લીંબડીમાં ભારે વરસાદ, જાંબુ- રામરાજપર કોઝવે પર ફરી વળ્યું પાણી

લીંબડી અને તેના આસપાસના વિસ્તારમાં ભારે વરસાદની સ્થિતિ સર્જાઇ હતી.  ભારે વરસાદથી ગ્રામ્ય વિસ્તારમાં ઉપરવાસમાં વરસાદી પાણી ફરી વળ્યા છે. વરસાદી પાણીએ વિવિધ તાલુકામાં ભારે તારાજી સર્જી છે. અહી 12થી વધુ ગામ સંપર્ક વિહોણા બન્યા છે જ્યારે ખેડૂતોને પાકને નુકસાન અને ખેતરમાં પાણી ભરાઈ જવાની ભીતિ સેવાઇ રહી છે. 

સુરેન્દ્રનગર જિલ્લામાં ઉપરવાસમાં ભારે વરસાદના કારણે ધોળીધજા અને નાયકા ડેમ ઓવરફલો થયા હતા. જેને કારણે નદીમાં પાણી છોડવામાં આવતાં લીંબડી તાલુકાના નળકાંઠા વિસ્તારમાં પાણી ફરી વળતાં જાંબુથી રામરાજપર વચ્ચેનાં કોઝવે પર ગળાડૂબ પાણી ફરી વળ્યું હતું. કોઝવે પર પાણી ભરાઈ જવાથી જાંબુ, ભથાણ, પરાલી, રોજાસર, મુળ બાવળા, પરનાળા સહિતના ગામડાઓમાં હાલ સંપર્ક વિહોણા બન્યા છે. ગામો વચ્ચે સંપર્ક તૂટતાં ગ્રામજનોને ભારે મુશ્કેલી વેઠવી પડી રહી છે.

ચુડા તાલુકામાં ભારે વરસાદના કારણે વાંસલ ડેમ ઓવરફલો થતાં પાણી છોડવામાં આવ્યું હતું. ચુડા તાલુકાના ઝીંઝાવદર, છત્તરિયાળા, વેળાવદર, રામદેવગઢ, સહિતના ગામો સંપર્ક વિહોણા બનતા તંત્રમાં દોડતું થયુ હતું. તેમજ ભગુપુર, કારોલ, ખાંડીયા, વનાળા, કંથારિયા સહિતના ગામોમાં ઠેર ઠેર પાણી ફળી વળતાં વીજ પુરવઠો ખોરવાઈ જતાં લોકો ભારે હાલાકી ભોગવી રહ્યાં છે. લીંબડી, ચુડા અને સાયલા તાલુકાના ધારાસભ્ય કિરિટસિંહ રાણાએ ચુડા તાલુકાના અસરગ્રસ્ત ગામડાઓની લોકો સાથે મુલાકાત કરીને ચુડા તાલુકા પંચાયત ખાતે અધિકારીઓ સાથે બેઠક યોજીને અસરગ્રસ્ત ગામડાઓમાં તાત્કાલિક બચાવ કામગીરી હાથ ધરવા સુચનાઓ આપી હતી. 

લીંબડી તાલુકાના જાંબુ ગામના સરપંચે જણાવ્યું હતું કે, કોઝવે પર ગળાડૂબ પાણી ભરાઈ જવાથી સાતથી આઠ ગામોના હજારો લોકોને ભારે તકલીફો વેઠવી પડે છે.ઈમરજન્સી હોસ્પિટલના કામ અર્થે અથવા કોઈ પ્રસુતાને દુખાવો ઉપડે તો જઈ શકાતું નથી. જેથી તંત્ર વહેલી તકે જાંબુથી રામરાજપર જતાં કોઝવે પર પુલ બનાવે તો તમામ ગામોના લોકોની હાલાકી દૂર થાય.