ભારે વરસાદમાં બોટાદમાં લાઠીદડ પાસે તણાઈ કાર, 6 લોકો થયા ગુમ, 2નો બચાવ

રાજ્યમાં સોમવારથી સતત વરસાદી માહોલ જોવા મળી રહ્યો છે, જેમાં સૌરાષ્ટ્ર અને દક્ષિણ ગુજરાતના વિસ્તારોમાં ખાસ કરીને ભારે વરસાદથી સ્થિતિ ગંભીર બની છે. બોટાદ જિલ્લાના લાઠીદડ ગામ નજીક એક ઈકો કાર તણાઈ ગઈ હતી. કારમાં કુલ 8 લોકો સવાર હતા, જેમાંથી 2નું રેસ્ક્યૂ કરવામાં આવ્યા છે, જ્યારે 6 લોકો હજુ સુધી ગુમ છે.

પ્રાપ્ત વિગતો અનુસાર, તણાયેલી કારમાં લાઠીદડ ગામનો ચૌહાણ પરિવાર સવાર હતો. મોડી રાતથી તેમને શોધવા માટે બચાવ કામગીરી શરૂ કરવામાં આવી હતી. ઘટના બાદ તંત્રએ તાત્કાલિક પગલાં ભર્યા હતા, તેમ છતાં 10 કલાકના પ્રયાસ પછી પણ બાકીના 6 લોકો મળી નથી.

બોટાદ જિલ્લામાં ભારે વરસાદને કારણે અનેક વિસ્તારોમાં જળબંબાકાર જેવી સ્થિતિ સર્જાઈ છે. છેલ્લા 10 કલાકમાં બોટાદમાં 9.72 ઇંચ અને ગઢડામાં 13.50 ઇંચ વરસાદ નોંધાયો છે. ભારે વરસાદને કારણે સ્થાનિક નદીઓ 2 કાંઠે વહેવા લાગી છે અને રસ્તાઓ પર વરસાદી પાણીની નદીઓ વહી રહી છે.

બોટાદ, ગઢડા, બરવાળા અને રાણપુર પંથકમાં પણ મેઘમહેરના કારણે ખેડૂતોમાં ખુશીની લાગણી વ્યાપી છે. વરસાદથી ખેતી માટે અનુકૂળ વાતાવરણ સર્જાયું છે, જોકે કેટલાક વિસ્તારોમાં પાણી ભરાવાના કારણે દૈનિક જીવન પર અસર પડી છે.