રાજ્યમાં આ 4 જિલ્લાઓમાં ઓરેન્જ અને 7 જિલ્લામાં યલો એલર્ટ, 1 જુલાઈ સુધી ભારે વરસાદની આગાહી

ગુજરાતમાં છેલ્લા કેટલાક દિવસોથી ધોધમાર વરસાદનો મોજો ચાલુ છે. સૌરાષ્ટ્ર અને દક્ષિણ ગુજરાત બાદ હવે મધ્ય ગુજરાતમાં પણ વરસાદનો પ્રભાવ નોંધાયો છે. આ પરિસ્થિતિને ધ્યાનમાં રાખીને હવામાન વિભાગે 1 જુલાઈ સુધી રાજ્યના વિવિધ વિસ્તારોમાં ભારેથી અતિભારે વરસાદની આગાહી કરી છે. કેટલાક જિલ્લાઓ માટે એલર્ટ પણ જાહેર કરવામાં આવ્યા છે.

આજનો વરસાદ અને એલર્ટ

હવામાન વિભાગના અહેવાલ અનુસાર, આજે ગુરુવારે અરવલ્લી, મહીસાગર, દાહોદ અને છોટા ઉદેપુર જિલ્લામાં અતિભારે વરસાદ માટે ઓરેન્જ એલર્ટ જાહેર કરવામાં આવ્યું છે. આ સાથે જ અમરેલી, ભાવનગર, સાબરકાંઠા, નર્મદા, પંચમહાલ, નવસારી અને વલસાડ જિલ્લામાં યલો એલર્ટ આપવામાં આવ્યું છે.

27 જૂનથી 29 જૂન સુધીની આગાહી

આ સમયગાળામાં કચ્છ, મોરબી, દેવભૂમિ દ્વારકા, જામનગર, પાટણ, બનાસકાંઠા, સાબરકાંઠા, મહેસાણા, અમરેલી, ભાવનગર, અરવલ્લી, મહીસાગર, દાહોદ, નવસારી, વલસાડ, ગાંધીનગર અને પંચમહાલ જિલ્લામાં ભારે વરસાદની શક્યતા છે.

30 જૂન અને 1 જુલાઈની આગાહી

30 જૂનના રોજ વલસાડ, નવસારી, તાપી, ડાંગ, બનાસકાંઠા, અમરેલી, ભાવનગરમાં વરસાદની આગાહી છે. 1 જુલાઈના રોજ નર્મદા, સુરત, તાપી, ડાંગ, વલસાડ, ભાવનગર, અમરેલીમાં વરસાદની આગાહી છે. આ જિલ્લાઓમાં હવામાન વિભાગે ભારે વરસાદ માટે ચેતવણી જાહેર કરી છે.