યા 1109 પર પહોંચી ગઈ છે. જેમાંથી 33 હૉસ્પિટલમાં દાખલ છે, જ્યારે 1076 દર્દી હોમ આઇસોલેશનમાં છે. આ સિવાય 106 દર્દી સાજા થતાં તેમને ડિસ્ચાર્જ કરાયા છે. રાજ્યમાં 24 કલાકમાં કોરોનાથી એકપણ મોત થયું નથી.

આ વચ્ચે XF-G નામનો નવો વેરિયન્ટ પણ ચિંતાનો વિષય બની રહ્યો છે. SARS-CoV-2 જિનોમિક્સ કંસોર્ટિયમના ડેટા મુજબ XF-G વેરિયન્ટના 163 કેસ દેશભરમાં નોંધાયા છે. મહારાષ્ટ્રમાં સૌથી વધુ 89 કેસ મળી આવ્યા છે, જ્યારે તમિલનાડુમાં 16, કેરળમાં 15 અને ગુજરાતમાં 11 કેસ નોંધાયા છે.

કેરળમાં હાલમાં 1,957 સક્રિય કેસ છે, જે સમગ્ર દેશમાં સૌથી વધુ છે. આ સિવાય મહારાષ્ટ્ર, કર્ણાટક, દિલ્હી, પશ્ચિમ બંગાળ, ઉત્તર પ્રદેશ, હરિયાણા અને ગુજરાતમાં પણ કેસ વધતાં જાય છે.

વિશિષ્ટ બાબત એ છે કે, XF-G વેરિયન્ટ ઓમિક્રોનના ઉપ-વેરિયન્ટમાંથી વિકસેલો છે અને તેને ચારેક મહત્વના મ્યૂટેશન મળ્યા છે. જેનાથી તે વધુ ઝડપથી ફેલાય છે અને રોગપ્રતિકારક શક્તિથી બચી શકે છે.

‘ધ લેન્સેટ’ના અહેવાલ અનુસાર, આ વેરિયન્ટ સૌપ્રથમ કેનેડામાં નોંધાયો હતો. વૈજ્ઞાનિકો મુજબ તે વેક્સિનથી બનેલી ઈમ્યુનિટીને પણ અસર આપી શકે છે. જોકે, છેલ્લા 24 કલાકમાં કોઈ દર્દીનું મૃત્યુ થયું નથી, પરંતુ નવા વર્ષની શરૂઆતથી અત્યારસુધીમાં 65 લોકો કોરોનાથી મૃત્યુ પામ્યા છે.