50 જેટલા શાળાના વિદ્યાર્થીઓ પૂર જેવી પરિસ્થિતિમાં ફસાયા, હેલિકોપ્ટરથી રેસ્ક્યૂની તૈયારી

ભાવનગર જિલ્લાના મહુવા પંથકમાં આજે વહેલી સવારથી ધોધમાર વરસાદ વરસ્યો છે. ભારે વરસાદને લીધે નદીઓમાં પૂર જેવી સ્થિતિ સર્જાઈ છે. આ વરસાદના કારણે અનેક વિસ્તારોમાં પાણી ભરાઈ ગયા છે. ખાસ કરીને તલગાજરડાની મોર્ડન સ્કૂલમાં અભ્યાસ કરતા અને રાતોલ ગામ જવા માટે નીકળેલા લગભગ 50 જેટલા વિદ્યાર્થીઓ માર્ગમાં ફરી વળેલા નદીના પાણીમાં ફસાઈ ગયા છે.

વિદ્યાર્થીઓને બચાવવા માટે તંત્ર સતર્ક

આ તમામ વિદ્યાર્થીઓ હાલમાં નજીકના એક મકાનમાં તાત્કાલિક રાખવામાં આવ્યા છે. મકાનને ચારેય બાજુથી નદીના પાણી ઘેરી બેઠા હોવાથી બાળકોને બહાર લાવવા મુશ્કેલ બની રહી છે. ઘટના જાણતા જ મામલતદાર, ફાયર વિભાગ અને રેસ્ક્યૂ ટીમ ઘટનાસ્થળે દોડી ગઈ છે અને બાળકોને સુરક્ષિત રીતે બહાર લાવવાના પ્રયાસો શરૂ કરવામાં આવ્યા છે. તંત્રે હેલિકોપ્ટરની પણ વ્યવસ્થા કરી છે જેથી બાળકોનું રેસ્ક્યૂ કરી શકાય.

મંત્રી નિમુબેન બાંભણીયા આપી સૂચના

જેમ જ ઘટનાની જાણ થઈ, કેન્દ્રીય રાજ્યમંત્રી નિમુબેન બાંભણીયાએ તાત્કાલિક તંત્રને ફોન કરીને વિદ્યાર્થીઓ સુધી પહોંચીને તરત મદદ કરવા સૂચના આપી હતી. પરિવારજનોમાં ભયનો માહોલ છવાઈ ગયો છે અને બાળકોના સગાઓ તેમની સુરક્ષા માટે ચિંતિત છે.

અહીં નોંધાયો સૌથી વધુ વરસાદ 

સ્ટેટ ઇમરજન્સી ઓપરેશન સેન્ટરે સવારે 6 વાગ્યાથી બપોરે 2 વાગ્યા સુધીના સમયગાળામાં રાજ્યમાં થયેલા વરસાદના આંકડા જાહેર કર્યા છે. આ અહેવાલ મુજબ, સૌથી વધુ વરસાદ ભાવનગર જિલ્લાના જેસરમાં નોંધાયો છે જ્યાં 230 મિમિ વરસાદ પડ્યો છે. ત્યારબાદ પાલિતાણામાં 185 મિમિ, મહુવામાં 176 મિમિ, તળાજામાં 84 મિમિ, ગારિયાધારમાં 77 મિમિ અને શિહોરમાં 69 મિમિ વરસાદ નોંધાયો છે.

અમરેલી જિલ્લાના રાજુલામાં 66 મિમિ અને ખાંભામાં 37 મિમિ વરસાદ પડ્યો છે. રાજકોટ જિલ્લાના જેટપુરમાં 52 મિમિ, જૂનાગઢમાં 47 મિમિ, ગીર સોમનાથના ઉનામાં 43 મિમિ અને સુત્રાપાડામાં 37 મિમિ વરસાદ નોંધાયો છે. રાજ્યના અનેક વિસ્તારોમાં પડેલા ભારે વરસાદના કારણે જનજીવન ભારે અસરગ્રસ્ત થયું છે, ખાસ કરીને ટ્રાફિક અને દૈનિક વ્યવહાર અસ્તવ્યસ્ત થયો છે.

રાજ્યમાં આજના વરસાદે ઘણા વિસ્તારોને અસર પહોંચાડી છે અને વધુ પડતા વરસાદને કારણે રાહદારી અને જનજીવન બંને અસ્તવ્યસ્ત થયા છે.